Dəb looje lə ginkojije gə́ par gə́ dɔgel lé
1 Aa oo, ri ginkojije lé ɓa nee: Ginkoji Danje d’a kiŋga dəb loo kára un kudee rudu loo gə́ dɔgel ɓa dəs gə́ rəw gə́ ḭ Hetlon mba teḛ Amat gə Hasar-Enon ləm, gə rəw-nim-ɓee gə́ Damas gə́ to par gə́ dɔgel lə Amat ləm tɔ un kudee bər saar teḛ dɔ-gó ləm tɔ. 2 Ginkoji Aserje d’a kiŋga dəb loo kára mbɔr rəw-nim’g lə Danje un kudee bər saar teḛ dɔ-gó. 3 Ginkoji Neptalije d’a kiŋga dəb loo kára mbɔr rəw-nim’g lə Aserje un kudee bər saar teḛ dɔ-gó. 4 Ginkoji Manasəje d’a kiŋga dəb loo kára mbɔr rəw-nim’g lə Neptalije un kudee bər saar teḛ dɔ-gó. 5 Ginkoji Eprayimje d’a kiŋga dəb loo kára mbɔr rəw-nim’g lə Manasəje un kudee bər saar teḛ dɔ-gó. 6 Ginkoji Rubḛje d’a kiŋga dəb loo kára mbɔr rəw-nim’g lə Eprayimje un kudee bər saar teḛ dɔ-gó. 7 Ginkoji Judaje d’a kiŋga dəb loo kára mbɔr rəw-nim’g lə Rubḛje un kudee bər saar teḛ dɔ-gó.
Dəb loo gə́ ka̰ Njesigənea̰
8 Mbɔr rəw-nim’g lə Judaje un kudee bər saar teḛ dɔ-gó lé a to loo gə́ seḭ a kya̰je kar tadee as kəmkil dəw tɔl-dɔg-loo rɔ joo giree-mi (25.000) ləm, ŋgalee a kasəna gə dəb loo gə́ kára un kudee bər saar teḛ dɔ-gó ləm tɔ, ndá loo gə́ to gə kəmee a to dana bab. 9 Dəb loo gə́ seḭ a kundaje gə kəmee mbata lə Njesigənea̰ lé ŋgalee a k’as kəmkil dəw tɔl-dɔg-loo rɔ joo giree-mi (25.000) ləm, tadee a k’as kəmkil dəw tɔl-dɔg-loo dɔg (10.000) ləm tɔ. 10 Dəb loo gə́ to gə kəmee neelé a to ka̰ njékinjanéməsje, debee gə́ dɔgel as kəmkil dəw tɔl-dɔg-loo rɔ joo giree-mi (25.000) ləm, tadee gə́ par gə́ dɔ-gó as kəmkil dəw tɔl-dɔg-loo dɔg (1.000) ləm, tadee gə́ par gə́ bər as kəmkil dəw tɔl-dɔg-loo dɔg (10.000) ləma, ŋgalee gə́ par gə́ dɔkɔl as kəmkil dəw tɔl-dɔg-loo rɔ joo giree-mi (25.000) ləm tɔ, ndá loo lə Njesigənea̰ gə́ to loo gə́ to gə kəmee lé a to dana bab. 11 Dəb loo neelé a to ka̰ njékinjanéməsje gə́ d’unda dee gə kəmee gə́ to gel-bɔje lə Sadɔk gə́ d’aar njaŋg ra ne kula mee loo’g lə neḛ gə́ to gə kəmee ɓó deḛ d’uba Ala d’yá̰ mee ndəa gə́ Israɛlje d’ubá d’yá̰ bèe lé el. 12 Dəb ɓee neelé a to loo gə́ to gə kəmee doi gə́ gaŋg debee loo gə́ d’ar Ləbije ləm, a to mbɔr rəw-nim’g lə Ləbije ləm tɔ. 13 Ləbije d’a kiŋga loo ka̰ dee karee wa boa ta na̰ gə ka̰ njékinjanéməsje ndá ŋgalee a k’as kəmkil dəw tɔl-dɔg-loo rɔ joo giree-mi (25.000) ləm, tadee a kaskəm kəmkil dəw tɔl-dɔg-loo dɔg (10.000) ləm tɔ, ŋgalee lai a k’as kəmkil dəw tɔl-dɔg-loo rɔ joo giree-mi (25.000) ləm, tadee a k’as kəmkil dəw tɔl-dɔg-loo dɔg (10.000) ləm tɔ. 14 Deḛ d’a kaskəm ndogo el ləm, d’a mbél ne maree el ləma, kandə néje gə́ dɔtar gə́ mee ɓee’g neelé d’a kar njé gə́ raŋg el ləm tɔ mbata to néje gə́ d’unda gə kəmee d’ar Njesigənea̰ ya.
