Ləb kya̰ dɔ naŋg karee wa rəa
1 Njesigənea̰ ula Moyis ta dɔ mbal gə́ Sinai pana : 2 Maji kari ula Israɛlje ta nee pana:
Loo gə́ seḭ a ka̰dje mee ɓee gə́ m’ar sí lé ndá dɔ naŋg lé a kwa rəa: yee ɓa a to ləb-kwa-rɔ kula ne rɔnduba dɔ Njesigənea̰’g. 3 As ləb misa̰, seḭ a dubuje né mee ndɔje’g lə sí ləm, a tḭjaje barkəm nduúje lə sí ləma, a kinjaje kandə deeje ləm tɔ. 4 Nɛ ləb gə́ njekɔm’g siri a to ləb-kwa-rɔ lə dɔ naŋg ləm, ləb-kwa-rɔ kula ne rɔnduba dɔ Njesigənea̰’g ləm tɔ: seḭ a dubuje né mee ndɔje’g lə sí el ləm, seḭ a tḭjaje barkəm nduúje lə sí el ləm tɔ. 5 Seḭ a tḭjaje dɔ kó gə́ ka̰dee ɔm naŋg loo-kinja-kó gə́ kédé ɓa uba lé el ləm, seḭ a tḭjaje kandə nduú gə́ lal tḭja barkəmeeje el ləm tɔ. A to ləb-kwa-rɔ lə dɔ naŋg lé. 6 Ɓó lé seḭ ndɔje ndɔ mee ləb-kwa-rɔ’g lə dɔ naŋg lé el kara yee a kinja gə nésɔ sí ləm, gə ka̰ kuraje lə sí gə́ diŋgam əsé njé gə́ dené ləm, gə ka̰ kuraje lə sí gə́ ra kula mba kiŋga ne lar ləm, gə ka̰ dəw-dɔ-ɓeeje gə́ d’isi sə si na̰’d ləm, 7 a to ka̰ nékulje lə sí ləma, gə ka̰ daje gə́ wala mee ɓee’g lə sí ləm tɔ, néje lai gə́ seḭ iŋgaje naŋg lé a to gə́ nésɔ sí ya.
Ləb kɔr ɓər dɔ ɓərje’g
8 Seḭ a turaje ləb-kwa-rɔje gə́ siri, ləbje siri gɔl siri tɔɓəi bula lə ləb-kwa-rɔje gə́ siri lé d’a kaḭ as ləb rɔ-sɔ-giree-jinaikara tɔ. 9 Ndɔ dɔg lə naḭ gə́ njekɔm’g siri lé seḭ a karje ndu to̰to̰ ɓar ɔr loo lɔi-lɔi, ndɔ kiŋga meekoso lemsé dɔ kaiya’g lé kara seḭ a kimje to̰to̰ gə looje lai-lai mee ɓee’g lə sí tɔ. 10 Seḭ a kɔrje ləb gə́ njekɔm’g rɔ-mi kṵdáje gə kəmee ləm, seḭ a kilaje mbər kɔr ɓər dɔ dəwje’g lai gə́ d’isi mee ɓee’g neelé ləm tɔ: a to ləb gə́ ɓaree Jubile mbata lə sí, nana kara mbuna sí’g a tel kaw dɔ nduba’g ləa ləm, nana kara mbuna sí’g a tel dan njémeekəije’g ləa ləm tɔ. 11 Ləbje gə́ njekɔm’g rɔ-mi rɔ-mi lé a to ləb Jubile mbata lə sí, seḭ a dubuje né el ləm, seḭ a kinjaje né gə́ uba gə dɔrea el ləma, seḭ a tḭjaje kandə nduúje gə́ lal tḭja barkəmeeje el ləm tɔ. 12 Mbata to ləb Jubile ya, seḭ a kéeje gə́ né gə́ to gə kəmee. Seḭ a sɔje kandə néje gə́ mee ndɔje’g lə sí gə́ kédé ya.
