Akajia tel to mbai gə́ Juda
2Mb 8.25-29, 2Mb 9.27-291 Dəwje gə́ Jerusalem d’ar Akajia, ŋgolə Joram gə́ ndɔḭ ɓa o̰ ɓee toree’g mbata kudu-njérɔje gə́ ree gə Arabə na̰’d loo-si dee’g lé tɔl ŋganeeje gə́ tɔg lai. Togə́bè ɓa Akajia, ŋgolə Joram, mbai gə́ Juda lé o̰ ne ɓee. 2 Akajia ra ləbee rɔ-sɔ-giree-joo ɓa yeḛ tel to mbai ndá yeḛ si Jerusalem o̰ ne ɓee ləb kára. Kea̰je rəa lə Atali, ŋgolə Ɔmri. 3 Yeḛ njaa goo rəw’g lə gel-bɔje lə Akab mbata kea̰je sulá gə taje gə́ yèr. 4 Yeḛ ra né gə́ majel kəm Njesigənea̰’g to gə́ gel-bɔje lə bɔbeeje gə́ Akab ra lé, loo gə́ goo kwəi’g lə bɔbeeje lé ndá njékwɔjitakəmkàrje ləa d’ulá taje gə́ kəm karee tuji ne rəa. 5 Taje lə dee ndɔree aree aw gə Joram, ŋgolə Akab, mbai gə́ Israɛl loo rɔ’g mba rɔ gə Ajael, mbai gə́ Siri mee ɓee gə́ Ramot dɔ naŋg gə́ Galaad. Ndá Aramje d’ar Joram doo. 6 Joram tel aw Jisreel gə mba kar dee tuŋga doo ləa gə́ Aramje d’aree Rama lé loo gə́ yeḛ aw rɔ ne gə Ajael, mbai gə́ Siri lé. Ajaria, ŋgolə Joram, mbai gə́ Juda aw Jisreel gə mba koo Joram, ŋgolə Akab mbata doo gə́ ar rəa tée ne lé.
7 Gə goo torndu Ala ɓa kaw gə́ Akajia aw rɔ Joram’g lé tel to ne tuji ləa. Loo gə́ yeḛ teḛ keneŋ ndá lé gə́ neelé yeḛ unda loo teḛ raga gə Joram na̰’d gə mba kar dee rɔ gə Jehu, ŋgolə Nimsi gə́ Njesigənea̰ wa dəa gə ubu mba karee ar gel-bɔje lə Akab d’udu guduru lé. 8 Nɛ loo gə́ Jehu si mba gaŋg rəwta dɔ mee kəi’g lə Akab lé yeḛ iŋga mbaije gə́ Juda ləm, gə ŋgalə ŋgako̰ Akajia gə́ to njéra kula kar Akajia ləm tɔ ndá yeḛ tɔl dee. 9 Yeḛ saŋg Akajia ndá deḛ d’wá Samari, loo-kiya-rəa’g. Deḛ d’aw səa rɔ Jehu’g, tɔɓəi deḛ tɔlee tɔ. Ndá deḛ dubee mbata deḛ pana: Yeḛ to ŋgolə Josapat gə́ to njendolè goo Njesigənea̰ gə meekarabasur lé ya. Ndá dəw kára kara gə́ mee kəi’g lə Akajia gə́ askəm ko̰ɓee lé godo.
Atali tel to mbai gə́ dené gə́ Juda
2Mb 11.1-310 Atali, ko̰ Akajiaje oo to gə́ ŋgonee wəi ndá yeḛ ḭ tɔl deḛ lai gə́ to ginkoji’g lə mbai gə́ Juda lé. 11 Nɛ Josabeat, ŋgolə mbai gə́ dené un Joas, ŋgolə Akajia dan ŋgalə mbai’g loo gə́ d’aw tɔl dee’g lé, yeḛ ilá ji njeŋgəmee’g mee kəi gə́ tiraje to keneŋ. Bèe ɓa Josabeat, ŋgolə Joram, mbai gə́ dené gə́ to dené lə Jeojoda yeḛ gə́ njekinjanéməs ləm, gə ko̰ kɔnan Akajiaje ləm tɔ lé unee iya kəm Atali’g aree lal tɔlee. 12 Deḛ d’iyá mbuna dee’g mee kəi’g lə Ala as ləb misa̰ gin ɓeeko̰’g lə Atali tɔ.
© Ngambai Bible © Alliance Biblique du Tchad 1989, 2015.
