Esai 37 - Ngambai Bible révision (SBA2015)

Ejekias ula kula rɔ Esai gə́ to njetegginta’g dəjee ta

1 Loo gə́ mbai Ejekias oo taje neelé ndá yeḛ til kubuje ləa rəa’g hao̰-hao̰ ya̰ ula kubu-kwa-ndòo ɓa aw ne mee kəi’g lə Njesigənea̰. 2 Yeḛ ula Eliakim, njekaa dɔ kəi lə mbai ləm, gə Sebna, njendaji-maktub ləma, gə njékinjanéməsje gə́ tɔg d’unda mar deeje ləm tɔ ar dee d’ula kubu-kwa-ndòo ɓa rɔ dee’g d’aw ne rɔ Esai, njetegginta gə́ to ŋgolə Amots lé. 3 Ndá deḛ d’ulá pana: Ejekias pa togə́bè pana: ndɔ gə́ ɓogənè lé to ndɔ néurti ləm, gə ndɔ kwɔji kəmkàr ləma, gə ndɔ rɔkul ləm tɔ, mbata nai lam ba kar ŋganje teḛ meḛ ko̰ deeje’g nɛ siŋgá gə́ ka̰ koji dee ne godo. 4 Banelə Njesigənea̰, Ala ləi oo taje gə́ Rabsake pa, yeḛ gə́ ɓéeje gə́ to mbai gə́ Asiri ulá aree pa ula ne sul dɔ Ala gə́ Njesikəmba’g lé ya. Banelə Njesigənea̰, Ala ləi a kar bo̰ nérea ɔs təa’g gə goo taje lai gə́ yeḛ oo lé. Bèe ndá maji kari ra tamaji mbata koso-dəwje ləa gə́ nai ya ɓəi.

5 Loo gə́ kuraje lə mbai Ejekias lé d’aw rɔ Esai’g ndá 6 Esai ula dee pana: Aa ooje, ta gə́ seḭ a kulaje ɓée síje lé ɓa nee: Njesigənea̰ pa togə́bè pana: Maji kari ɓəl dɔ taje gə́ i oo gə́ mbai gə́ Asiri ar kuraje ləa d’ula ne sul dɔ neḛ’g lé el. 7 N’a gə kɔsee ɓɔḭ-ɓɔḭ mba kar loo gə́ yeḛ oo sorta kára ndá yeḛ a tel mee ɓee’g ləa. Tɔɓəi n’a kar dee tɔlee gə kiambas dan mee ɓee’g ləa tɔ.

Sa̰kɛrib tɔji dee jia gɔl kára tɔɓəi

2Mb 19.8-13

8 Rabsake oo to gə́ mbai gə́ Asiri ḭ Lakis aw mba rɔ gə njé gə́ Libna ndá yeḛ aw iŋgá keneŋ. 9 Yen ŋga mbai gə́ Asiri oo sorta gə́ wɔji dɔ Tiraka, mbai gə́ Etiopi gə́ pana: Aa oo, yeḛ lé ɔr rɔ aw gə mba rɔ səi. Loo gə́ yeḛ oo ta neelé ndá yeḛ ula njékaḭkulaje ləa rɔ Ejekias’g gogo pana: 10 Seḭ a kulaje Ejekias, mbai gə́ Juda togə́bè pana: Maji kar Ala ləi gə́ i ɔm məəi dəa’g lé su kəmi ari pa ne pana: Jerusalem a koso ji mbai gə́ Asiri’g el lé bèe el. 11 Aa oo, i oo ta né gə́ mbaije gə́ Asiri ra gə ɓeeje lai ləm, gə tuji gə́ deḛ tuji dee ləm tɔ ndá i lé see i a taa rɔi to gə́ ban wa! 12 See Gosan, gə Haran, gə Resep gə njé gə́ Edḛ gə́ d’isi Telasar gə́ bɔmje-je tuji dee lé see magəje lə ginkoji dəwje gə raŋg neelé taa dɔ dee wa. 13 Mbai gə́ Amat, gə mbai gə́ Arpad, gə mbai lə ɓee-boo gə́ Separbayim gə Hena gə Iba lé see d’əd ra wa.

