Pool aw Korḭtə
1 Gée gə́ gogo Pool ḭ Aten ɔd aw Kɔrḭtə. 2 Yeḛ iŋga Jib kára keneŋ ria Akila gə́ ɓee-kojee to gə́ Po̰t. Yeḛ gə dené ləa Prisil d’ḭ Itali ree pəd ya ɓəi mbata Klodə un ndia ar Jibje lai gə mba kar dee sa rɔ dee Rɔm’g. Yeḛ aw rɔ dee’g 3 ndá to gə́ kula ləa wa bua ka̰ dee-deḛ ndá yeḛ si kəi lə dee ra sə dee kula na̰’d keneŋ mbata deḛ to gə́ njéra kəi-kubuje. 4 Gə ndɔ-kwa-rɔ kára-kára lai lé Pool ɔr ginta kəi-kwa-dɔ-na̰’g lə dee oma̰ ne gə Jibje gə Grekje.
5 Nɛ loo gə́ Silas gə Timote d’ḭ Masedoinə ree ndá Pool orè kəmee dɔ ginta gə́ kɔr’g ya goo kára ba, ar Jibje d’oo gəd to gə́ Jeju to Kristi ya. 6 Nɛ Jibje d’ɔsee ŋgərəŋ tajee tila yoo dəa’g. Yen ŋga Pool sugu kubu ləa bugu-bugu ula dee pana: Maji kar məs sí ɔm dɔ sí-seḭ’g ya. Ma ɓa yḛ̀ ta ləm godo ya ŋga. Un kudee ɓasinè lé m’a kḭ kaw gə́ rɔ njépole-magəje’g ŋga.
7 Yeḛ ḭ keneŋ aw si gə Justus gə́ to dəw gə́ ɓəl Ala lé ləm, kəi ləa to boa ta kəi-kwa-dɔ-na̰’d ləm tɔ. 8 Nɛ Krispus gə́ to mbai gə́ njekaa dɔ kəi-kwa-dɔ-na̰ gə njémeekəije ləa lai lé d’un meḛ dee d’ar Mbaidɔmbaije. Njé gə́ Kɔrḭtə gə́ na̰je bula gə́ d’oo ta lə Pool lé d’un meḛ dee ləm, deḛ ra batɛm ləm tɔ,
9 Mee tilee gə́ kára lé Mbaidɔmbaije teḛ dɔ Pool’g gə némḭdi ulá pana: Maji kari ɓəl pai godo, nɛ pata kəmi gə́ kédé-kédé ɓó ar tai wəi el 10 mbata ma nja m’nai səi ya. Dəw kára kara a kɔrɔ rɔi ra səi majel el mbata koso-dəwje gə́ bula digi-digi mee ɓee-boo’g neelé to gə́ kama ya.
11 Yeḛ si keneŋ as ləb kára gə naḭ misa̰ ndoo dəwje gə́ Korintə ta lə Ala.
D’wa Pool d’aw səa loo-gaŋg-rəwta’g
12 Mee ləb gə́ Galio̰ to ne njeguburuɓee gə́ Akai lé Jibje d’ḭ d’ɔm na̰’d téréré d’ḭ gə Pool d’wá d’aw səa loo-gaŋg-rəwta’g 13 pana: Dəw neelé sula dəwje mba kar dee d’wa Ala meḛ dee’g gə goo rəw gə́ aw na̰’d gə ka̰ godndu lé el.
14 Pool a gə teḛ təa kila dee’g loo gə́ Galio̰ ya ula Jibje pana: Ǝi seḭ Jibje, ɓó lé to né gə́ to gə dɔ najee el əsé to néra gə́ yèr ndá m’a koo rəbee ya 15 nɛ ɓó lé to gə́ tamaḭ gə́ wɔji dɔ ta əsé dɔ ri néje əsé gə dɔ ta godndu lə sí ndá to ta gə́ wɔji dɔ sí-seḭ ya ɓó ma m’ndigi gaŋgta dɔ néje gə́ togə́bè’g el.
