Dabid unda Salomo̰ gə́ njetaa toree
1 Dabid ɓar mbai dɔ Israɛlje lai ləm, gə mbai dɔ ginkojije ləm, gə ɓée kudu-njérɔje gə́ ra kula lə mbai ləm, gə ɓé-njérɔje gə́ tɔl-dɔg-dɔg (1.000) ləm, gə deḛ gə́ tɔl-tɔl (100) ləm, gə deḛ gə́ to njékaa dɔ némajije gə nékulje lai gə́ to ka̰ mbai ləm, gə njéndoo né ŋgan méeje ləm, gə njékaa dɔ néje ləm, gə bao-rɔje ləma, gə njésiŋgamoŋje lai ləm tɔ ar dee ree Jerusalem. 2 Mbai Dabid lé ḭ aar tar pana: Seḭ ŋgakɔmje gə dəwje ləm, maji kar sí ooje ta ləm. M’wɔji-kwɔji kunda kəi mba ŋgəm sa̰duk-manrɔ lə Njesigənea̰ keneŋ ləm, gə mba karee to gə́ loo-tura-gɔl-kɔm lə Ala lə sí ləm tɔ ndá ma m’wa dɔ gɔl rɔm gə mba kunda ya . 3 Nɛ Ala ulam pana: I a kunda kəi gə mba kar rim ɓar ne el mbata i to njerɔ ləm, ila məs ləm tɔ. 4 Njesigənea̰, Ala lə Israɛlje ɔrm mbuna dee-deḛ lai gə́ to gel-bɔje lə bɔm am m’to mbai lə Israɛlje saar gə nɔm, mbata yeḛ mbər Juda ɓa gə́ mbai ləm, yeḛ mbər gel bɔmje mbuna gel-bɔje’g lə Juda ləma, yeḛ mbərm-ma nja mbuna ŋgakɔmje’g lé am m’o̰ dɔ Israɛlje lai ləm tɔ. 5 Ala am ŋganje bula yaa̰ ndá mbuna ŋganəmje’g lai lé yeḛ mbər ŋgonəm gə́ Salomo̰ ɓa gə mba karee si kalimbai ɓeeko̰’g lə Njesigənea̰ dɔ Israɛlje’g. 6 Tɔɓəi yeḛ ulam togə́bè pana: Ŋgoni gə́ Salomo̰ ɓa a kunda kəi ləm ləm, gə gadlooje ləm gə́ gugu dəa ləm tɔ, mbata m’a mbəree gə mba karee to ŋgonəm ləm, ma kara m’a to gə́ bɔbeeje ləm tɔ. 7 Ɓó lé yeḛ aar njaŋg dɔ torndumje’g gə ndukunje’g ləm ra née ndá m’a kar ɓeeko̰ ləa to saar gə no̰ ya. 8 Ɓasinè, kəm Israɛlje’g lai ləm, gə loo-mbo̰-dɔ-na̰’g lə koso-dəwje lə Njesigənea̰ ləma, gə kəm Ala’g lə sí gə́ oo ndu sí ləm tɔ lé godnduje lai gə́ to ka̰ Njesigənea̰, Ala lə sí lé maji kar sí taaje dɔɓəŋgərə sí’g mba kaa dɔ dee kər-kər gə mba kar sí taaje ɓee gə́ maji dum neelé gə́ né ka̰ sí gə́ seḭ a kya̰je gə́ nénduba karje ŋgan síje gə́ goo sí’g gə́ kédé-kédé tɔ.
9 Nɛ i ŋgonəm Salomo̰, maji kari gər Ala lə bɔbije ləm, ra né aree gə meendakaḭ ləma, ndigee gə məəi gə kankəmrɔi bura ləm tɔ mbata Njesigənea̰ to njenaa meekuru lə dəwje lai ləm, gə njegər gin néje lai gə́ d’wɔji meḛ dee’g ləma, gə takə̰jije lə deḛ lai ləm tɔ. Ɓó lé i saŋgee ndá yeḛ a kya̰ loo kari iŋgá, nɛ ɓó lé i ubá yá̰ ndá yeḛ a kubai kya̰’i saar gə no̰ ya tɔ. 10 Oo ɓasinè, Njesigənea̰ ɔri gə mba kari unda kəi gə́ to gə kəmee. Maji kari wa rɔi kɔgərɔ, gə́ ra né ya.
