Meeko̰ a koso dɔ ginkoji dəwje gə́ njémeendərje’g
1 Njesigənea̰ pana:
Meeko̰ a koso dɔ ŋgan njékaltaje’g
Gə́ d’wɔji-kwɔji ra né lal meḛdigi ləm ləm,
Gə d’ɔm na̰’d lal ndukun ləm ləm tɔ
Gə mba kar kaiya ḭ ne dɔ maree’d gə́ kédé-kédé!
2 Deḛ d’ḭ d’aw Ejiptə lal dəjim
Gə mba kiya rɔ dee gin siŋgamoŋ’d lə Parao̰ ləm,
Mba kiŋga ne loo-kula-dɔ dee gel Ejiptəje’g ləm tɔ!
3 Siŋgamoŋ lə Parao̰ lé
A to rɔkul mbata lə sí ləm,
Kula dɔ gel Ejiptəje’g lé kara
A to rɔkul-boo ləm tɔ!
4 Mbaije ləa teḛ Soa̰’g mba̰ ləm,
Njékulaje ləa kara teḛ Hanɛs’g ləm tɔ.
5 Deḛ lai rɔ dee a gaḭ gəs mbata lə ginkoji dəwje
Gə́ d’askəm ra né kára kara mbata lə dee el ləm,
D’askəm taa dɔ dee el ləma,
D’askəm la sə dee el ləm tɔ,
Nɛ d’a to gin rɔkul gə kəm sɔḭ mbata lə dee ɓa.
6 Ndərta gə́ wɔji dɔ da-kulje gə́ kel dɔkɔl!
Deḛ d’unda mee ɓee gə́ néurti gə nékəmndoo to keneŋ gaŋg,
To loo gə́ ko̰ toboḭ gə bɔ toboḭ ree keneŋ ləm,
Li-meewai gə da-kɔb gə́ ḭ gə bagee ree keneŋ ləm tɔ,
Deḛ d’odo nékiŋgaje lə dee gir mulayḛ̀je-je’g lə dee ləm,
D’odo nébaoje lə dee dɔ dun jambalje’g ləm tɔ
D’aw ne d’ar koso-dəwje gə́ d’askəm ra né kára kara mbata lə dee el.
7 Mbata né gə́ Ejiptə a la ne sə dee lé
To nébeelé gə́ kari ba,
Gelee gə́ nee ɓa ma m’unda ri Ejiptə lé
Le Rahab gə́ njera né kára kara el.
8 Ɓasinè lé maji kari aw ndaŋg taje neelé dɔ bəgərə’g no̰ dee’g ləm,
Ndaŋ taree mee maktub’g ləm tɔ
Mba karee to saar teḛ ndɔje gə́ d’a gə ree lé
Gə́ kédé-kédé saar gə no̰.
9 Mbata to koso-dəwje gə́ njékaltaje ləm,
Deḛ to ŋganje gə́ njépa taŋgɔmje ləma,
Deḛ to ŋganje gə́ ndigi koo godndu Njesigənea̰ lé el ləm tɔ.
10 Deḛ d’ula njénékooje pana:
Maji kar sí toje njénékooje el!
Tɔɓəi d’ula njéteggintaje pana:
Tegje gintaje gə́ tɔgərɔ ar síje el tɔ.
Nɛ taje gə́ ka̰ su kəm loo ɓa ula síje ləm,
Tegje gintaje gə́ rii ar síje ləm tɔ!
11 Maji kar sí ya̰je rəw gə́ danasur ləm,
Ubaje kila-rəwje ya̰je ləma,
Arje Njerɔkunda lə Israɛlje nai əw sə sí ləm tɔ!
12 Gelee gə́ nee ɓa yeḛ gə́ to Njerɔkunda lə Israɛlje lé pa ne pana:
To gə́ seḭ mbadje ta neelé ləm,
Seḭ undaje meḛ sí dɔ néra kərm-kərm’g
Gə néra gə́ gə goo rəbee’g el ləma,
Seḭ gədje rɔ sí dɔ dee’g ləm tɔ ndá
13 Néra kori-kori neelé a kwɔji dɔ sí
Asəna gə ndògo-bɔrɔ gə́ ŋgal gə́ ta̰ kédé ɓa aree təd ɓəi
Aree teḛ gə́ raga təd kalaŋ gə́ léegəneeya:
14 Ndògo-bɔrɔ neelé d’a tɔ pɔs-pɔs
To gə́ tɔ ne jo lə njekubajo
Gə́ deḛ tɔ d’ar gailá nai el ləm,
Esé a kiŋga əb keneŋ
Gə mba kun ne pər mee pil’g el ləma,
Esé d’a kɔr ne mán ɓul-mán’g bèe el ləm tɔ.