13 Mee ləb Jubile’g neelé nana kara mbuna sí’g a tel kaw loo’g ləa-ləa. 14 Ɓó lé seḭ raje né arje mar síje ndogo sə sí əsé seḭ kara ndogoje sə dee né tɔ ndá maji kar dəw kára kara mbuna sí’g su ne kəm ŋgokea̰ el. 15 Seḭ a turaje goo bula lə ləbje gə́ d’orè goo Jubile gə́ dəs ɓa mba ndogo gə mar síje né ɓəi, yeḛ kara a tura goo ləbje gə́ a kiŋga né keneŋ ɓa a kar sí ndogoje səa né ɓəi tɔ. 16 Ɓó lé ləbje lé nai yaa̰ ɓəi ndá laree kara seḭ a kwɔjeje yaa̰ tɔ, ɓó lé ləbje nai bula el ndá laree kara seḭ a rəmje ne tɔ, mbata to kandə néje gə́ d’inja lé ɓa ndogoje sə dee kən. 17 Dəw kára kara mbuna sí’g a buguru maree el ləm, seḭ a ɓəlje Ala lə sí ləm tɔ, mbata ma m’to Njesigənea̰, Ala lə sí. 18 Raje godndumje ləm, aaje dɔ ndukunje ləm kər-kər gə mba ra née ləm tɔ, togə́bè ɓa seḭ a síje ne lɔm mee ɓee’g neelé. 19 Dɔ naŋg a kar sí ka̰dee ləm, seḭ a sɔje né karje meḛ sí ndan ləma, seḭ a síje ne lɔm ləm tɔ.
20 Loo gə́ seḭ a pajena: Lé j’a gə dubu né el ləm, j’a gə kinja né el ləm tɔ ndá see ɗi ɓa j’a sɔ mee ləb gə́ njekɔm’g siri lé wa. 21 M’a tɔr ndum dɔ sí’g mee ləb gə́ njekɔm’g misa̰ ndá dɔ naŋg a kar sí kandə néje gə́ a kas sí kəm ləb munda. 22 Seḭ a dubuje né mee ləb gə́ jinaijoo’g ndá seḭ a sɔje kandə néje gə́ seḭ injaje kédé lé, saar ləb gə́ njekɔm’g jinaikara ləm, saar loo kinja njé gə́ sigi’g ləm tɔ kara seḭ a sɔje yee gə́ ləw ya ɓəi.
Rəw kuga dɔ dɔ naŋg gə́ tona ne lar
23 Dɔ naŋg lə sí lé seḭ a kar deeje ndogo sə sí gə no̰ el, mbata ɓee neelé to kama ləm, seḭ síje səm keneŋ asəna gə dəw-dɔ-ɓeeje bèe ləm tɔ. 24 Ɓeeje lai gə́ to ka̰ sí-seḭ lé seḭ a gɔlje rəbee gə́ ka̰ kuga dɔ dɔ naŋgje gə́ seḭ tonaje ne lar lé ya.
25 Ɓó lé ŋgokɔḭ tel to gə́ njendoo ɓa wa ges dɔ nduba ləa tona ne lar ndá dəw gə́ to ta ləa mba kuga dəa gə́ to njenoji ləa gə́ pər gə́ ur dɔ mareeje’g lé a ree mba kuga dɔ né gə́ ŋgokea̰ wa tona ne lar lé. 26 Ɓó lé dəw neelé dəw dəa godo ɓa yeḛ nja iŋga né gə́ askəm kuga ne ɓaŋg neelé dəa’g ndá 27 yeḛ a tura ləbje gə́ d’orè goo ləb tona né’g lé, tɔɓəi yeḛ a tel gə ges laree gə́ nai lé kar njendogo səa né lé gogo ɓa yeḛ a tel kaw dɔ naŋg’d ləa gogo ɓəi. 28 Ɓó lé yeḛ iŋga ges laree gə́ nai mba kar debee gə́ yeḛ tona lar lé el ndá né gə́ yeḛ tona ne lar lé a nai ji njetona’g saar ləb Jubile ya, ləb Jubile ɓa yeḛ a tel kaw dɔ naŋg’d ləa ndá njetona né kara a teḛ keneŋ kya̰ kar njea tɔ.