Tamaji lə Ejekias

2Mb 19.14-19

14 Ejekias taa maktub gə́ ndaŋg lé ji njékaḭkulaje’g ndá yeḛ tura. Tɔɓəi yeḛ aw ne mee kəi’g lə Njesigənea̰ ndá ila no̰ Njesigənea̰’g 15 ra ne tamaji ta Njesigənea̰’g pana: 16 Njesigənea̰ gə́ njeboo-néje, Ala lə Israɛlje, i gə́ si dɔ kuraje gə́ dara’d gə́ ɓar dee Nékundaje gə́ dara! I nja kára ba to Ala mbata lə ɓeeko̰je lai gə́ dɔ naŋg nee ləm, i ɓa gə́ njekunda dara gə naŋg nee ləm tɔ . 17 Njesigənea̰, maji kari tuga mbii par gə́ rɔm’g oo ne ta ləm, Njesigənea̰ maji kari teḛ kəmi aa ne loo oo. Maji kari oo ta lə Sa̰kɛrib gə́ yeḛ ula ne Rabsake aree ula ne sul dɔi-i Ala gə́ Njesikəmba’g lé. 18 Ǝi Njesigənea̰, to tɔgərɔ ya, mbaije gə́ Asiri tuji ginkoji dəwje gə raŋg lai gə ɓeeje gə́ wɔji dɔ dee ya ləm, 19 d’ɔm magəje lə dee dan pər’g ya ləm tɔ, nɛ dee to Ala el, to néje gə́ ji dəwje ɓa ra dee gə kag əsé mbal, yee ɓa deḛ tuji dee ne ya. 20 Ɓasinè, Njesigənea̰, Ala lə sí, ɔr sí ji Sa̰kɛrib’g gə mba kar ɓeeko̰je gə́ dɔ naŋg nee lai d’oo to gə́ i nja kára ba to Njesigənea̰!

Esai tel gə ta lə Njesigənea̰ ar Ejekias

2Mb 19.20-34

21 Yen ŋga Esai, ŋgolə Amots ula kula rɔ Ejekias’g pana: Njesigənea̰, Ala lə Israɛlje pa togə́bè pana: Neḛ n’oo tamaji gə́ i ra ta neḛ’g wɔji ne dɔ Sa̰kɛrib, mbai gə́ Asiri ya. 22 Aa oo, ta gə́ Njesigənea̰ pa wɔji ne dəa ɓa nee:

Ŋgoma̰də gə́ to ŋgon dené gə́ Sio̰

Ǝ̰jii bəḭ-bəḭ ləm, yeḛ kogo dɔi’g ləm tɔ,

Ŋgon dené gə́ Jerusalem

Tuga dəa jəgm-jəgm gooi’g kən tɔ.

23 See na̰ ɓa i tajee ila ne ndɔl dəa’g wa.

See na̰ ɓa i ndɔḭ ndui dəa’g ləm,

I teḛ kəmi bəsəsə dəa’g ləm wa.

Dɔm ma gə́ m’to Njerɔkunda lə Israɛlje lé ya wa.

24 I ula sul dɔ Mbaidɔmbaije’g gə ndu kuraje ləa

Ndá i pana:

Mbɔl dɔ pusu-rɔje ləi gə́ dum tura ɓa

I teḛ ne dɔ sém mbalje gə́ Liba̰,

I tuga kag-sɛdrəje ləa gə́ ŋgal d’unda mar deeje ləm,

Gə kag-siprɛsje ləa gə́ maji d’unda mar deeje ləma,

I aw njal teḛ ne sém kagje’g ləa

Gə́ to mee kag-kɔr’g ləa

Gə́ to asəna gə loo-ma̰a-kagje bèe ləm tɔ.

25 I uru bwa-manje ndá

I ai manje gə́ dɔɓee’g,

Tɔɓəi dabla gɔli ɓa i a kar baaje lai gə́ Ejiptə

Tudu ne kurum-kurum tɔ.

26 See néje gə́ teḛ lé

I oo to gə́ neḛ ɓa n’wa dɔ gɔl dee ləw ba ləm,

N’wɔji mee neḛ’g njaŋg kédé gə́ ləw lé ləm tɔ el wa.

Ɓasinè n’ar dee d’aw lée’g béréré,

Yee gə́ bèe ɓa n’ya̰ loo n’ari

Ar ɓee-booje gə́ siŋga dee to lé

Tel to d’asəna gə néje gə́ d’wa dee kugu dɔ na̰’d bèe.

