Manasə tel to mbai gə́ Juda
2Mb 21.1-181 Manasə lé ləbee aḭ dɔg-giree-joo ɓa yeḛ tel to mbai ndá yeḛ si Jerusalem o̰ ne ɓee as ləb rɔ-mi-giree-mi. 2 Yeḛ ra né gə́ majel kəm Njesigənea̰’g gə goo néraje gə́ mina̰ lə ginkoji dəwje gə raŋg gə́ Njesigənea̰ tuba dee no̰ Israɛlje’g lé . 3 Yeḛ tel unda dɔ looje gə́ ndəw gə́ bɔbeeje gə́ Ejekias tuji dee lé ləm, yeḛ unda loo-nékinjanéməsje lə magə-Baalje ləma, yeḛ ra magə-Astartéje ləm tɔ ndá yeḛ unda barmba no̰ boo-nékundaje lai gə́ dara wa dee ne mée’g. 4 Tɔɓəi yeḛ unda loo-nékinjanéməsje mee kəi’g lə Njesigənea̰ gə́ yeḛ un ndia dɔ’g pana: Jerusalem ɓa ri neḛ a ɓar dɔ’g saar-saar gə no̰ lé . 5 Yeḛ unda loo-nékinjanéməsje ar boo-nékundaje gə́ dara mee gadlooje gə́ joo gə́ to takəi’g lə Njesigənea̰ lé. 6 Yeḛ ɔm ŋganeeje pər’d kəm wəl-loo’g lə Hinɔmje, Yeḛ pole néje gə ndo̰-ərje ləm, yeḛ ra némbeḛje ləma, unda njéɓar ndilje karee gər ne néje gə́ d’a gə ree ləm tɔ. Yeḛ ra né gə́ majel gə́ kédé-kédé kəm Njesigənea̰’g mba kar mée ea̰ ne. 7 Yeḛ unda néndaji gə́ yeḛ nja tɔl gə́ magə lé mee kəi’g lə Ala, gə́ Ala pa taree ar Dabid gə ŋgonee Salomo̰ pana: To mee kəi’g nee gə mee ɓee gə́ Jerusalem gə́ ma nja mbəree mbuna ginkoji Israɛlje’g lai lé ɓa ma m’ndigi kar rim ɓar keneŋ saar gə no̰ lé . 8 Ɓó lé deḛ d’aa dɔ godnduje lai gə ndukunje gə́ m’un m’ar dee gə ndu Moyis lé ra née ndá ɓee gə́ ma m’wɔji m’ar bɔ deeje-je lé m’a kar dee d’ḭ keneŋ d’unda loo teḛ d’aw raŋg el ŋga. 9 Nɛ Manasə ɓa to njegin kar Judaje gə dəwje gə́ Jerusalem ndəm gə néra gə́ majel gə́ ur dɔ ginkoji dəwje gə raŋg lai gə́ Njesigənea̰ tuji dee no̰ Israɛlje’g lé.
10 Njesigənea̰ ula Manasə gə koso-dəwje ləa ta, nɛ deḛ d’un mbi dee dɔ’g rəw. 11 Yen ŋga Njesigənea̰ ar ɓé-njérɔje gə́ Asiri ree d’wa Manasə teá gə kúla lar, deḛ teá gə kúla larkas njim-njim d’aw səa Babilɔn tɔ. 12 Loo gə́ yeḛ si dan némeeko̰’g ndá yeḛ ra ndòo rɔ Njesigənea̰ Ala’g ləa, tɔɓəi yeḛ oso kul riba dɔ rəa pərəg no̰ Ala’g lé lə bɔbeeje-je. 13 Yeḛ ra tamaji təa’g ndá Njesigənea̰ ya̰ goo oŋg ləa oo ne tamaji ləa ɓa tel səa Jerusalem loo-ko̰ɓee’g ləa gogo. Bèe ɓa Manasə gər gao to gə́ Njesigənea̰ to ne Ala ya.
