Ala tɔr ndia dɔ Jakob’g loo gə́ Betel
1 Ala ula Jakob pana: Uba naŋg ḭta, aw Betel mba si keneŋ. Lée neelé i a ra loo-nékinjaməs keneŋ kar Ala, yeḛ gə́ teḛ dɔi’g loo gə́ i aḭ ŋgokɔḭ Esawu lé .
2 Jakob ula njémeekəije ləa gə deḛ lai gə́ d’isi səa lé pana: Tɔrje magəje gə́ dɔ ɓee’d gə́ to mbuna sí’g lé gə́ raŋg ləm, togoje rɔ sí ləma, tel tulaje kubuje gə́ raŋg rɔ sí’g ləm tɔ. 3 Jeḛ j’a kḭ tuga loo kaw Betel. Lée gə́ neelé ɓa m’a ra loo-nékinjaməs keneŋ kar Ala, yeḛ gə́ oo ndum mee ndɔ gə́ ma m’nai ne dan nékəmndoo’g ləm, gə nai səm loo-mbá gə́ ma m’aw keneŋ lé ləm tɔ.
4 Deḛ d’odo magəje gə́ dɔ ɓee’g lai gə́ to ji dee’g ləm, gə mbaiŋgiraje gə́ to mbi dee’g ləm tɔ d’ar Jakob. Ndá Jakob iya dee gel kag gə́ ɓaree térébḭtə gə́ to mbɔr Sikem’g dəb. 5 Gée gə́ gogo deḛ d’ɔd d’aw tɔ. Ɓəl Ala gə́ to ɓəl gə́ boo lé oso dɔ ɓee-booje’g lai gə́ gugu dɔ dee ndá deḛ tuba goo ŋgalə Jakob lé el.
6 Jakob gə deḛ lai gə́ d’aw səa lé teḛ Luj gə́ to Betel, mee ɓee gə́ Kana̰. 7 Yeḛ ra loo-nékinjaməs keneŋ ndá yeḛ unda ri loo neelé lə El-Bétel. Mbata lé gə́ neelé ɓa Ala riba səa dɔ rəa keneŋ loo gə́ yeḛ si aḭ ne ŋgokea̰ lé.
8 Debora, njeŋgəm Rebeka lé wəi ar deḛ dubee no̰ Betel’g mbɔr kag-sɛnə gə́ d’unda ria lə kag-sɛnə no̰ yoo.
9 Loo gə́ yeḛ ḭ Padan-Aram ree mba̰ ndá Ala tel teḛ dɔ Jakob’g gɔl kára ɓəi ndá yeḛ tɔr ndia dəa’g. 10 Ala ulá pana: Rii lé to Jakob nɛ d’a ɓari Jakob gogo el ŋga. Rii a to Israɛl ɓa.
Ndá Ala unda ria lə Israɛl . 11 Ala ulá pana: Ma m’to Ala gə́ m’to Bao-siŋgamoŋ. Maji kari oji ŋganje bula ar dee d’ɔs goo na̰ goo na̰ ya. Ginkoji dəwje gə́ kára ləm, gə ginkoji dəwje gə́ bula ləm tɔ lé d’a kḭ rɔi’g ləm, mbaije kara d’a teḛ məəi’g ya ləm tɔ . 12 Dɔ naŋg ɓee neelé gə́ ma m’ar Abrakam gə Isaak lé m’a kari-i gə ŋgakaije gə́ d’a korè gooi gə́ ka̰ dee ya.
13 Yen ɓa Ala ḭ loo gə́ yeḛ ula Jakob ta keneŋ lé ya̰ ɔd aw tar. 14 Jakob unda nékolé-mee loo gə́ Ala ulá ta keneŋ lé, to nékolé-mee gə́ ra gə kɔr mbalje ndá yeḛ saga nékar gə́ ka̰ kai ləm, gə ubu ləm tɔ dɔ’g . 15 Jakob unda ri loo gə́ Ala ulá ta keneŋ lé lə Betel (kɔr gelee pana): Kəi lə Ala.
Kwəi lə Rasel
16 Deḛ d’uba naŋg Betel d’ḭ. Nɛ loo gə́ nai lam ɓa ya gə mba kar dee teḛ Eprata ɓəi ndá ndóo too Rasel. Ndóo lé kədərə səa yaa̰. 17 Loo gə́ ndóo lé rəa yaa̰ ndá njeteaandóo lé ulá pana: Ǝw rɔi ɓəl mbata i iŋga ŋgon gə́ diŋgam gə́ raŋg ɓəi.
18 Nɛ loo gə́ kəmə ləa a gə godo mbata yeḛ a gə kwəi ndá yeḛ unda ria lə Ben-Oni, nɛ bɔbeeje ɓaree Bḛjami.
19 Rasel wəi ndá deḛ dubee rəw gə́ aw gə́ Eprata gə́ to Betlehem. 20 Jakob unda nékolé-mee dɔɓaree’g. Nékolé-mee dɔɓar lə Rasel lé to keneŋ saar teḛ mee ndəa gən ya ɓəi.
21 Israɛl ḭ keneŋ aw ndá yeḛ la kəi-kubu ləa gir Migdal-Eder’g.
22 Loo gə́ Israɛl si dɔ naŋg ɓee’g neelé ndá Rubḛ aw to gə Bila gə́ to gamla-dené lə bɔbeeje lé. Ndá Israɛl oo taree.
Ŋgalə Jakob lai lé d’aḭ dɔg-gir-dee-joo . 23 Ŋgalə Lea ɓa ri dee to nee: Rubḛ, ŋgondər Jakob lé gə Simeo̰, gə Ləbi, gə Juda, gə Isakar, gə Jabulo̰ tɔ. 24 Ŋgalə Rasel lé ɓa ri dee to nee: Jisəb gə Bḛjami. 25 Ŋgalə Bila, yeḛ gə́ to gə́ ŋgonjelookisi lə Rasel lé ɓa ri dee to nee: Dan gə Neptali. 26 Ŋgalə Jilpa, yeḛ gə́ to gə́ ŋgonjelookisi lə Lea lé ɓa ri dee to nee: Gad gə Aser tɔ. Deḛje neelé to ŋgalə Jakob gə́ yeḛ oji dee Padan-Aram.
Kwəi lə Isaak
27 Jakob teḛ rɔ bɔbeeje Isaak’d ɓee gə́ Mamré dɔ naŋg gə́ Kirjat-Arba gə́ to Ebro̰, loo gə́ Abrakam gə Isaak d’isi keneŋ kédé lé . 28 Ləb Isaak aḭ tɔl dəa rɔ-jinaijoo (180). 29 Ndá kəmə ləa ɔr aree wəi aw iŋga keaje-je. Ləbee aḭ bula ləm, ndəaje kara asee nag ləm tɔ. Ndá ŋganeeje gə́ Esawu gə Jakob dubee tɔ.
© Ngambai Bible © Alliance Biblique du Tchad 1989, 2015.