Dabid tɔji Salomo̰ loo ra kəi gə́ to gə kəmee lé
11 Dabid tɔji ŋgonee gə́ Salomo̰ loo kunda ne kəi-jala gə kəije ləm, gə ŋgan kəije gə́ wɔji dɔ nébaoje ləm, gə ŋgan kəije gə́ tar ləm, gə ŋgan kəije gə́ mee maree’g ləma, gə ŋgon kəi gə́ wɔji dɔ loo kunda sa̰duk-manrɔ ləm tɔ. 12 Yeḛ tɔjee néje lai gə́ yeḛ wɔji mée’g mba ra gə́ wɔji ne dɔ gadlooje kəi lə Njesigənea̰ ləm, gə ŋgan kəije lai gə́ gugu dɔ kəi mbata nébaoje gə́ ka̰ kəi Ala ləm, gə nébaoje gə́ wɔji dɔ loo gə́ to gə kəmee doi lé ləm, 13 gə ta gə́ wɔji dɔ kudu njékinjanéməsje gə Ləbije lai ləm, gə néje lai gə́ wɔji dɔ kula gə́ mee kəi’g lə Njesigənea̰ ləma, gə nékulaje lai gə́ wɔji dɔ kəi lə Njesigənea̰ ləm tɔ. 14 Yeḛ tɔjee nékulaje gə́ kəm ra gə larlɔr ləm, gə kwɔi lə néje gə́ kəm ra gə larlɔr ləm tɔ, tɔɓəi yeḛ tɔjee nékulaje lai gə́ kəm ra gə larnda ləm, gə kwɔi lə dee ləm tɔ, mba ra ne nékulaje mbata kudu kulaje kára-kára lai gə́ wɔji dɔ dee dɔ dee. 15 Yeḛ tɔjee kwɔi lə kag-pərndɔje gə néndogóje lə dee gə́ ra dee gə larlɔr ləm, gə kwɔi lə kag-pərndɔje kára-kára gə néndogóje gə́ wɔji dɔ dee dɔ dee ləm tɔ, yeḛ tɔjee kwɔi lə kag-pərndɔje gə́ ra dee gə larnda ləm, gə kwɔi lə kag pərndɔje kára-kára gə néndogóje gə́ wɔji dɔ dee dɔ dee ləm tɔ gə goo kula ra kag-pərndɔje kára-kára lai. 16 Yeḛ tɔjee kwɔi lə larlɔr mbata lə tabulje mba kunda pil muruje gə́ to gə kəmee dɔ’g kára-kára lai ləm, gə kwɔi lə larnda mbata lə tabulje gə́ kəm ra gə larnda ləm tɔ. 17 Yeḛ tɔjee kag-larje gə́ ta dee tɔ ja̰-ja̰ ləm, gə bai-girje ləma, gə ŋgo-dɔ-manje ləm tɔ gə́ ra dee gə larlɔr gə́ àr ŋgad-ŋgad, yeḛ tɔjee rəw ra karmbije gə larlɔr gə kwɔi lə karmbije kára-kára ləm, gə karmbije gə́ ra dee gə larnda gə kwɔi lə karmbije kára-kára ləm tɔ. 18 Tɔɓəi yeḛ tɔjee loo ra loo-tuu-né gə́ ə̰də sululu gə́ ra gə larlɔr gə́ àr ŋgad-ŋgad gə kwɔi ləa. Yeḛ tɔjee loo ra pusu ləm, gə néndaji Nékundaje gə́ dara gə́ ra dee gə larlɔr d’ar dee naji bag dee dɔ sa̰duk-manrɔ’g lə Njesigənea̰ ləm tɔ.
19 Dabid pana: Néje lai neelé to gə goo ndaŋgee gə́ Njesigənea̰ ndaŋg gə jia ɓa yeḛ am gosonégər gə mbata néje lai neelé gə goo nétɔjije gə́ wɔji dɔ dee dɔ dee.
20 Dabid ula Salomo̰ pana: Ŋgonəm, maji kari wa rɔi kɔgərɔ, wa diŋgam məəi’g tɔɓəi gə́ ra né ɓó ɓəl el ləm, unda bala el ləm tɔ. Mbata Njesigənea̰, Ala gə́ to Ala ləm lé yeḛ a nai səi ləm, yeḛ a kubai kya̰’i el ləm tɔ saar kari tɔl ne kulaje lai gə́ wɔji dɔ kəi lə Njesigənea̰ lé bém ya. 21 Aa oo, kudu njékinjanéməsje gə Ləbije gə mba ra kulaje lai gə́ mee kəi’g lə Ala ɓa d’isi gən, aa loo mbɔri’g mbata kulaje lai lé diŋgamje lai gə́ meḛ dee tɔ kujita ləm, gə to njégər gosɔkulaje ɓəd-ɓəd ləm, gə mbaije ləma, gə koso-dəwje lai gə́ d’ula dɔ dee gin tornduije’g lai ləm tɔ lé d’isi gən ya ləm tɔ.
© Ngambai Bible © Alliance Biblique du Tchad 1989, 2015.
