Manrɔ ka̰ Jeju lé to manrɔ gə́ ur dɔ nje gə́ kédé
1 Ŋgaw dan ta gə́ jeḛ m’pa lé ɓa nee: Ŋgɔ-njekinjanéməs lə sí lé si gən, yeḛ si dɔ jikɔl Bao gə́ njesisémdara gə́ si kalimbai’g dan dara’g dana bab . 2 Yeḛ ra kula mee kəi-Ala gə́ to gə kəmee gə́ to kəi-kiŋga-na̰ gə́ gəd gə́ Mbaidɔmbaije ɓa unda ɓó ji dəw ɓa ra el.
3 Ŋgɔ-njekinjanéməs gə́ rara kara d’undá mba karee un nénojije gə nékoga-kaiyaje ar Ala, nɛ né kea̰-yeḛ kara yeḛ a kun kar Ala ya tɔ. 4 Ɓó lé yeḛ nai dɔ naŋg nee ndá yeḛ a to njekinjanéməs el mbata lé neelé deḛ d’un né d’ar Ala gə goo godndu lé ɓa. 5 Deḛ gə́ ra kula kwa Ala meḛ dee’g lé d’wa néje gə́ naŋg nee tɔji dee ne néje gə́ dara, gə goo né gə́ Ala tɔji Moyis loo gə́ yeḛ a gə la kəi-kubu-kiŋga-na̰ lé pana: Ra lɔr-lɔr to gə́ nékwɔji maree gə́ ma m’tɔjii dɔ mbal’g lé . 6 Nɛ ɓasinè lé Kristi iŋga mbai-kula gə́ ur dɔ yeḛ gə́ kédé mbata yeḛ to njekaar dana loo manrɔ gə́ maji ur dɔ nje gə́ kédé ləm, manrɔ neelé tum gelee dɔ ndukun gə́ maji undá ləm tɔ.
7 Tɔgərɔ ya, ɓó lé manrɔ gə́ dɔtar to puduru el ndá d’a saŋg njetaa toree el. 8 Mbata Mbaidɔmbaije oo Israɛlje gə́ njétareeje ɓa yeḛ ula dee pana:
Aa ooje, mee ndəa gə́ kàree a gə teḛ lé
M’a man rɔm sigi kar ɓee lə Israɛl gə ɓee lə Juda lé
Mbaidɔmbaije ɓa pa bèe .
9 Manrɔ gə́ sigi lé a to kasəna gə yeḛ gə́ ləw gə́ ma man ne rɔm m’ar bɔ deeje el.
To ndɔ gə́ m’wa ji dee wɔgədɔ m’ɔr dee Ejiptə’g m’teḛ sə dee
Mbata deḛ d’ai meḛ dee sam-sam dɔ manrɔ’g ləm el,
Bèe ɓa ma kara dɔm to̰ ne kəw el.
Mbaidɔmbaije ɓa pa bèe.
10 Aa ooje, man gə́ m’a man rɔm kar gel-bɔje lə Israɛlje
Loo gə́ ndɔje neelé dəs mba̰ ɓa nee:
M’a kula godndumje meḛ dee’g ləm,
M’a ndaŋg dee dɔɓəŋgərə dee’g ləm tɔ.
Mbaidɔmbaije ɓa pa bèe.
N’a to Ala lə dee ləm,
Deḛ kara d’a to koso-dəwje neḛ ləm tɔ.
11 Dəw kára kara a ndoo maree əsé ŋgokea̰ pana:
Maji kar sí gərje Mbaidɔmbaije, a pa bèe el ŋga,
Mbata deḛ lai d’a gərm təsərə,
Un kudee dɔ dəwje gə́ gɔ-gɔ saar teḛ ne dɔ deḛ gə́ boo-boo mbuna dee’g ya.
12 Mbata məəm a koso lemsé dɔ néra dee gə́ ndɔji pɔdɔdɔ’g ləm,
M’a kar məəm olé dɔ kaiyaje’g lə dee nda̰ el ləm tɔ.
13 Loo gə́ yeḛ pana: Manrɔ gə́ sigi lé yeḛ ar yeḛ gə́ dɔtar lé to né gə́ ləw. Tɔɓəi né gə́ ləw gə́ a gə ŋgisi lé nai lam ba a sané pá. Tɔɓəi né gə́ ləw gə́ a gə ŋgisi lé nai lam ba a sané pá.
© Ngambai Bible © Alliance Biblique du Tchad 1989, 2015.