15 Mbata Mbaidɔmbaije gə́ Njesigənea̰ gə́ to Njerɔkunda lə Israɛlje lé pa togə́bè pana:
Gə goo tel gə́ seḭ telje reeje rɔ Ala’g lé ləm,
Gə si gə́ seḭ síje régégé ləm tɔ lé ɓa
Seḭ a kajije ne ləm,
Si gə́ seḭ síje lɔm
Gə kunda gə́ seḭ undaje meḛ sí yel ɓa
A to siŋga sí ləm tɔ.
Nɛ seḭ ɔsje ta nee rəw!
16 Seḭ pajena:
Wah! j’a kaḭ gə kundaje ɓa!
Gelee gə́ nee ɓa seḭ a kaḭje ne ya
Nɛ a kaḭje ne gə́ kaḭ ɓa.
Seḭ pajena:
J’a kaḭ gə kunda ŋgwɔdje!
Nɛ deḛ gə́ njékɔrə síje kara
Rɔ dee a kwɔilɔ pélé-pélé kunda sí!
17 Dəwje tɔl-dɔg (1.000) d’a kaḭ no̰ dəw kára ba gə́ ndaŋg dee ləm,
Ndu ndaŋg lə dəwje gə́ mi ba lé
Seḭ a kaḭje ne ləm tɔ
Saar mba kar sí naije
Asəna gə nétɔji bèe dɔ sém mbal’g ləm,
Asəna gə nétɔji gə́ to dɔdərloo’g bèe ləm tɔ.
Ndɔ si maji unda nje gə́ kédé
18 Gelee gə́ nee ɓa Njesigənea̰ ndiŋga rəa
Gə mba ra sə sí meemaji
Ndá yeḛ a kḭ gə mba koo kəmtondoo lə sí,
Mbata Njesigənea̰ to Ala gə́ njemeekarabasur,
Rɔlel a nai gə deḛ gə́ d’unda meḛ dee yel gə́ dəa’g!
19 Oiyo, seḭ koso-dəwje gə́ Sio̰ gə́ síje Jerusalem lé
Seḭ a no̰je gə mán-no̰ kəm sí’g el ŋga!
Yeḛ a koo ndu no̰ lə sí ndá
Yeḛ a ra sə sí meemaji ləm,
Léegəneeya gə́ yeḛ oo ndu sí ndá
Yeḛ a tel kila sí keneŋ ləm tɔ.
20 Mbaidɔmbaije a kar sí muru dan néɓəŋgərəti’g ləm,
Gə mán dan néurti’g ləm tɔ,
Deḛ gə́ njéndoo sí néje lé
D’a kiya rɔ dee kəm sí’g el ŋga
Nɛ seḭ a kooje njéndoo sí néje neelé gə kəm sí ya.
21 Loo gə́ seḭ a gə kawje dɔkɔl əsé dɔgel ndá
Mbi sí a koo ndu gə́ ɓar goo sí’g gogo pana:
Aa ooje, rəw ɓa nee, njaaje keneŋ!
22 Larnda gə́ d’ɔr ne gir magəje lə sí lé
Seḭ a kooje gə́ né gə́ mina̰,
Larlɔr gə́ d’ula rɔ dee’g lé kara
Seḭ a kɔmje kɔrɔ asəna gə né gə́ ndum bèe
Paje ne pana: Aar raga!
23 Yen ŋga yeḛ a kar ndi ər dɔ nédubu gə́ seḭ dubuje dɔ naŋg’d lé
Ndá kandə nésɔ gə́ dɔ naŋg a kar sí lé
A lel ta sí’g ləm, a kul sí ləm tɔ,
Mee ndəa gən lé koso-nékulje lə sí
D’a ko̰ mu loo-ko̰-mu’g lə dee gə́ tad rəg-rəg lé.
