1 Njesigənea̰ un ta ula Jehu, ŋgolə Hanani mba karee ula Basa ta nee pana: 2 Ma m’ɔree mee nduji naŋg’d ɓa m’undá gə́ mbai dɔ koso-dəwje’g ləm gə́ Israɛl, nɛ yeḛ un dɔ gɔl Jeroboam ləm, yeḛ ar koso-dəwje ləm gə́ Israɛl ra kaiya ləm tɔ gə mba kar məəm ḭ ne səm pu dɔ kaiyaje’g lə dee. 3 Aa oo, m’a gə kar Basa gə njémeekəije ləa godo péd ndá m’a kar kəi ləa tel to asəna gə kəi lə Jeroboam, ŋgolə Nebat bèe. 4 Yeḛ gə́ rara gə́ mee kəi’g lə Basa gə́ a kwəi mee ɓee-boo’g ndá bisije ɓa d’a kusá, tɔɓəi yeḛ gə́ rara gə́ mee kəi’g ləa ɓa gə́ a kwəi mee wala’g ndá kara yelje ɓa d’a ko̰ yée tɔ.
5 Ges sor-néraje lə Basa gə néje gə́ yeḛ ra ləm, gə siŋgamoŋ ləa ləm tɔ lé, see ndaŋg taree mee Maktub-sorta néraje’g lə mbaije gə́ Israɛl el wa. 6 Basa wəi ndá deḛ dubee Tirsa tɔ. Ndá ŋgonee Ela ɓa o̰ ɓee toree’g ya.
7 Ta lə Njesigənea̰ teḛ gə ndu njetegginta Jehu, ŋgolə Hanani, ɔs ne Basa gə gel-bɔje ləa rəw mbata némajelje lai gə́ yeḛ ra kəm Njesigənea̰’d gə́ ar mée ḭ səa pu dəa’g gə goo kula reaje gə́ yeḛ ra tel to ne tana gə gel-bɔje lə Jeroboam ləm, mbata tuji gə́ yeḛ tuji ne gel-bɔje lə Jeroboam lé ləm tɔ.
Ela, mbai gə́ Israɛl
8 Ləb ko̰ɓee lə Asa, mbai gə́ Juda gə́ njekɔm’g rɔ-joo-giree-misa̰ lé ɓa Ela, ŋgolə Basa un kudu ko̰ ne Israɛlje, yeḛ si ɓee gə́ Tirsa o̰ ne ɓee as ləbee joo. 9 Kura ləa Jimri, mbai dɔ ges njékṵda-pusu-rɔje ləa lé ula njuma̰ mee mareeje’g ɔsee ne rəw. Ela lé si ɓee gə́ Tirsa, mee kəi’g lə Arsa gə́ to mbai dɔ njékulaje gə́ mee kəi’g lə mbai gə́ to Tirsa lé ndá, yeḛ ai kido aree tɔlee ilá keneŋ, 10 ndá Jimri andə aw dəa’g aw tɔlee. Yeḛ tɔlee mee ləb gə́ njekɔm’g rɔ-joo-giree-siri gə́ Asa to ne mbai gə́ Juda lé ndá, yeḛ o̰ ɓee toree’g tɔ. 11 Loo gə́ yeḛ tel to mbai si ne dɔ kalimbai’g ləa mba̰ ndá yeḛ tɔl gel-bɔje lə Basa lai ya̰ dəw ləa əsé njénoji ləa əsé baokura ləa kára kara kəmba el. 12 Jimri tuji gel-bɔje lə Basa lai gə goo ta gə́ Njesigənea̰ pa wɔji ne dɔ Basa gə ndu njetegginta Jehu lé 13 mbata kaiyaje lai gə́ Basa gə ŋgonee Ela ra ləm, gə d’ar Israɛlje ra ləm tɔ lé, d’ar mee Njesigənea̰, Ala lə Israɛlje ḭ ne səa pu mbata magəje lə dee ya.
14 Ges sor-néraje lə Ela, gə néje lai gə́ yeḛ ra lé see deḛ ndaŋg taree mee Maktub-sorta néraje’g lə mbaije gə́ Israɛl lé el wa.
Jimri, mbai gə́ Israɛl
15 Ləb gə́ njekɔm’g rɔ-joo-giree-siri gə́ Asa to ne mbai gə́ Juda lé ɓa Jimri si ɓee gə́ Tirsa o̰ ne ɓee ndəa siri. Njérɔje gugu dɔ Gibeto̰ gə́ to ɓee lə Pilistije sub gə mba rɔ ne səa. 16 Njérɔje gə́ d’isi gugu dɔ ɓee sub lé d’oo sorta njuma̰ lə Jimri ləm, gə tɔl gə́ yeḛ tɔl mbai ləm tɔ ndá, mee ndəa’g neelé ya njérɔje gə́ Israɛl lai gə́ d’isi loo-si dee’g lé d’un Ɔmri, ɓé-njérɔje ɓa d’undá gə́ mbai lə Israɛlje ya. 17 Ɔmri gə njérɔje gə́ Israɛl lai d’ḭ Gibeto̰ ndá d’aw d’aḭ dɔ ɓee gə́ Tirsa sub gə rɔ tɔ. 18 Jimri oo to gə́ deḛ taa ɓee-boo lé mba̰ ndá yeḛ aw mee kəi-mbai’d gə́ wɔji dɔ mbai, tɔɓəi yeḛ nja ila pər dəa’g tɔ. 19 Gelee gə́ nee ɓa yeḛ wəi ne mbata kaiyaje gə́ yeḛ ra loo gə́ yeḛ ra ne néje gə́ majel kəm Njesigənea̰’g, un ne dɔ gɔl Jeroboam ya̰ ne rəa yag dan kaiyaje gə́ Jeroboam ra ləm, gə ar Israɛlje kara ra ləm tɔ.
