Dabid ar dee tura koso-dəwje mba gər ne bula lə dee
2Sam 24.1-91 Njekurai ḭ oma̰ gə Israɛlje ndá yeḛ ɔs Dabid ɓɔḭ-ɓɔḭ aree ar dee tura Israɛlje mba gər ne bula lə dee. 2 Dabid ula Joab gə njékaa dɔ koso-dəwje lé pana: Awje aw turaje Israɛlje mba gər bula lə dee un kudee Beer-Seba saar teḛ ne Dan ndá reeje ne amje m’oo.
3 Joab ula mbai pana: Maji kar Njesigənea̰ ar bula lə koso-dəwje ləi ḭ dɔ maree’g as gɔl tɔl (100)! Ǝi mbai ləm, see deḛ lai neelé to kuraje lə mbai ləm el wa. Nɛ see gelee ban ɓa mbai ləm dəji togə́bè wa. See gelee ban ɓa i ar Israɛlje ra kaiya gə́ togə́bè wa.
4 Mbai lé aar njaŋg dɔ ndukun’g ləa gə́ yeḛ un ar Joab lé. Ndá Joab aw gə mee ɓeeje lai gə́ Israɛl, tɔɓəi yeḛ tel ree Jerusalem tɔ. 5 Joab ar Dabid oo bula lə koso-dəwje gə́ tura dee lé ndá mee ɓee’g lə Israɛlje lé njérɔ gə kiambasje d’as tɔl-dɔg-loo-tɔl-dɔg-giree-kára ləm (111.000), njé gə́ Juda gə́ to njérɔ gə kiambasje d’as tɔl-dɔg-loo-tɔl-sɔ gə dəa rɔ-siri (400.070) ləm tɔ.
6 Joab tura Ləbije gə Bḛjamije mbuna dee’g el mbata ndukun lə mbai lé to né gə́ majel yaa̰ kəmee’g.
Ala ar bo̰ néra Dabid ɔs ta Israɛlje’g
2Sam 24.10-177 Ndukun neelé taa kəm Ala el ndá yeḛ ar bea̰ ɔs ta Israɛlje’g tɔ. 8 Bèe ɓa Dabid ula Ala pana: Ma ɓa m’ra kaiya gə́ boo loo gə́ m’ra né neelé. Ɓasinè, maji kari ar məəi oso lemsé dɔ néra kori-kori’g lə kura ləi mbata né gə́ m’ra lé to némbə ya!
9 Njesigənea̰ ula Gad gə́ njetegginta lə Dabid ta togə́bè pana: 10 Aw ula Dabid pana: Njesigənea̰ pa togə́bè pana: M’unda nékəmndooje munda nɔḭ’g, I mbər yee gə́ kára dan dee’g ndá m’a kula ne kəmi ndòo.
11 Gad aw rɔ Dabid’g ndá ulá pana: Njesigənea̰ pa togə́bè pana: 12 See i ndigi kar ɓoo-boo oso as ləb munda, əsé i ndigi kar njéba̰je ləi tujii gə kiambas mee naḭ gə́ munda’g əsé i ndigi kar kiambas lə Njesigənea̰ gə yoo-koso oso mee ɓee’g ləi ar kura lə Njesigənea̰ ree gə tuji-boo dɔ naŋg’d lə Israɛlje lai mee ndɔ gə́ munda’g wa. Ɓasinè maji kari mbər yee gə́ i ndigi mba kam m’tel m’aw m’ula yeḛ gə́ njekulam lé tɔ.
13 Dabid tel ila Gad keneŋ pana: Ma m’isi dan boo-nékəmndoo’g! Wai, maji kam m’oso meḛ ji Njesigənea̰’g ɓa mbata meekaw taḭ-taḭ ləa al dɔ loo sula, nɛ maji kam m’oso meḛ ji dəwje’g ba el!
14 Njesigənea̰ ula gə yoo-koso mee ɓee gə́ Israɛl ndá dəwje gə́ d’wəi mee ɓee gə́ Israɛl lé d’as tɔl-dɔg-loo rɔ-siri (70.000). 15 Ala ula kura gə́ dara Jerusalem gə mba tujee, ndá loo gə́ yeḛ aar tujee bèe lé Njesigənea̰ ar goo takə̰ji ləa yɔr dɔ némajel’g neelé tɔɓəi yeḛ ula kura gə́ dara gə́ njetuji dee lé pana: As ŋga! Rəm gə jii gə́ rɔi’g ɓasinè.