16 Togə́bè ɓa yeḛ tuba dee ne loo-gaŋg-rəwta’g. 17 Yen ŋga deḛ lai d’ḭ ɓugu na̰ dɔ Sostɛnə, mbai gə́ njekaa dɔ kəi-kwa-dɔ-na̰’g lé d’wá kundá no̰ loo-gaŋg-rəwta’g nɛ dɔ Galio̰ to̰ keneŋ kəw el.
Pool tel aw Antiɔs gogo
18 Pool nai Korintə ndəa bula bəl. Gée gə́ gogo yeḛ ra ŋgako̰ na̰je lapia ɓa uru mee bato’g gə mba kaw Siri gə Prisil gə Akilas na̰’d. Kédé ɓa karee uru mee bato’g ɓəi yeḛ ndisa dəa mee ɓee gə́ Sa̰kre mbata ndukun gə́ yeḛ un lé . 19 Loo gə́ deḛ teḛ Epesə mba̰ ndá Pool uba njéboalookawje ləa ya̰ dee keneŋ. Yeḛ andə aw mee kəi-kwa-dɔ-na̰’g wɔji ta gə Jibje. 20 Deḛ neelé ra ndòo rəa’g gə mba karee nai sə dee ndəa bula bəl tɔ. 21 Nɛ yeḛ ndigi sə dee el. Yeḛ ra dee lapia pana: Lé riri kara m’a kaw ra naḭ gə́ gogo mee ɓee gə́ Jerusalem ya. Ɓó lé mee Ala ndigi ndá m’a tel kiŋga sí ɓəi.
Yeḛ ḭ Epesə uru mee bato’g ɔd aw. 22 Loo gə́ yeḛ uru naŋg Sejare ndá yeḛ ḭ keneŋ ɔd aw Jerusalem mba ra Eglisə lapia ɓa yeḛ ḭ keneŋ aw Antiɔs ɓəi. 23 Loo gə́ Pool si Antiɔs waga ndá yeḛ un rəw aw gə loo-loo dəb ɓeeko̰ gə́ Galati ləm, gə Prigi ləm tɔ ula ne diŋgam meḛ njékwakiláje’g lai-lai ya.
24 Jib kára ria lə Apolɔs gə́ ɓee-kojee to gə́ Aleja̰dri lé ree si Epesə. Yeḛ to dəw gə́ tapea inja paw ləm, Yeḛ gər ta gə́ to mee maktub gə́ to gə kəmee lé gəd ləm, 25 Yeḛ to dəw gə́ kəmee inja dɔ rəw’g lə Mbaidɔmbaije ləm, ndilee ɔs pər keneŋ jəgəgə ləma, yeḛ ula dəwje ta gə́ wɔji dɔ Jeju ndoo dee gə goo rəbee loo kára ba sur ləm tɔ. Nɛ batɛm ra lə Ja̰ ya kára ba sur ɓa gər. 26 Yeḛ un ta pa yororo-yororo mee kəi-kwa-dɔ-na̰’g. Akilas gə Prisil d’ur mbi dee d’oo ne ta ləa ndá d’wá gə́ rɔ dee’g ndá d’ɔr ginta rəw lə Ala gə́ gəd d’aree oo. 27 To gə́ yeḛ wɔji-kwɔji kaw gə́ Akai ndá ŋgako̰ na̰je d’ula diŋgam mée’g tɔɓəi deḛ ndaŋg maktub d’aree gə mba karee aw ne ar njékwakiláje ɓó gə kar dee d’wá ne gə́ rɔ dee’g. Loo gə́ yeḛ teḛ keneŋ ndá yeḛ la sə dee-deḛ gə́ mbɔl dɔ noji gə́ Ala wa sə dee lé d’un ne meḛ dee. 28 Mbata yeḛ maḭta gə Jibje kəm dəwje’g təsərə tɔji dee gə goo ta gə́ to mee maktub gə́ to gə kəmee lé ar dee d’oo to gə́ Jeju lé to gə́ Kristi ya.
© Ngambai Bible © Alliance Biblique du Tchad 1989, 2015.
