Tamaji gə mba kar dəwje d’ɔm ne na̰’d gə Ala
1 Pakɔs lə Koréje gə́ d’ar bao-pa mba karee ɔs sə dee lé.
2 Ǝi Njesigənea̰, i ra né gə́ maji mbata ɓee ləi ya,
Njé’g lə Jakob gə́ d’wa dee gə́ ɓər lé
I nja ɓa tel sə dee ree sə dee ɓée.
3 I lé ar məəi ti mbidi dɔ néra gə́ kori-korije’g lə koso-dəwje ləi ya,
I nja ɔn dɔ kaiyaje lə deḛ lai tɔ.
4 I lé rəm gə boo-oŋg ləi ləm,
Oŋg-boo ləi gə́ ḭ səi jugugu lé kara
I aree wəi bèm ləm tɔ.
5 I Ala gə́ to njekaji lə sí lé
Maji kari tel gɔl sí unda sí gə́ majee gogo,
Oŋg ləi gə́ ari ḭ ne sə sí lé
Maji kari ya̰ gée ya.
6 See məəi gə́ ḭ səi dɔ sí’g lé a to saar gə no̰ wa.
Esé see i a kar oŋg ləi
Aw gə́ kédé-kédé dɔ sí’g saar-saar gə no̰ ya wa.
7 See a i kar sí n’tel j’isije kəmba gogo
Gə mba kar síjeḛ koso-dəwje ləi lé
J’alje ne rɔ sí gə mbata ləi el nja saar wa.
8 Njesigənea̰, maji kari ar sí j’oo meemaji ləi ləm,
Kaji ləi lé kara maji kari ar sí j’aji ne ya ləm tɔ.
9 M’a kur mbim mba koo ne ta gə́ Ala Njesigənea̰ pa lé
Mbata yeḛ pata wɔji ne dɔ meelɔm
Ar koso-dəwje ləa ləm, gə majikojije ləa ləm tɔ
Mba kar dee tel d’oso ne dan néra mbə’g gogo el.
10 Oiyo, deḛ gə́ ɓəlee lé ndá
Kaji ləa to mbɔr dee’g dəb ya
Gə mba kar rɔnduba ləa to ne mee ɓee’g lə sí lé.
11 Meemaji gə meenda londoŋ d’iŋga na̰ ləm,
Meekarabasur gə meelɔm d’wa na̰ rib ləm tɔ.
12 Meenda londoŋ uba dɔ naŋg nee
Ndá meekarabasur gə́ to dan dara’g lé
Ila kəmee oo tɔ.
13 Njesigənea̰ nja ɓa ar sí j’isi dan maji’g,
Bèe ɓa dɔ naŋg lə sí a kinja gə kandə néje ya.
14 Meekarabasur lé a njaa nea̰’g ləm,
A kar tor gɔleeje to rəbə ləm tɔ.
© Ngambai Bible © Alliance Biblique du Tchad 1989, 2015.
