Rudu taje lə Dabid
1 Aa ooje, rudu taje lə Dabid ɓa nee:
Ta lə Dabid, ŋgolə Isai.
Ta lə dəw gə́ si tar ndoi,
Yeḛ gə́ Ala lə Jakob wa dəa gə ubu,
Njekɔspa lə Israɛlje gə́ lel.
2 Ndil Njesigənea̰ unm pa ne ta,
Ta ləa to ndo̰m’g ya.
3 Ala lə Israɛlje pata,
Biri mbal lə Israɛlje ulam ta pana:
Yeḛ gə́ o̰ ɓee dɔ dəwje’g gə goo rəbee ləm,
Yeḛ gə́ ɓəl Ala loo ko̰ɓee’g ləa ləm tɔ lé
4 Yeḛ to asəna gə lookàr gə́ gə ndɔ
Loo gə́ kàr uba bər
Lookàr gə́ gə ndɔ gə lal ndi gə́ tɔ tii-tii bèe.
Kṵjeje gə́ orè goo ndi lé ɓa
D’ar muje d’unda ne loo dɔ naŋg’d teḛ.
5 See to togə́bè gə njémeekəije ləm no̰ Ala’g lé ləm el wa.
Mbata yeḛ man rəa
Gə manrɔ gə́ to gə no̰ am ləm,
Yeḛ ar taje lai gə́ to keneŋ lé
To njaŋg ləma,
Am m’isi ne gə meekulɔm ləm tɔ.
6 Nɛ njémeeyèrje lai lé
To d’asəna gə kunje gə́ d’ɔm dee kɔrɔ
D’ar dəw wa dee gə jia el.
7 Dəw gə́ a gə kɔrɔ rɔ dee ndá
A kwa dee gə kag-lar əsé kag-niŋga gə́ jia’g ɓa
Tɔɓəi deḛ roo dee gə́ lé’gən ya tɔ.
Ri bao-rɔje lə Dabid
1SgI 11.10-478 Aa ooje, ri bao-rɔje lə Dabid gə́ ra kula d’ar Dabid lé ɓa nee: Joseb-Basebet, dəw gə́ Takəmo̰ to ɓé-njérɔje kára gə́ mbuna ɓé-njérɔje gə́ boo-boo’g. Yeḛ wa niŋga-ndəi ləa tar rɔ ne gə dəwje tɔl dee as tɔl-jinaijoo (800) mee ndɔ gə́ kára ba ya.
9 Njekorè gée-yeḛ lé to Eləajar, ŋgolə Dodo gə́ to ŋgolə Ahohi. Yeḛ to gə́ kára mbuna njérɔje gə́ munda gə́ d’aar gə Dabid na̰’d mba rɔ gə Pilistije gə́ mbo̰ dɔ na̰ gə mba rɔ sə dee nɛ Israɛlje sa rɔ dee d’aw dɔdərlooje’g lé. 10 Yeḛ lé ḭ ndá tɔl Pilistije saar ar jia wəi pirig ləm, ar jia tia̰ kul-kiambas’g ləa ləm tɔ. Njesigənea̰ ra né gə́ boo ɔm dee ne tar mee ndəa’g neelé. Koso-dəwje tel ree goo Eləajar’g mba kodo nébanrɔje ba.
11 Njekorè gée-yeḛ lé to Sama, ŋgolə Ague, dəw gə́ Arar. Pilistije mbo̰ dɔ na̰ Léi. Lée neelé to dɔ naŋg gə́ mḭji to keneŋ yaa̰, ndá koso-dəwje d’aḭ no̰ Pilistije’g keneŋ ya. 12 Sama ula rəa dan mee ndɔ’g lé aree on dəa ndá yeḛ dum dɔ Pilistije. Njesigənea̰ ra né gə́ boo ɔm dee ne tar.
13 Mbaije munda mbuna mbaije gə́ rɔ-munda’g lé teḛ d’aw naḭ kinja kó’g tɔɓəi deḛ d’aw rɔ Dabid’g mee bolè mbal gə́ Adulam’g, loo gə́ kudu njérɔje lə Pilistije d’isi loo-si dee’g mee wəl-loo gə́ Repayim lé. 14 Dabid si mee kəi-kaar-kɔgərɔ’g tɔɓəi loo-si Pilistije to mee ɓee gə́ Betlehem tɔ. 15 Dabid ndiŋga rəa pana: See na̰ ɓa a kam mán gə́ to mee bwa-mán gə́ to par gə́ tarəwkɔg’d lə ɓee gə́ Betlehem lé m’ai wa.