27 Dəwje gə́ d’isi keneŋ lé

Siŋga dee godo ləm,

Ɓəl unda dee badə gaŋg dee ləma,

Rɔkul ra dee ləm tɔ,

Deḛ to d’asəna gə mu gə́ wala ləm,

Gə mu gə́ idi sigi ləm,

To d’asəna gə mu gə́ uba dɔ kəi’g ləma,

To d’asəna gə kó gə́ tudu lal kunda kuree bèe ləm tɔ.

28 Nɛ neḛ n’gər loo gə́ i si naŋg ləm,

Gə loo gə́ i teḛ raga əsé andə kəi ləma,

Gə loo gə́ məəi ḭ səi jugugu dɔ neḛ’g ləm tɔ.

29 Mbata məəi ḭ səi jugugu dɔ neḛ’g ya

Ar ta beelé ləi aw njal oso mbi neḛ’g tɔ.

Ndá n’a kula niŋga lə neḛ əmi’g ləm,

Gə kéŋgəlé lə neḛ tai’g ləm tɔ,

Tɔɓəi n’a kari tel gə rəw gə́ i ḭ keneŋ ree lé ya.

30 Maji kari oo né nee gə́ a tɔjii lé: Dəw sɔ kandə kó gə́ oso naŋg mee ləb gə́ kára tɔɓəi kal gə́ raŋg ndá yeḛ sɔ da-kó gə́ uba gə karee ba tɔ. Nɛ ləb gə́ njekɔm’g munda ndá seḭ a dubuje kó ndá seḭ a kinjaje ləm, seḭ a ma̰aje nduúje ndá seḭ a sɔje kandə dee ləm tɔ. 31 Ges gel-bɔje lə Juda gə́ d’a gə nai lé d’a tel kula ŋgira dee gə́ sigi naŋg mag-mag gogo gə d’a kandə gə Kandə dee njim-njim gə́ tar tɔ. 32 Mbata ges dee gə́ nai lé d’a kunda loo mee ɓee gə́ Jerusalem teḛ ləm, deḛ gə́ d’aji lé d’a kḭ dɔ mbal gə́ Sio̰ ree ləm tɔ.

33 Gelee gə́ nee ɓa Njesigənea̰ pata nee njaŋg wɔji ne dɔ mbai gə́ Asiri pana: Yeḛ a kandə mee ɓee-boo’g ləa nda̰ el ləm, yeḛ a kur ɓandaŋg ləa keneŋ el ləm, yeḛ a teḛ kaar nea̰’g gə dərje ləa el ləma, yeḛ a kuba dɔndalje gə mba kaw rɔ ne səa el ləm tɔ. 34 Yeḛ a tel dəa gə rəw gə́ yeḛ ree ne ɓó yeḛ a kandə mee ɓee-boo’g neelé nda̰ el, Njesigənea̰ ɓa pa bèe. 35 N’a kaḭ bada dɔ ɓee-boo’g neelé gə mba kajee mbata lə neḛ ləm, gə mbata lə kura lə neḛ Dabid ləm tɔ.

Kaḭ lə Asirije gə kwəi lə Sa̰kɛrib

2Mb 19.35-37

36 Yen ŋga kura lə Njesigənea̰ unda loo teḛ kunda dəwje tɔl dee as tɔl-dɔg-loo tɔl dəa rɔ-jinaijoo giree-mi (100.085) loo-si Asirije’g. Loo gə́ d’ḭta gə ndɔ ndá aa oo, nin dəwje to naŋg rib-rib tɔ. 37 Togə́bè ɓa Sa̰kɛrib, mbai gə́ Asiri lé ḭ loo-siée’g tel aw ɓee ndá si Ninibə. 38 Nɛ ndɔ kára bèe loo gə́ yeḛ unda barmba mee kəi’g lə Nisrok gə́ to magə ləa ndá Adramelek gə Sareser gə́ to ŋganeeje lé tɔlee gə kiambas ndá d’aḭ d’aw d’isi ɓee gə́ Ararat. Nɛ ŋgonee Esar-Hado̰ ɓa o̰ ɓee toree’g tɔ.