14 Goo néje’g neelé ndá yeḛ unda ndògo-bɔrɔ gir ɓee-boo’g lə Dabid par gə́ kel dɔ-gó lə Giho̰ mee wəl-loo’g aw saar teḛ ne takəi gə́ ria lə Takəi-lə-Ka̰jije ndá yeḛ gugu ne dɔ dɔdərloo, tɔɓəi yeḛ unda aree ŋgal yaa̰: yeḛ unda ɓé-njérɔje mee ɓee-booje gə́ Juda lai gə́ d’ila ndògo-bɔrɔ gugu ne dɔ dee lé tɔ. 15 Yeḛ sané magəje gə́ dɔɓee’d gə néndaji gə́ yeḛ tɔl dee unda dee mee kəi’g lə Njesigənea̰ ləm, yeḛ tɔs loo-nékinjanéməsje gə́ yeḛ unda dee dɔ mbal’d gə́ wɔji dɔ kəi lə Njesigənea̰ ləma, gə njé gə́ Jerusalem ləm tɔ tila dee, tɔɓəi yeḛ odo dee ɔm dee gir ɓee-boo’g raga tɔ. 16 Yeḛ tel gɔl loo-nékinjaməs lə Njesigənea̰ gə mba kinja nékinjanéməsje gə́ wɔji dɔ kɔm na̰’d ləm, gə njé gə́ wɔji dɔ ra oiyo ləm tɔ keneŋ ndá yeḛ un ndia ar Judaje gə mba kar dee ra né d’ar Njesigənea̰ Ala lə Israɛlje tɔ. 17 Koso-dəwje d’inja nékinjanéməsje gə́ kédé-kédé dɔ looje gə́ ndəw’g ya ɓəi nɛ deḛ ra gə mba kula ne rɔnduba dɔ Njesigənea̰ Ala’g lə dee ya kára ba tɔ.
18 Ges sorta néraje lə Manasə ləm, gə tamaji ləa gə́ yeḛ ra ta Ala’g lé ləa ləma, gə taje gə́ njéteggintaje d’ulá gə ri Njesigənea̰ Ala lə Israɛlje ləm tɔ lé ndaŋg taree mee maktub néraje’g lə mbaije gə́ Israɛl ya. 19 Tamaji ra ləa gə tel gə́ Ala tel ilá keneŋ, gə kaiyaje ləa gə kaltaje ləa, gə dɔ looje gə́ ndəw gə́ yeḛ unda dee ar magəje gə néndajije gə́ tɔl dee kédé ɓa yeḛ oso ne kul ɓəi lé ndaŋg taree mee maktub’g lə Hojai. 20 Manasə wəi ndá deḛ dubee mee kəi’g ləa. Ndá ŋgonee gə́ Amo̰ ɓa o̰ ɓee toree’g tɔ.
Amo̰ tel to mbai gə́ Juda
2Mb 21.19-2521 Ləb Amo̰ aḭ rɔ-joo-giree-joo ɓa yeḛ tel to mbai ɓəi ndá yeḛ si Jerusalem o̰ ne ɓee as ləb joo. 22 Yeḛ ra né gə́ majel kəm Njesigənea̰’g to gə́ bɔbeeje Manasə ra lé ya. Yeḛ inja néməs ar néndajije lai gə́ bɔbeeje gə́ Manasə ra dee lé ndá yeḛ kara wa dee mée’g tɔ. 23 Yeḛ oso kul no̰ Njesigənea̰’g to gə́ bɔbeeje Manasə oso bèe el mbata Amo̰ lé ar ta wa ne dəa gə́ kédé-kédé.
24 Kuraje ləa d’o̰ njuma̰ tɔlee ne mee kəi’g ləa tɔ. 25 Nɛ dəw-mee-ɓeeje d’ḭ tɔl deḛ lai gə́ d’o̰ njuma̰ mbai Amo̰ lé ndá dəw-mee-ɓeeje d’unda ŋgonee Jojias gə́ mbai toree’g tɔ.
© Ngambai Bible © Alliance Biblique du Tchad 1989, 2015.