29 Ɓó lé dəw ar maree wa kəi-siée mee ɓee-boo gə́ ndògo-bɔrɔ gugu dəa sub lé tona ne lar ndá yeḛ a tel kuga dəa kalaŋ mbata a dəs ləb kára doŋgɔ goo tona gə́ yeḛ tona lar’g lé, yeḛ a tel kuga dəa ya tɔ. 30 Nɛ ɓó lé kəi neelé gə́ to mee ɓee-boo gə́ ndògo-bɔrɔ gugu dəa sub lé d’uga dəa el saar ləb kára doŋgɔ dəs mba̰ ndá yee a to ka̰ yeḛ gə́ ar dee lar lé gə ka̰ ŋgakeaje saar gə no̰, yeḛ a teḛ keneŋ kya̰ kar njeaje mee ləb Jubile’g el ŋga. 31 Kəije gə́ to mee ŋgan-ɓeeje gə́ ndògo-bɔrɔ godo keneŋ lé d’a koo dee asəna gə dɔ naŋgje bèe, d’a kaskəm kuga dɔ dee ndá yeḛ gə́ ar dee lar lé a teḛ keneŋ kya̰ kar njeaje mee ləb Jubile’g tɔ.
32 Nɛ ta gə́ wɔji dɔ kəije lə Ləbije gə́ to mee ɓee-booje’g lə dee lé, Ləbije d’a kaskəm tel kuga dɔ dee gə mee ləbje kára kára lai, saar-saar gə no̰. 33 Yeḛ gə́ a ndogo kəi ji Ləbije’g lé ndá ləb Jubile lé yeḛ a teḛ mee kəi gə́ yeḛ ndogo’g ləm, gə mee ɓee-boo gə́ kəi neelé to keneŋ ləm tɔ kya̰ kar dee, mbata kəije gə́ to mee ɓeeje’g lə Ləbije lé to dɔ naŋg lə dee mbuna Israɛlje’g. 34 Loo-ndɔje gə́ gugu dɔ ɓee-si Ləbije lé d’a kaskəm kwa ndogo el, mbata to gə́ ka̰ dee-deḛ ya saar-saar gə no̰.
Godndu gə́ wɔji dɔ nétona lə njéndooje
35 Ɓó lé ŋgoko̰ sí tel to gə́ njendoo gə́ né godo jia’g ndá seḭ a laaje səa mbata to gə́ yeḛ to dəw-dɔ-ɓee gə́ si mee ɓee’g lə sí lé, gə mba karee si ne sə sí tɔ . 36 Seḭ a kwɔjije səa lar dɔ maree’g el ləm, seḭ a taaje manee jia’g el ləm tɔ, seḭ a ɓəlje Ala lə sí ndá ŋgoko̰ sí a si ne sə sí ya. 37 Seḭ a kaareeje tona sí lar mba kiŋga manee dɔ’g el ləm, seḭ a kaareeje wɔr sí nésɔ ɓa mba kiŋga maree dɔ’g el ləm tɔ . 38 Ma m’to Njesigənea̰, Ala lə sí gə́ m’ar sí undaje loo mee ɓee gə́ Ejiptə teḛje gə mba kar sí ɓee gə́ Kana̰ gə́ né ka̰ sí ləm, gə mba to ne Ala lə sí ləm tɔ.
Rəw kɔr ɓər dɔ ɓərje’g
39 Ɓó lé ŋgoko̰ sí gə́ si mbɔr sí’g dəb lé tel to gə́ njendoo ɓa ar sí ndogeeje ndá seḭ a kaareeje ra kula asəna gə ɓər el . 40 Yeḛ a si sə sí asəna gə kura gə́ ra kula mba kiŋga ne lar ləm, asəna gə yeḛ gə́ si sə sí na̰’d ləm tɔ, yeḛ a ra kula kar sí saar ləb Jubile ɓa. 41 Mee ləb’g neelé seḭ a kya̰je gée gə́ kya̰, yeḛ gə ŋganeeje səa na̰’d ndá yeḛ a tel kaw mbuna njénojije’g ləa ləm, gə dɔ naŋg’d lə bɔbeeje ləm tɔ. 42 Mbata deḛ to kuraje ləm gə́ m’ar dee d’unda loo mee ɓee gə́ Ejiptə teḛ, ndá d’a ndogo dee to gə́ ndogo ne ɓərje bèe el. 43 Seḭ a kundaje siŋgamoŋ dəa’g el nɛ seḭ a ɓəlje Ala lə sí.
