Jeju teḛ dɔkumbwa’g
Mar 16.1-10, Lug 24.1-12, Ja̰ 20.1-101 Ndɔ gə́ dɔtar gə́ njekorè goo ndɔ-kwa-rɔ lé loo to gḭdo-gḭdo ɓəi ndá Mari gə́ Magdala gə Mari gə́ raŋg lé d’aw mba tən dɔɓar koo. 2 Aa ooje, dɔ naŋg yə ɓugu-ɓugu mbata kura lə Mbaidɔmbaije ḭ dara nar uru naŋg nduburu biri mbal gə́ boi uba dəa gao si’g. 3 Yeḛ ndɔḭ wər-wər asəna gə ndi gə́ tel ləm, kubu ləa ndá kələw-kələw asəna gə kwɔji ləm tɔ. 4 Njéŋgəmlooje ɓəl d’unda tigi-tigi d’unda naŋg mburug d’asəna gə dəwje gə́ d’wəi bèe. 5 Kura lə Ala lé gə́ dara un ta ula denéje neelé pana: Seḭ ɓa yḛ̀, ɓəlje nda̰ el mbata ma m’gər gao Jeju gə́ deḛ ɗaree kaar kag’d lé ɓa seḭ ndoleeje ya. 6 Yeḛ to loo gə́ nee’g el ŋga, yeḛ unda loo teḛ mba̰, to gə́ yeḛ ula sí kédé lé. Reeje ooje loo-tée. 7 Ɔdje rad awje ulaje njékwakiláje pajena: Jeju lé unda loo teḛ dan njé gə́ d’wəi’g mba̰. Aa ooje, yeḛ aw no̰ sí’g gə́ Galile, seḭ a kéeje keneŋ. Yee ɓa ma m’ula sí gée ya.
8 Denéje neelé sa rɔ dee gə ŋgwɔd gə kəm ɓəl ləm, gə rɔlel gə́ boo ləm tɔ ndá d’aḭ d’aw d’ula njékwakiláje taree. 9 Yen ŋga Jeju dar dee bus pana: M’ra sí lapia ɓòo.
Deḛ ree wɔr gə́ rəa’g d’unda naŋg gɔlee’g mburug, d’unda barmba naŋg d’wá meḛ dee’g. 10 Togə́bè Jeju ula dee pana: Ɓəlje el, aw ulaje ŋgakɔmje ar deeje d’aw Galile ɓa d’a kila kəm dee dɔm’g keneŋ ɓəi.
11 Loo gə́ deḛ d’ɔm na̰ rəbə d’isi d’aw ndá njéŋgəm ta dɔɓarje gə́ na̰je d’ɔd d’aw mee ɓee’g d’ula mbai dɔ njékinjanéməsje-je ta néje lai gə́ teḛ lé. 12 Deḛ neelé mbo̰ dɔ na̰ gə ŋgatɔgje lə deḛ lai na̰’d, d’ula ta meḛ na̰’d njḭ-njḭ ndá d’odo lar ɓai-ɓai d’ar njérɔje neelé 13 d’ula dee pana: Aw pajena: Njékwakiláje ɓa ree loondul’g loo gə́ jeḛ n’toɓi lé ya, d’ɔr ninee d’aw ne. 14 Ɓó lé njeguburuɓee oo taree ndá j’a lèbè ne kəmee gə mba kɔr ne taree dɔ sí’g.
15 Njérɔje taa lar neelé ndá ra to gə́ deḛ d’un ne ndu dee d’ar dee lé ya tɔ. Ta neelé d’aw gə taree wəg-wəg mbuna Jibje’g saar teḛ mee ndəa gən.
Jeju teḛ kəm njékwakiláje’g
Mar 16.14-18, Lug 24.36-49, Ja̰ 20.19-23, NNk 1.6-8
16 Njékwakila Jejuje gə́ dɔg-gir-dee-kára lé d’aw Galile dɔ mbal gə́ Jeju tɔji dee lé . 17 Loo gə́ deḛ d’ée ndá deḛ d’unda naŋg nea̰’g mburug. Nɛ njé gə́ na̰je maḭ gə rɔ dee dəa’g. 18 Jeju ree pər gə́ rɔ dee’g ula dee pana: Ma lé d’ula dɔmoŋ dɔm’g mba karm m’to dəw dɔ néje lai dara gə dɔ naŋg nee tɔ. 19 Awje gə dɔ ɓee dɔ ɓee telje dəwje gə́ njékwakilamje, raje deeje batɛm gə ri Bɔ-dəwje ləm, gə ri Ŋgonee ləma, gə ri Ndilmeenda ləm tɔ . 20 Ndoo deeje mba kar dee gər loo kaa dɔ néje lai gə́ m’un ndum m’ar sí lé. Aa ooje ma nja kara m’orè sə sí rəw na̰’d més saar ndɔ gə́ rudu naŋg nee a kun ɗiao.
© Ngambai Bible © Alliance Biblique du Tchad 1989, 2015.