Dəb loo gə́ wɔji dɔ ɓee-boo gə mbai gə́ njeɓee lé
15 Ges loo gə́ a nai gə́ tadee as kəmkil dəw tɔl-dɔg-loo-mi (5.000) ləm, ŋgalee a k’as kəmkil dəw tɔl-dɔg-loo rɔ joo giree-mi (25.000) ləm tɔ lé d’a kya̰ karee wɔji dɔ ɓee-boo mba ra kəije keneŋ ləm, karee to ŋgaŋ loo gə́ gugu dəa’g ləm tɔ, tɔɓəi ɓee-boo a to dana bab. 16 Aa oo, loo kwɔjee ɓa nee: Dəb loo gə́ dɔgel a k’as kəmkil dəw tɔl-dɔg-loo sɔ gə dəa tɔl-mi (4.500) ləm, dəb loo gə́ par gə́ dɔkɔl a k’as kəmkil dəw tɔl-dɔg-loo sɔ gə dəa tɔl-mi (4.500) ləm, dəb loo gə́ bər a k’as kəmkil dəw tɔl-dɔg-loo sɔ gə dəa tɔl-mi (4.500) ləma, dəb loo gə́ dɔ-gó a k’as kəmkil dəw tɔl-dɔg-loo sɔ gə dəa tɔl-mi (4.500) ləm tɔ. 17 Ɓee-boo lé loo gə́ ŋgaŋgee’g par gə́ dɔgel a k’as kəmkil dəw tɔl-joo gə dəa rɔ-mi (250) ləm, par gə́ dɔkɔl a k’as kəmkil dəw tɔl-joo gə dəa rɔ-mi (250) ləm, par gə́ bər a k’as kəmkil dəw tɔl-joo gə dəa rɔ-mi (250) ləma, par gə́ dɔ-gó a k’as kəmkil dəw tɔl-joo gə dəa rɔ-mi (250) ya ləm tɔ. 18 Ges loo gə́ ŋgalee wa boa ta loo gə́ to gə kəmee gə́ as kəmkil dəw tɔl-dɔg-loo dɔg (10.000) par gə́ bər ləm, gə as kəmkil dəw tɔl-dɔg-loo dɔg (10.000) par gə́ dɔ-gó ləm tɔ lé a kwa boa ta loo gə́ to gə kəmee. Lée neelé ɓa a to loo kiŋga nésɔ lə deḛ gə́ ra kula mee ɓee-boo’g lé. 19 Deḛ lai gə́ ginkoji dee to Israɛlje gə́ d’a gə ra kula mee ɓee-boo’g lé ɓa d’a ndɔ-ndɔ keneŋ. 20 Dəb loo gə́ wɔji dɔ Njesigənea̰ lé ŋgalee a k’as kəmkil dəw tɔl-dɔg-loo rɔ joo giree-mi (25.000) ləm, tadee a k’as kəmkil dəw tɔl-dɔg-loo rɔ joo giree-mi (25.000) ləm tɔ, seḭ a gaŋgje loo kar ŋgalee gə tadee asəna mba karee to wɔji dɔ ɓee-boo. 21 Dəb loo gə́ nai lé a to ka̰ mbai gə́ njeɓee lé, debee gə́ joo mbɔr loo gə́ to gə kəmee’g ləm, gə loo gə́ wɔji dɔ ɓee-boo ləm tɔ lé ŋgalee a kwa boa ta loo gə́ to gə kəmee un kudee rəw-nim gə́ bər saar teḛ rəw-nim gə́ dɔ-gó as kəmkil dəw tɔl-dɔg-loo rɔ joo giree-mi (25.000) ləm, ŋgalee a kwa boa ta dəb looje par gə́ rəw-nim gə́ dɔ-gó as kəmkil dəw tɔl-dɔg-loo rɔ joo giree-mi (25.000) ləm tɔ. Loo neelé a to loo gə́ wɔji dɔ mbai gə́ njeɓee, ndá dəb loo gə́ to gə kəmee ləm, gə loo gə́ to gə kəmee doi gə́ wɔji dɔ kəi-Ala ləm tɔ lé d’a to dana bab. 22 Togə́bè ɓa loo gə́ a to ka̰ mbai gə́ njeɓee lé a to loo gə́ un kudee dɔ ka̰ Ləbije’g ləm, gə un kudee dɔ loo gə́ to ka̰ ɓee-boo lé ləm tɔ, loo gə́ a to mbuna rəw-nim loo’g lə Judaje gə rəw-nim loo’g lə Bḛjamije lé a to ka̰ mbai gə́ njeɓee.
