Aman ula dəa no̰ Mardose’g
1 Mee tilee’g neelé ɓi wa kəm mbai el ndá yeḛ ar dee ree gə maktub gə́ ndaŋg sorta néraje lə mbaije keneŋ lé. Bèe ɓa deḛ tura no̰ mbai’g ndá 2 deḛ d’iŋga ta gə́ Mardose pa riba ne dɔ ta lə Bigtan gə Teres, njékaa dɔ néje lə mbai joo gə́ to njéŋgəm tarəwkɔgje tɔ, to gə́ deḛ ɓa d’o̰ njuma̰ tɔl Asuerus, mbai lé . 3 Mbai lé dəji pana: See né riɓar gə rɔnduba gə́ ban ɓa Mardose iŋga mbata né gə́ yeḛ ra bèe lé wa. Deḛ gə́ njéra né kar mbaije lé pana: Yeḛ iŋga né kára el.
4 Yen ŋga mbai dəji pana: See na̰ ɓa aar mee gadloo’g lé wa.
Aman ɓa ree mee gadloo gə́ raga gə́ to mee kəi’g lə mbai gə mba dəji mbai kar dee ɗar Mardose dɔ kag’d gə́ yeḛ gɔl wɔji ne dəa lé. 5 Kuraje lə mbai tel d’ilá keneŋ pana: Aman ɓa aar gadloo’g ya. Ndá mbai pana: Areeje ree kəi.
6 Aman andə kəi ndá mbai dəjee pana: See ɗi ɓa kəm ra gə dəw gə́ mbai ndigi kula rɔnduba dəa’g wa. Aman pa mée’g pana: See na̰ ɓa unda dɔm-ma’g joo ɓa mbai ndigi kula rɔnduba dəa’g tɔɓəi wa.
7 Aman tel ila mbai keneŋ pana: Dəw gə́ mbai ndigi kula rɔnduba dəa’g ndá 8 maji kar dee ree gə kubu-ko̰ɓee gə́ mbai ula ləm, gə kunda kuba mbai gə́ d’ula dɔgugu-ko̰ɓee dəa’g ləm tɔ ndá 9 maji kar dee d’ar dəw gə́ boo kára mbuna ŋgan-mbaije’g lə mbai kubu neelé gə kunda neelé mba karee ula kubu neelé rɔ dəw gə́ mbai ndigi kula rɔnduba dəa’g lé ləm, maji karee njaa gə kunda unda ne ndaa-loo gə́ mee ɓee-boo’g dana gaŋg ləma, kar dee d’ila mber nea̰’g ləm tɔ pana: Yee ɓa gə́ né gə́ deḛ ra gə dəw gə́ mbai ndigi kula rɔnduba dəa’g lé.
10 Mbai lé ula Aman pana: Ɔd kalaŋ un kubu ləm, gə wa kunda ləm tɔ, to gə́ i pa lé ndá aw ra ne togə́bè gə lə Mardose gə́ to Jip gə́ si tarəwkɔg’d lə mbai lé. I a kya̰ né kára kara gə́ i pa lé lal ra el tɔ.
11 Yen ŋga Aman un kubu ləm, gə wa kunda ləm tɔ ndá yeḛ ula kubu rɔ Mardose’g tɔɓəi yeḛ njaa gə kunda unda ne ndaa-loo dan ɓee-boo lé dana gaŋg ləm, yeḛ ila mber nea̰’g pana: Yee ɓa gə́ né gə́ deḛ ra gə dəw gə́ mbai ndigi kula rɔnduba dəa’g lé. 12 Mardose tel aw tarəwkɔg’d lə mbai ndá Aman ɔd gə tɔgee aw kəi ləa gə kəmndoo ləm, yeḛ ila né dəa’g ləm tɔ. 13 Aman ɔr sor néje lai gə́ teḛ dəa’g lé ar Jeres gə́ to dené ləa ləm, gə deḛ lai gə́ to baokuraje ləa ləm tɔ. Yen ŋga deḛ lai gə́ to njékwɔjita-kəmkàrje ləa ləm, gə Jeres, dené ləa ləm tɔ d’ulá pana: Ɓó lé Mardose gə́ i un kudu koso kas nea̰’g lé to gə́ ginkoji Jip ndá i a kaskəm ra səa né kára el nɛ i ɓa a koso kas nea̰’g ya.
14 Loo gə́ d’aw d’ulá ta bèe-bèe ɓəi ndá njékaa dɔ néje lə mbai ree ndá léegəneeya d’aw gə Aman loo muru-gad gə́ Este gɔl lé.
© Ngambai Bible © Alliance Biblique du Tchad 1989, 2015.
