Godndu gə́ wɔji dɔ néndubaje gə́ ka̰ denéje
1 Ŋgalə Selopad gə́ dené, yeḛ gə́ to ŋgolə Eper, gə́ to ŋgolə Galaad, gə́ to ŋgolə Makir, gə́ to ŋgolə Manasə, mbuna njénojije’g lə Manasə, gə́ to ŋgolə Jisəb lé ri dee lə Makla, Noa, Hogla, Milka gə Tirsa, 2 deḛ ree pər d’aar no̰ Moyis gə no̰ Eləajar’d gə́ to njekinjanéməs, gə no̰ mbaije’g, gə no̰ koso-dəwje’g lai tarəw kəi-kubu-kiŋga-na̰’g. 3 Deḛ pana: Bɔ síje lé wəi dɔdilaloo’g ɓó yeḛ to mbuna deḛ gə́ d’ḭ gə Njesigənea̰ d’ɔsee rəw lé el ləm, to gə́ mbuna njé’g lə Koré el ləm tɔ, nɛ yeḛ wəi yoo-kaiya ləa-yeḛ ya lal ŋgon gə́ diŋgam. 4 See gelee ban ɓa ri bɔ síjeḛ a godo mbuna njénojije’g ləa mbata lə lal gə́ yeḛ lal ŋgon gə́ diŋgam lé wa. Ar síje nénduba lə sí mbuna ŋgako̰ bɔ síje gə́ diŋgam’g.
5 Moyis aw gə ta neelé no̰ Njesigənea̰’g. 6 Ndá Njesigənea̰ ula Moyis pana: 7 Ta lə ŋgalə Selopad gə́ dené lé to lée’g ya. I a kar dee nénduba gə́ ka̰ dee-deḛ mbuna ŋgako̰ bɔ deeje gə́ diŋgam’g, bèe ɓa nénduba gə́ wɔji dɔ bɔ deeje lé a tel to ne ka̰ dee-deḛ ya . 8 I a kula Israɛlje pana: Loo gə́ dəw a kwəi lal ŋgon gə́ diŋgam ndá seḭ a karje nénduba ləa tel to ka̰ ŋgonee gə́ dené ya. 9 Ɓó lé ŋgonee gə́ dené godo ndá seḭ a karje ŋgakea̰je ɓa nénduba ləa. 10 Ɓó lé ŋgakea̰je godo ndá seḭ a karje ŋgako̰ bɔbeeje gə́ diŋgam ɓa nénduba ləa. 11 Ɓó lé ŋgako̰ bɔbeeje gə́ diŋgam godo ndá njenoji ləa gə́ pər mbuna njénojije’g ləa ɓa seḭ a kaareeje nénduba ləa, yee ɓa a to godndu gə né gə́ kəm ra mbata lə Israɛlje to gə́ Njesigənea̰ un ne ndia ar Moyis lé.
Juje ɓa gə́ njetaa tor Moyis
12 Njesigənea̰ ula Moyis pana: Tuga loo aw dɔ mbal’g nee gə́ ria lə Abarim ndá aa loo oo ɓee gə́ m’ar Israɛlje lé . 13 I a kaa loo koo ya, nɛ i a kwəi kaw ne rɔ dəwje’g ləi to gə́ ŋgokɔḭ Aaro̰ wəi aw ne rɔ dee’g mba̰ lé tɔ, 14 mbata seḭ alje ta tam’g dɔdilaloo gə́ Sin, loo gə́ koso-dəwje maḭta d’ɔs ne ta ləm rəw nɛ seḭje lé seḭ ṵdamje gə kəmee kəm dee’g mbata mán lé el.
Manje neelé to mán gə́ wɔji dɔ loo gə́ seḭ maḭje ta ɔsje ne ta rəw mee ɓee gə́ Kades gə́ to dɔdilaloo gə́ Sin lé.
15 Moyis ula Njesigənea̰ pana: 16 Maji kar Njesigənea̰, Ala gə́ njekar dəwje lai d’aw kəmba lé ɔr dəw kára undá dɔ koso-dəwje’g 17 mba karee teḛ no̰ dee’g aw raga ləm, gə tel no̰ dee’g ree ɓee ləm tɔ, mba karee ɔr no̰ dee teḛ sə dee raga ləm, ɔr no̰ dee tel sə dee ɓee ləm tɔ, bèe ɓa mba kar koso-dəwje lə Njesigənea̰ lé d’a to kasəna gə badje gə́ njekul dee godo lé bèe el .
18 Njesigənea̰ ula Moyis pana: Ɔr Josué, ŋgolə Nun, dəw gə́ ndil taa mée lé ndá i a kila jii dəa’g . 19 I a karee ree aar no̰ Eləajar gə́ to njekinjanéməs ləm, gə no̰ koso-dəwje’g lai ləm tɔ, tɔɓəi i a kun ndui karee kəm dee’g. 20 I a kai riɓar gə́ dɔi’g kɔm dəa’g mba kar koso-dəwje lə Israɛlje lai d’oo ta təa’g. 21 Yeḛ a ree kaar no̰ Eləajar gə́ to njekinjanéməs’g lé mba kar Eləajar aw no̰ Njesigənea̰’g gə mbata ləa mba karee gər ne né gə́ kəm ra gə goo né gə́ urim ɓa a tɔjee, togə́bè Josué ləm, gə Israɛlje lai ləma, gə koso-dəwje lai ləm tɔ d’a kaw gə goo ndukun lə Eləajar ləm, d’a tel ree gə goo ndukun ləa ləm tɔ .
22 Moyis ra né gə́ Njesigənea̰ un ne ndia aree lé. Yeḛ ree gə Juje aree aar no̰ Eləajar’d gə́ to njekinjanéməs ləm, gə no̰ koso-dəwje’g lai ləm tɔ. 23 Yeḛ ila jia dəa’g ləm, yeḛ un ndia aree ləm tɔ, to gə́ Njesigənea̰ ya un ne ndia ar Moyis lé .
© Ngambai Bible © Alliance Biblique du Tchad 1989, 2015.