Dəb loo gə́ wɔji dɔ ginkojije gə́ par gə́ dɔkɔl
23 Aa oo, ges ginkojije gə́ nai lé ɓa nee: Ginkoji Bḛjamije d’a kiŋga dəb loo kára un kudee bər saar teḛ dɔ-gó. 24 Ginkoji Simeo̰je d’a kiŋga dəb loo kára mbɔr rəw-nim’g lə Bḛjamije un kudee bər saar teḛ dɔ-gó. 25 Ginkoji Isakarje d’a kiŋga dəb loo kára mbɔr rəw-nim’g lə Simeo̰je un kudee bər saar teḛ dɔ-gó. 26 Ginkoji Jabilo̰je d’a kiŋga dəb loo kára mbɔr rəw-nim’g lə Isakarje un kudee bər saar teḛ dɔ-gó. 27 Ginkoji Gadje d’a kiŋga dəb loo kára mbɔr rəw-nim’g lə Jabilo̰je un kudee bər saar teḛ dɔ-gó. 28 Mbɔr rəw-nim’g lə Gadje par gə́ bər saar dɔkɔl lé rəw-nim ɓee a kḭ Tamar kaw saar teḛ manje gə́ Meriba gə́ to Kades ləm, saar teḛ kəm-rəw-mán gə́ to par gə́ baa-boo-kad’g lé ləm tɔ. 29 Yee ɓa to ɓee gə́ seḭ a kaije gə goo nékwɔji lée gə́ to asəna gə téḛ bèe kar ginkoji Israɛlje gə́ né ka̰ dee-deḛ, looje neelé ɓa to debeeje gə́ wɔji dɔ dee dɔ dee, Mbaidɔmbaije gə́ Njesigənea̰ ɓa pa bèe.
Tarəwkɔgje gə́ Jerusalem gə́ dɔg-giree-joo
30 Aa ooje, rəwje gə́ ka̰ kandə ne mee ɓee-boo’g lé ɓa nee: Dəb loo gə́ par gə́ dɔgel gə́ as kəmkil dəw tɔl-dɔg-loo sɔ gə dəa tɔl-mi (4.500) lé 31 tarəwkɔgje lə ɓee gə goo ri ginkoji Israɛlje d’a to keneŋ ndá tarəwkɔgje munda d’a to par gə́ dɔgel: tarəwkɔg gə́ to gə ri Rubḛ ləm, tarəwkɔg gə́ to gə ri Juda ləma, tarəwkɔg gə́ to gə ri Ləbi ləm tɔ. 32 Dəb loo gə́ par gə́ bər gə́ as kəmkil dəw tɔl-dɔg-loo sɔ gə dəa tɔl-mi (4.500) lé tarəwkɔgje munda d’a to keneŋ: tarəwkɔg gə́ to gə ri Jisəb ləm, tarəwkɔg gə́ to gə ri Bḛjami ləma, gə tarəwkɔg gə́ to gə ri Dan ləm tɔ. 33 Dəb loo gə́ par gə́ dɔkɔl gə́ as kəmkil dəw tɔl-dɔg-loo sɔ gə dəa tɔl-mi (4.500) lé tarəwkɔgje munda d’a to keneŋ: tarəwkɔg gə́ to gə ri Simeo̰ ləm, tarəwkɔg gə́ to gə ri Isakar ləma, gə tarəwkɔg gə́ to gə ri Jabulo̰ ləm tɔ. 34 Dəb loo gə́ par gə́ dɔ-gó gə́ as kəmkil dəw tɔl-dɔg-loo sɔ gə dəa tɔl-mi (4.500) lé tarəwkɔgje munda d’a to keneŋ: tarəwkɔg gə́ to gə ri Gad ləm, tarəwkɔg gə́ to gə ri Aser ləma, gə tarəwkɔg gə́ to gə ri Neptali ləm tɔ. 35 Loo gə́ gugu dəa as kəmkil dəw tɔl-dɔg-loo dɔg giree-jinaijoo (18000).
Bèe ɓa un kudee mee ndəa’g neelé, ɓee-boo neelé d’a ɓaree pana: Njesigənea̰ si loo gə́ nee ya.
© Ngambai Bible © Alliance Biblique du Tchad 1989, 2015.