44 Mbuna ginkoji dəwje gə raŋg’d gə́ gugu dɔ sí sub lé ɓa seḭ a kiŋgaje ɓərje əsé kuraje lə sí gə́ diŋgam gə njé gə́ dené keneŋ, mee ɓeeje’g neelé nja ɓa seḭ a ndogoje ɓər lə sí gə́ diŋgam gə njé gə́ dené keneŋ ləm tɔ. 45 Seḭ a kasjekəm ndogoje ŋgan meḛ dəw-dɔ-ɓeeje gə́ d’isi sə sí ləm, əsé njémeekəije lə dee gə́ d’oji dee mee ɓee’g lə sí lé ləm tɔ, ndá d’a to né ka̰ sí-seḭ ya. 46 Seḭ a kya̰ deeje gə́ nénduba mbata lə ŋgan síje gə́ goo sí’g asəna gə néje lə dee bèe, seḭ a ŋgəm deeje gə́ ɓərje saar gə no̰. Nɛ ta gə́ wɔji dɔ ŋgako̰ síje gə́ to Israɛlje lé dəw kára kara mbuna sí’g a kunda siŋgamoŋ dɔ ŋgokea̰’g el.
47 Ɓó lé dəw-dɔ-ɓee gə́ si sə sí tel to gə́ bao ɓa ŋgoko̰ sí gə́ si mbɔr sí’g tel to gə́ njendoo ar dəw-dɔ-ɓee gə́ si sə sí əsé dəw kára mbuna njémeekəije’g lə dəw-dɔ-ɓee lé ndogee ndá 48 d’a kaskəm kuga dəa goo ndogo gə́ yeḛ ar dee ndogee’g ya, ŋgokea̰ gə́ kára mbuna mareeje’g askəm kuga dəa ya tɔ. 49 Ŋgoko̰ bɔbeeje əsé ŋgon mee ŋgoko̰ bɔbeeje gə́ diŋgam əsé yeḛ gə́ kára mbuna njénojije’g ləa gə́ gəd lé a kaskəm kuga dəa, əsé ɓó lé néje ləa-yeḛ as ndá yeḛ nja a kuga dɔ rəa tɔ. 50 Yeḛ a tura gə yeḛ gə́ njendogee lé un kudee mee ləb gə́ deḛ ndogee ne lé saar teḛ ne mee ləb Jubile’g, ndá lar gə́ kəm kuga lé a kwɔji dɔ bula lə ləbje gə́ nai lé, tɔɓəi d’a tura gə goo lar kuga dɔ ji njekula lar tɔ. 51 Ɓó lé ləbje nai bula ɓəi ndá yeḛ a kar dee lar kuga dɔ rəa gə goo lar ləbje gə́ nai neelé ləm, tɔɓəi d’a tura gə goo lar kuga dɔ ji njekula lar tɔ. 52 Ɓó lé ləbje nai lam ba ɓa mba teḛ ne ləb Jubile’g ɓəi ndá yeḛ a tura gée ləm, yeḛ a kar dee lar kuga dɔ rəa gə goo ləbje neelé ləm tɔ. 53 Yeḛ a to asəna gə njekula lar bèe gə ləbee-ləbee, tɔɓəi dəw gə́ yeḛ a si səa lé a kunda siŋgamoŋ dəa’g kəm sí’g el tɔ. 54 Ɓó lé d’uga dəa gə goo rəbee el ndá yeḛ a kunda loo teḛ kya̰ kula neelé mee ləb Jubile’g, yeḛ gə ŋganeeje səa na̰’d ya.
55 Mbata ma nja Israɛlje to ɓərje ləm, deḛ to ɓərje ləm gə́ m’ar dee d’unda loo mee ɓee gə́ Ejiptə teḛ lé. Ma m’to Njesigənea̰, Ala lə sí ya.
© Ngambai Bible © Alliance Biblique du Tchad 1989, 2015.
