Ta kila’g lə Jɔb
1 Jɔb un ta pa pana:
2 See ndɔ gə́ ra ɓa seḭ a kəwje rɔ sí kulaje kəm ndòo ləm,
Gə kṵdamje gə taje gə́ ta sí’g badə-badə ga̰gmje ləm tɔ wa.
3 Aa ooje, as gɔl dɔg ŋga seḭ ulaje sul dɔm’g.
See rɔ sí kul loo gə́ seḭ uduje mbim gə taje gə́ togə́bè lé el wa.
4 Ɓó lé ma ya m’ra né gə́ to lée’g el tɔgərɔ ndá
Ma ya gə karm ba taree a kwa dɔm.
5 See seḭ ə̰jije to gə́ seḭ urje dɔm’g wa.
See seḭ ə̰jije to gə́ ma ɓa ta wa dɔm wa.
6 Maji kar sí gərje gao to gə́ Ala nja ɓa tubam ləm,
Yeḛ nja ɓirim gə wul-ba̰də ləa ləm tɔ.
7 Ɓó lé m’no̰ mbata néra kərm-kərm gə́ ra səm ndá njekilam keneŋ godo ləm,
Ɓó lé m’ɓar njela səm kara njegaŋ-rəwta ləm godo ləm tɔ.
8 Yeḛ udu rəwje jigi-jigi dɔm’g, m’askəm dəs el,
Yeḛ ar loo ndul njudu-njudu kila rəw-kabmje’g.
9 Yeḛ ɓol rɔnduba rɔm’g ləm,
Yeḛ ɔr dɔgugu dɔm’g ləm tɔ.
10 Yeḛ tuji néje ləm lai ndá m’ɔd m’aw,
Yeḛ ɔr meekundayel ləm rɔd to gə́ d’ɔr ne kag bèe.
11 Oŋg ləa ḭ səa to gə́ pər bèe dɔm’g.
Yeḛ ra səm to gə́ dəw gə́ kára mbuna njéba̰je’g ləa bèe.
12 Kudu-njérɔje ləa d’ɔm na̰’d d’aw,
Deḛ d’ar rəw kaw dee to bərəŋ njal teḛ ne rɔm’g ləm,
Deḛ d’ar loo-si dee gugu dɔ kəi-kubu ləm sub ləm tɔ.
13 Yeḛ ar ŋgakɔmje d’unda rɔ dee ŋgərəŋ rɔm’g ləm,
Ar baokuraje ləm kara sa rɔ dee rəw rɔm’g ləm tɔ.
14 Njé’g ləm d’ubam d’ya̰’m ləm,
Baokuraje ləm gə́ gəd ya kara meḛ dee wəi dɔm’g ləm tɔ.
15 Ma m’to gə́ dəw-dɔ-ɓee kəm kuraje’g ləm gə́ diŋgam gə njé gə́ dené,
M’tel m’to dəw gə́ gəree el kəm dee’g.
16 M’ɓar kura ləm ndá yeḛ ilam keneŋ el ləm,
M’ra ndòo rəa’g gə tam kara m’ra pi ləm tɔ.
17 Tuma̰ ŋgururu-ŋgururu ləm lé tel to né gə́ wɔi dɔ dené’g ləm ləm,
No̰ gə́ m’no̰ lé wɔi dɔ ŋgan meemje’g ləm tɔ.
18 Ŋganje kara d’ḛjim bəḭ-bəḭ ləm,
Ɓó lé m’ḭ tar ndá d’ula sul ɓa dɔm’g ləm tɔ.
19 Deḛ gə́ m’ɔm məəm dɔ dee’g d’oom gə́ né gə́ to kḛji,
Deḛ gə́ m’unda dee dan kəm’g ya tel d’ɔsm rəw.
20 Ndar rɔm gə darɔm lab siŋgarɔm’g ndərəg-ndərəg,
Né kára kara gə́ nai rɔm’g lé godo.
21 Seḭ baokuraje ləm, maji kar sí ooje kəmtondoo ləm, maji kar sí ooje kəmtondoo ləm ya,
Mbata ji Ala ɓa undam ne.
22 See gelee ban ɓa seḭ tubamje to gə́ Ala tubam ne bèe wa.
See gelee ban ɓa tuji lə darɔm lé as sí el wa.
23 Ǝi, m’ndiŋga rɔm kar dee ndaŋg taje ləm,
Kar dee ndaŋg taree mee maktub’g ya.
24 Ma m’ndiŋga rɔm kar dee ndaŋg taree gə siga gə́ ra gə larndul ləm,
Gə yee gə́ léḛ rɔmo̰ keneŋ ləm tɔ
Gə mba kar dee tḭja kaar mbal’g gə no̰.
25 Nɛ ma m’gər gao, njekuga dɔm si kəmba ya,
Ndɔ gə́ rudu lé ndá yeḛ nja a k’ḭta dɔ naŋg nee tɔ.
26 Loo gə́ ndar rɔm a tuji pugudu ndá yeḛ a kḭ ɓəi,
Loo gə́ darɔm a godo ndá m’a koo kəm Ala gə kəm nda̰-nda̰.
27 M’a kée ndá yeḛ a kwam gə́ rəa’g,
Kəm-ma nja a kée ɓó kəm dəw gə́ raŋg a kée kulam el.
Dɔ ɓəŋgərəm yolé ne məəm’g yolé-yolé mba teḛ ne mee ndəa’g neelé.
28 Yen ŋga seḭ a paje pana: See gelee ban ɓa jeḛ j’un gée wa.
Mbata meekarabasur ləm a to raga ndəgəsə.
29 Maji kar sí ɓəlje rɔ sí mbata lə kiambas,
Bo̰ néra gə́ ɔs ta loo’g gə kiambas lé to ɓəl kədm-kədm.
Bèe ndá maji kar sí gərje to gə́ rəwta-gaŋg to keneŋ ya.
© Ngambai Bible © Alliance Biblique du Tchad 1989, 2015.