16 Togə́bè bao-rɔje gə́ munda lé d’unda loo-si Pilistije dana gaŋg d’aw to mán gə́ to mee bwa-mán gə́ to tarəwkɔg’d lə ɓee gə́ Betlehem lé. Deḛ ree ne d’ar Dabid nɛ yeḛ mbad kai ndá yeḛ tər naŋg no̰ Njesigənea̰’g. 17 Yeḛ pana: Ǝi Njesigənea̰, kḛji né gə́ togə́bè gə́ ra lé m’a ra el! See m’a kai məs dəwje nee gə́ d’aw gə mba kila rɔ dee kɔrɔ lé wa.
Yee ɓa yeḛ mbad ne mán lé gə mbəa.
Yee gə́ nee ɓa gə́ néra bao-rɔje gə́ munda neelé ya.
18 Abisai, ŋgoko̰ Joab gə́ to ŋgolə Seruja lé yeḛ to mbai dɔ bao-rɔje gə́ munda neelé. Yeḛ wa niŋga-ndəi ləa tar tɔl ne dəwje rɔ-munda, yee ɓa ria ɓar ne mbuna deḛ gə́ munda’g lé. 19 D’ila riɓar dəa’g unda dee-deḛ gə́ munda lé tɔɓəi d’undá gə́ mbai lə dee nɛ yeḛ as gə deḛ gə́ kédé lé el.
20 Benaja, ŋgolə Jeojoda, gə́ to ŋgolə dəw gə́ Kabseel lé yeḛ to gə́ kankəm dəw gə́ boo gə goo néreaje gə́ to ɓəl. Yeḛ tɔl toboḭje gə́ Moab joo. Yeḛ ur dɔ dee’g mee bwa’g loo gə́ yeḛ tɔl toboḭ kára mee ndəa gə́ ndi ər gə kwɔji lé. 21 Yeḛ tɔl dəw gə́ Ejiptə gə́ to dəw gə́ toɓel gə́ niŋga-ndəi ləa to jia’g, yeḛ aw iŋgá gə ɗuguru-kag ndá yeḛ taa niŋga-ndəi lə dəw gə́ Ejiptə gə́ to jia’g lé ɓa tel tɔlee ne. 22 Yee ɓa gə́ né gə́ Benaja, ŋgolə Jeojoda ra, yeḛ iŋga ne riɓar mbuna bao-rɔje gə́ munda’g lé. 23 Deḛ d’ila riɓar dəa’g unda dee-deḛ gə́ rɔ-munda nɛ yeḛ as gə deḛ gə́ munda gə́ kédé lé el. Dabid aree to gə́ mbuna njékwɔjee-takəmkàrje’g gə goo ŋgəḭ lé.
24 Ajael, ŋgoko̰ Joab to gə́ mbuna dee-deḛ gə́ rɔ-munda’g. Elkanan, ŋgolə Dodo gə́ Betlehem, 25 gə Sama, dəw gə́ Arɔd, gə Elika, dəw gə́ Arɔd, 26 gə Helɛs, dəw gə́ Pelet, gə Ira, ŋgolə Ikes, dəw gə́ Tekoa, 27 gə Abiejer, dəw gə́ Anatot, gə Mebunai, dəw gə́ Husa, 28 gə Salmo̰, dəw gə́ Ahoah, gə Maharai, dəw gə́ Netopa, 29 gə Heleb, ŋgolə Baana, dəw gə́ Netopa, gə Itai, ŋgolə Ribai, dəw gə́ Gibea gə́ ka̰ njé gə́ Bḛjami, 30 gə Benaja, dəw gə́ Pirato̰, gə Hidai, dəw gə́ Nahalé-Gaas, 31 gə Abi-Albon, dəw gə́ Araba, gə Ajmabet, dəw gə́ Barum, 32 gə Eliahba, dəw gə́ Saalbo̰, gə Bene-Jasne, gə Jonatan, 33 gə Sama, dəw gə́ Arar, gə Ahiam, ŋgolə Sarar, dəw gə́ Arar, 34 gə Elipelet, ŋgolə Ahasbai, ŋgolə dəw kára gə́ to gə́ Maaka gə Eliam, ŋgolə Ahitopel, dəw gə́ Gilo, 35 gə Esrai, dəw gə́ Karmel, gə Paarai, dəw gə́ Arab, 36 gə Jigeal, ŋgolə Natan, gə Soba, gə Bani, dəw gə́ Gad, 37 gə Selek gə́ to Amo̰, gə Naharai, dəw gə́ Beerot gə́ to njekodo nérɔje lə Joab, ŋgolə Seruja, 38 gə Ira, dəw gə́ Jeter, gə Gareb, dəw gə́ Jeter, 39 gə Uri, dəw gə́ Het. Deḛ lai to rɔ-munda-gir-dee-siri.
© Ngambai Bible © Alliance Biblique du Tchad 1989, 2015.