20 Ges sor-néraje lə Jimri ləm, gə njuma̰ kula ləa ləm tɔ lé see ndaŋg taree mee Maktub-sorta néraje’g lə mbaije gə́ Israɛl lé el wa.
21 Gée gə́ gogo koso-dəwje gə́ Israɛl kai na̰ loo joo: ges dəwje gə́ na̰je ndigi kar Tibni, ŋgolə Ginat ɓa tel to mbai lə dee nɛ ges deḛ gə́ raŋg to ka̰ Ɔmri tɔ. 22 Deḛ gə́ d’ɔm goo Ɔmri’g lé bula d’unda deḛ gə́ d’ɔm goo Tibni, ŋgolə Ginat’g lé. Tibni wəi ndá Ɔmri ɓa o̰ ɓee tɔ.
Ɔmri, mbai gə́ Israɛl
23 Ləb ko̰ɓee lə Asa, mbai gə́ Juda gə́ njekɔm’g rɔ-munda-giree-kára lé ɓa Ɔmri un kudu ko̰ ne ɓee dɔ Israɛlje’g. Yeḛ o̰ ɓee as ləb dɔg-giree-joo. Loo gə́ yeḛ si ɓee gə́ Tirsa o̰ ne ɓee as ləb misa̰ mba̰ ndá, 24 yeḛ ndogo gə Semer dɔ mbal gə́ Samari kəm larnda tɔl-dɔg-loo-misa̰ (6.000), yeḛ unda ɓee-boo dɔ mbal’g ləm, unda ri Samari ɓa dɔ ɓee-boo’g neelé gə goo ri Semer gə́ to mbai dɔ mbal’g neelé ləm tɔ. 25 Ɔmri ra né gə́ majel kəm Njesigənea̰’g, yeḛ ra némajel unda dee-deḛ lai gə́ d’isi nea̰’g kédé ya. 26 Yeḛ un dɔ gɔl Jeroboam, ŋgolə Nebat lad-lad ləm, yeḛ ya̰ rəa yag dan kaiyaje gə́ Jeroboam ar Israɛlje kara ra d’ar mee Njesigənea̰, Ala lə Israɛlje lé ḭ ne səa pu dɔ dee’g mbata magəje lə dee lé ləm tɔ.
27 Ges sor-néraje lə Ɔmri, gə nésiŋgamoŋje ləa gə́ yeḛ ra lé see deḛ ndaŋg taree mee Maktub-sorta néraje’g lə mbaije gə́ Israɛl lé el wa. 28 Ɔmri wəi ar dee dubee Samari ndá, ŋgonee gə́ Akab ɓa o̰ ɓee toree’g tɔ.
Akab, mbai gə́ Israɛl
29 Akab, ŋgolə Ɔmri un kudu ko̰ɓee dɔ Israɛlje’g mee ləb ko̰ɓee’g lə Asa, mbai gə́ Juda gə́ njekɔm’g rɔ-munda-giree-jinaijoo lé. Akab, ŋgolə Ɔmri si Samari o̰ ɓee dɔ Israɛlje’g as ləbee rɔ-joo-giree-joo. 30 Akab, ŋgolə Ɔmri ra né gə́ majel kəm Njesigənea̰’g unda dee-deḛ lai gə́ d’isi nea̰’g kédé lé. 31 Kula gə́ yeḛ ula rəa mbiriri dan kaiyaje’g lə Jeroboam, ŋgolə Nebat lé yeḛ oo gə́ né gə́ lam ba bèe ndá yeḛ aw taa Jejabel, ŋgolə Etbaal, mbai gə́ Sido̰ gə́ dené ləa, tɔɓəi yeḛ pole magə-Baal ləm, yeḛ unda barmba dəb kəmee naŋg nea̰’g ləm tɔ. 32 Yeḛ unda loo-nékinjaməs lə Baal mee kəi’g lə Baal gə́ yeḛ unda Samari lé ləm, 33 yeḛ ra kag-magə gə́ ɓaree Asera ləm tɔ. Akab lé ra majel aree ur dɔ néra mbaije gə́ Israɛl gə́ d’isi nea̰’g kédé lé lai ya tɔɓəi, ar mee Njesigənea̰ Ala lə Israɛlje ḭ ne səa pu dəa’g tɔ.
34 Mee ndəa’g ləa lé Hiel gə́ to dəw gə́ Betel tel tum gin Jeriko gogo. Ndɔ gə́ yeḛ tum ne ginee lé Abiram gə́ to ŋgondəree lé wəi ləm, ndɔ gə́ tɔl ne kula lé kara ŋgonee gə́ ndɔḭ gə́ ria lə Segub lé wəi ləm tɔ gə goo ta gə́ Njesigənea̰ pa gə rəw gə́ rɔ Juje, ŋgolə Nun’g lé ya .
© Ngambai Bible © Alliance Biblique du Tchad 1989, 2015.
