Pa kɔr sor némeemajije lə Ala
1 Pakɔs lə Dabid.
M’ɔs gajii gə ŋgaw məəm bura ləm,
Pa kila riɓar dɔi’g lé
Ma m’ɔs nɔḭ’g ləm tɔ.
2 Ma m’unda barmba mee kəi’g ləi gə́ to gə kəmee doi lé ləm,
Ma m’unda no̰ rii mbata meemaji ləi gə meenda londoŋ ləi ləm tɔ.
Mbata rii lé ɓar gə loo mbidi-mbidi
Gə goo ndukunje ləi gə́ i ar dee d’aw lée’g béréré lé.
3 Mee ndɔ gə́ m’ɓar ne rii lé
I ilam keneŋ am ne né gə́ m’aw ndée ya,
I ula diŋgam məəm’g ləm, ar siŋgam ḭ dɔ maree’g ləm tɔ.
4 Ǝi Njesigənea̰, mbaije lai gə́ dɔ naŋg nee
D’a pidii loo gə́ d’oo taje gə́ teḛ tai’g lé!
5 D’a kila riɓar dɔ néraje’g lə Njesigənea̰ lé
Mbata rɔnduba lə Njesigənea̰ lé to rɔnduba gə́ boo.
6 Njesigənea̰ lé si tar sab,
Nɛ yeḛ ila kəmee oo ne deḛ gə́ d’ula dɔ dee ləm,
Deḛ gə́ to gə́ njébeeleje lé loo gə́ deḛ nai əw ya ɓəi ndá
Yeḛ gər dee gao ya ləm tɔ.
7 Loo gə́ ma m’isi dan néurti’g lé
I nja am m’isi kəmba ləm,
I ula jii ndiŋ ɔg ne njéba̰je ləm dɔ oŋg’g lə dee ləma,
Jikɔli ɓa i ajim ne ləm tɔ.
8 Njesigənea̰ a ra néje lai karee maji am,
Njesigənea̰, meemaji ləi lé to saar gə no̰.
Néje gə́ i ra gə jii lé maji kari uba dee ya̰ dee el.
© Ngambai Bible © Alliance Biblique du Tchad 1989, 2015.