Kura lə Njesigənea̰ gə́ dara lé aar mbɔr loo-kunda-kó’g lə Ornan, dəw gə́ Yebus tɔ. 16 Dabid un kəmee oo kura gə́ dara gə́ aar mbuna dara gə naŋg nee’g. Kiambas gə́ yeḛ ɔr sɔlee’g to jia’g ula par gə́ Jerusalem. Yen ŋga Dabid gə ŋgatɔgje d’ula kubu-kwa-ndòo rɔ dee’g d’oso bəbərə dəb ne kəm dee naŋg. 17 Ndá Dabid ula Ala pana: See to ma ɓa gə́ njekun ndum kar dee tura koso-dəwje mba gər ne bula lə dee lé el wa. To ma nja m’ra kaiya gə m’ra majel neelé, nɛ koso-dəwje neelé ɗi ɓa deḛ ra wa. Njesigənea̰, Ala ləm, maji kar jii wɔi dɔm-ma’g gə dɔ gel-bɔje’g lə bɔm ɓó gə kar yoo-koso neelé ɔr dɔ koso-dəwje’g ləi.
Dabid ra loo-nékinjaməs ar Njesigənea̰
2Sam 24.18-2518 Kura lə Njesigənea̰ gə́ dara ula Gad aree aw rɔ Dabid’g gə mba karee aw unda loo-nékinjaməs ar Njesigənea̰ loo-kunda-kó’g lə Ornan, dəw gə́ Yebus lé.
19 Dabid ḭ aw gə goo ta gə́ Gad ulá gə ri Njesigənea̰ lé ya tɔ. 20 Ornan gə́ aar unda kó lé tel kəmee oo kura gə́ dara lé ndá ŋganeeje sɔ gə́ d’aar səa lé d’aḭ d’aw d’iya rɔ dee. 21 Loo gə́ Dabid ree pər gə́ rɔ Ornan’g ndá Ornan un kəmee oo Dabid, tɔɓəi yeḛ ɔd loo-kunda-kó’g neelé aw iŋga Dabid ndá, yeḛ unda barmba dəb kəmee naŋg nea̰’g. 22 Dabid ula Ornan pana: Maji kari am loo-kunda-kó ləi gə mba karm m’ra loo-nékinjaməs keneŋ m’ar Njesigənea̰, ya̰ am m’ndogo səi gə laree gə́ gəd gə mba kar yoo-koso ɔr ne dɔ koso-dəwje’g ya.
23 Ornan tel ila Dabid’g pana: Maji kar mbai ləm gə́ to mbai lé taa loo-kunda-kó lé gə́ taa ya gə mba ra ne né gə́ i nja oo gə́ né gə́ maji kəm ra lé. Aa oo, m’a kari bɔ maŋgje gə́ nékinjanéməsje gə́ ka̰ roo ləm, gə pusuje gə́ ta kir ləma, gə kandə kó karee to nékar gə́ to nduji ləm tɔ, m’a kari néje neelé lai gə́ kar ya.
24 Nɛ mbai Dabid ila Ornan’g pana: Wah! Ma m’ndigi ndogo səi gə laree gə́ as dəa mbata ma m’ndigi kun né gə́ to né kaḭ-i kar Njesigənea̰ el ləm, m’a kun nékinjaməs gə́ ka̰ roo gə́ lal laree kar Ala el ləm tɔ.
25 Bèe ɓa Dabid ar Ornan larlɔr as tɔl-misa̰ (600) taa ne loo lé. 26 Dabid unda loo-nékinjaməs lée’g neelé ar Njesigənea̰ ləm, yeḛ inja nékinjanéməsje gə́ ka̰ roo ləm, gə nékinjanéməsje gə́ ka̰ kɔm na̰’d ləm tɔ. 27 Yen ŋga Njesigənea̰ un ndia ar kura gə́ dara gə mba karee tel gə kiambas lé ula sɔlee’d gogo.
28 Mee ndəa’g neelé Dabid oo to gə́ Njesigənea̰ tel ilá keneŋ loo-kunda-kó’g lə Ornan, dəw gə́ Yebus ndá yeḛ inja nékinjanéməsje lée’g neelé tɔ. 29 Nɛ kəi-kubu-si-Njesigənea̰ gə́ Moyis unda dɔdilaloo’g ləm, gə loo-nékinjaməs gə́ ka̰ roo né keneŋ ləm tɔ lé to loo gə́ ndəw gə́ to Gabao̰ ya. 30 Dabid askəm kaw no̰ loo-nékinjaməs’g neelé gə mba dəji Ala el mbata kiambas lə kura lə Njesigənea̰ lé ar ɓəl undá badə gaŋgee.
© Ngambai Bible © Alliance Biblique du Tchad 1989, 2015.
