ALA MAN REA AR ISRAƐLJE
Ala unda manrɔ no̰ Israɛlje’g
1 Mee naḭ gə́ njekɔm’g munda gə́ orè goo kunda gə́ deḛ d’unda loo mee ɓee gə́ Ejiptə teḛ lé, mee ndəa’gən lé Israɛlje teḛ dɔdilaloo gə́ Sinai. 2 Mbata deḛ d’ḭ Repidim ndá deḛ teḛ dɔdilaloo gə́ Sinai, tɔɓəi deḛ d’isi dɔdilaloo’g waga, Israɛlje d’isi keneŋ waga mbɔr mbal’g lé ya. 3 Moyis tuga loo aw rɔ Ala’g lé, Njesigənea̰ ɓaree wəl par gə́ dɔ mbal’g tar pana: I a pa togə́bè kar ŋgaka Jakob gə́ to Israɛlje lé pana: 4 Seḭ ooje né gə́ m’ra gə njé gə́ Ejiptə ləm, gə goo rəw gə́ m’odo sí ne seḭ Israɛlje m’ree ne sə sí rɔm’g lé ləm tɔ. 5 Ɓasinè lé ɓó lé seḭ ooje ndum ləm, gə seḭ aarje dɔ ndu manrɔ’g ləm ləm tɔ ndá seḭ a toje dəwje ləm ma ya doŋgɔ mbuna dəwje’g lai mbata dɔ naŋg nee lai lé to kama ya , 6 seḭ a toje njékinjanéməsje gə́ gin sí to gə́ mbai ləm, a toje ginkoji dəwje gə́ toje gə kəmee ɓəd ləm tɔ. Yee ɓa gə́ ta gə́ i a kula Israɛlje ya .
7 Moyis tel ree ɓar ŋgatɔgje lə Israɛlje lai ndá yeḛ ndaji taje neelé lai ar dee, to gə́ Njesigənea̰ un ndia dɔ’g aree lé tɔ. 8 Koso-dəwje lai ya d’unda ndu dee na̰’d pana: Néje lai gə́ Njesigənea̰ pa taree lé j’a ra ya. Moyis lé tel ndaji ta lə koso-dəwje lé ar Njesigənea̰ tɔ. 9 Njesigənea̰ ula Moyis pana: Aa oo, m’a ree rɔi’g dan mum’d gə́ dəb bigim’g, mba kar dəwje d’oo ndum loo gə́ ma k’aar kwɔji səi ta ləm, gə mba kar dee d’ɔm ne mee dee dɔi’g ta-ta ləm tɔ. Ndá Moyis lé ndaji ta lə koso-dəwje lé ar Njesigənea̰ ya.
Ala iŋga Moyis dɔ mbal gə́ Sinai
10 Tɔɓəi Njesigənea̰ ula Moyis pana: Aw rɔ koso-dəwje’g neelé ar dee d’unda rɔ dee gə kəmee mba ndɔ gə́ ɓogənè gə bèlè ləm tɔ ndá maji kar dee togo kubuje lə dee tɔ. 11 Ndɔ gə́ njekɔm’g munda lé maji kar dee d’aar pèrèrè, mbata ndɔ gə́ njekɔm’g munda neelé Njesigənea̰ a kḭ tar kuru naŋg dɔ mbal gə́ Sinai kəm koso-dəwje’g lai. 12 I a kwɔji ŋgaŋ loo gə́ gugu dɔ mbal neelé kar dəwje ndá i a kula dee pana: Undaje kəmkàr dɔ rɔ sí’g gə mba kuba dɔ mbal neelé el ləm, əsé gə mba kɔrɔ rəa tèm el ləm tɔ. Nana ɓa gə́ ɔrɔ mbal neelé ndá d’a tɔlee gə́ tɔl ya . 13 D’a kɔrɔ rɔ debee neelé gə ji dee el nɛ d’a tilá gə kɔri-ər əsé d’a kuree gə ɓandaŋg ɓa, lé to da əsé dəw kara yeḛ a si kəmba el. Loo gə́ ndu to̰to̰ a ɓar ndá deḛ d’a rəm gə́ mbɔr mbal’g lé dəb ya.
14 Moyis ḭ dɔ mbal’g risi ur naŋg aw rɔ koso-dəwje’g lé, yeḛ ar koso-dəwje lé d’unda rɔ dee gə kəmee ləm gə togo kubuje lə dee ləm tɔ. 15 Yeḛ ula koso-dəwje lé pana: síje pèrèrè mee ndɔ gə́ njekɔm’g munda lé tɔɓəi seḭ a tibije mbɔr dené kára kara el tɔ.
16 Ndɔ gə́ njekɔm’g munda teḛ gə ndɔ lé ndi ndaŋg ləm, ndi tel ləma, ndi ḭ ŋgwɔḭ-ŋgwɔḭ ɔn dɔ mbal ləm tɔ, ndu to̰to̰ ɓar po̰-po̰, ar koso-dəwje lai gə́ d’isi loo-si dee’g neelé ɓəl unda dee badə gaŋg dee . 17 Moyis ar koso-dəwje d’ḭ loo-si dee’g neelé d’aw gə mba tila kəm Ala, deḛ d’aar loo-kaar dee’g kaar dee’g mbɔr mbal’g lé.
18 Mbal gə́ Sinai lé sa pər taa pəl-pəl mbata Njesigənea̰ ḭ tar ree uru naŋg keneŋ dan pər’g, sa pər neelé uba ŋgɔg-ŋgɔg asəna gə sa pər mbo-boo bèe ndá mbal neelé bura ya yə ɓugu-ɓugu. 19 Ndu to̰to̰ lé ɓar pénéné-pénéné. Moyis pata ndá Ala ilá keneŋ gə ndia gə́ boi wəl.
20 Togə́bè ɓa Njesigənea̰ ḭ tar ree ur dɔ mbal gə́ Sinai’g, dɔ sém mbal gə́ tar, Njesigənea̰ ɓar Moyis gə́ dɔ sém mbal gə́ tar. Ndá Moyis al aw ya. 21 Njesigənea̰ ula Moyis pana: Risi ur naŋg, ɔg dəwje rədədə mba kar dee nar na̰ loo mba teḛ ne rɔ Njesigənea̰’g mba koo loo, nà banelə njé gə́ na̰je bula mbuna dee’g d’a tuji ne. 22 Maji kar njékinjanéməsje gə́ d’a gə rəm pər gə́ rɔ Njesigənea̰’g lé d’unda rɔ dee gə kəmee nà banelə Njesigənea̰ a tɔl dee.
23 Moyis ula Njesigənea̰ pana: Koso-dəwje neelé d’a kaskəm kuba dɔ mbal gə́ Sinai lé el mbata i ɔg sí dɔ’g rədədə pana: Maji kam m’wɔji ŋgaŋ loo m’gugu ne dɔ mbal ndá m’unda gə kəmee ɓa.
24 Njesigənea̰ ulá pana: Risi ur naŋg ya, gée gə́ gogo seḭ gə Aaro̰ a kubaje dɔ mbal lé na̰’d, nɛ njékinjanéməsje gə koso-dəwje lé maji kar dee nar na̰ loo ɓa gə mba teḛ rɔ Njesigənea̰’g el nà banelə yeḛ a tɔl dee ya.
25 Moyis risi ur naŋg aw rɔ koso-dəwje ndá ula dee ta néje neelé tɔ.
© Ngambai Bible © Alliance Biblique du Tchad 1989, 2015.