24 Bɔ maŋgje gə mulayḛ̀je-je gə́ ndɔ-ndɔ lé
D’a sɔ mu gə́ dusu kad dɔ’g
Gə́ telee gə kag-tel-gel-né ləm, gə nétohko ləm tɔ.
25 Dɔ mbalje lai gə́ ŋgal léŋgé-léŋgé ləm,
Gə dɔdərlooje gə́ ḭtar gə́ rara kara ləm tɔ lé
Man baaje gə kəm-rəw-manje d’a to keneŋ
Ndɔ ndum dəwje mburug-mburug ləm,
Loo gə́ kəi-kaar-kɔgərɔje gə́ duu dɔ loo d’a təd ləm tɔ.
26 Ndogó lə naḭ a tel to to gə́ ka̰ kàr bèe ləm,
Kɔs lə kàr lé siŋgá a kur dɔ kɔs’g ləa gə́ ndɔ kára as gɔl siri ləm tɔ
Loo gə́ Njesigənea̰ a tɔ ta doo lə koso-dəwje ləa
Kar ta dooje gə́ d’iŋga loo gə́ yeḛ kunda dee lé ər kəmsə.
Ala gaŋgta dɔ Asirije’g
27 Aa ooje, ri Njesigənea̰ lé ḭ əw ɓa ree,
Oŋg ləa lé nuŋga kəd-kəd ləm,
To pər gə́ o̰ loo kənənə-kənənə ləm tɔ.
Tapeaje teḛ gə boo-oŋg ləm,
Ndəa̰ to asəna gə pər gə́ roo loo ləm tɔ,
28 Kəmə gə́ yeḛ ila pugudu lé
To asəna gə mán baa gə́ ḭ aw saar wa gwɔs dəw mbiriri bèe
Mba yə ne ginkoji dəwje gə raŋg gə néje gə́ ka̰ tuji loo ləm,
Asəna gə aljem goso
Gə́ to biri ŋgaŋ koso-dəwje’g bèe ləm tɔ.
29 Seḭ a kɔsje pa to gə́ d’ɔs ne pa loo-ra-naḭ’g loondul’g bèe ləm, seḭ a raje rɔlel gə meḛ sí to gə́ dəw gə́ njaa gə ndu buula gə́ ɓar ləm tɔ gə mba kaw ne dɔ mbal’g lə Njesigənea̰, yeḛ gə́ to biri mbal lə Israɛlje tɔ.
30 Yen ŋga Njesigənea̰ a kar dee d’oo ndia gə́ ka̰ boo-ronduba gə́ ɓar wəl,
Tɔɓəi yeḛ a tɔji dee jia gə́ to pèrèrè gə mba kunda dee ne
Dan boo-oŋg’d ləa gə́ nuŋga kəd-kəd ləm,
Gə dan ko̰ ndi gə́ ər bai-bai’g ləma,
Gə dan lel-boo gə ndi kwɔji gə́ taa loo yəŋgəm-yəŋgəm ləm tɔ.
31 Loo gə́ ndu Njesigənea̰ a ɓar lé ndá
Asirije d’a kunda bala tigi-tigi,
Njesigənea̰ a kunda dee gə kag-kɔbə ləa.
32 Ta ndəi kɔb ləa kára kára gə́ wɔji dɔ deḛ gə́ Njesigənea̰ a kunda dee neelé d’a koo ndu dalè bajḭgje gə kṵdu-kagje gə́ ɓar, Njesigənea̰ a rɔ ne sə dee gə jia gə́ un ula ndiŋ gə́ tar lé.
33 Un kudee ləw ba lé
Deḛ gɔl loo-roo-dəwje,
Deḛ gɔlee d’wɔji ne dɔ mbai gə́ Asiri,
D’aree ur ləm, gə tad ləm tɔ,
Loo-roo-dəwje neelé pər gə kagje taa loo keneŋ pəl-pəl,
Kila kəmə pugudu lə Njesigənea̰ mbudu pər o̰
To gə́ kṵji pər gə́ kas gə́ teḛ bilim-bilim bèe.
© Ngambai Bible © Alliance Biblique du Tchad 1989, 2015.
