2 Sôrta Gḭka Israɛlje 29 - Ngambai Bible révision (SBA2015)

Mbai Ejekias tel unda kəi lə Njesigənea̰ gə kəmee

1 Ləb Ejekias aḭ rɔ-joo-giree-mi ɓa yeḛ tel to mbai ndá yeḛ si Jerusalem o̰ ne ɓee as ləb rɔ-joo-giree-jinaikara. Kea̰je ria lə Abija, ŋgolə Jakari. 2 Yeḛ ra né gə́ danasur kəm Njesigənea̰’g aree aw na̰’d béréré gə keaje Dabid.

3 Ləb ko̰ɓee ləa gə́ dɔtar, mee naḭ gə́ dɔtar’g lé ɓa yeḛ tɔr ne tarəw kəije lə Njesigənea̰ ndá yeḛ gɔl dee ne. 4 Yeḛ ar njékinjanéməsje gə Ləbije ree ndá yeḛ mbo̰ dee ndaa-loo’g par gə́ bər 5 tɔɓəi yeḛ ula dee pana: Ləbije, maji kar sí ooje ta ləm! Ɓasinè, maji kar sí undaje rɔ sí gə kəmee ləm, undaje kəi lə Njesigənea̰, Ala lə bɔ síje-je gə kəmee ləm tɔ ndá néje gə́ mina̰ lé ɔrje mee loo gə́ to gə kəmee aw ɔmje gir loo gə́ raga. 6 Mbata bɔ síje-je ra kaiya, deḛ ra né gə́ majel kəm Njesigənea̰, Ala’g lə sí ləm, deḛ d’ubá d’yá̰ ləm, deḛ d’un kəm dee rəw dɔ kəi-kubu-kiŋga-na̰’g lə Njesigənea̰ ləma, deḛ tel gir dee d’ila d’aree ləm tɔ. 7 Deḛ d’udu tarəwkəije gə́ wɔji dɔ gel-jala kara ləm, deḛ tɔl pərndɔje ləma, deḛ tuu né gə́ ə̰də sululu əsé d’inja nékinjanéməsje gə́ ka̰ roo mee loo gə́ to gə kəmee’g d’ar Ala lə Israɛlje lé el ləm tɔ. 8 Gelee gə́ nee ɓa oŋg lə Njesigənea̰ kara oso ne dɔ Judaje’g gə njé gə́ Jerusalem’g ndá yeḛ ar néɓəŋgərəti dəb dɔ dee’g ar dee tel to ne né gə́ ra dəwje ɓəl gə nékula sul dɔ’g to gə́ seḭ ooje ne gə kəm sí neelé tɔ. 9 Togə́bè ɓa bɔ síje-je d’wəi ne yoo-kiambas ləm, ŋgan síje gə́ diŋgam gə njé gə́ dené gə denéje lə sí tel to ne gə́ ɓərje ləm tɔ. 10 Gelee gə́ nee ɓa m’wɔji gə mba kar síjeḛ gə Njesigənea̰, Ala lə Israɛlje manrɔ sí j’ar na̰ gə mba kar oŋg ləa gə́ o̰ to gə́ pər bèe lé wəi ne dɔ sí’g bèm ya. 11 Ɓasinè, ŋganəmje, maji kar sí əwje rɔ sí ndoo bao dɔ’g, mbata Njesigənea̰ mbər sí gə mba kar sí aarje nea̰’g raje ne kula ləa ləm, gə mba kar sí toje kuraje ləa ləma, gə mba tuuje néje gə́ ə̰də sululu kaareeje ləm tɔ.

12 Yen ŋga Ləbije ɓa d’ḭ d’aar tar, deḛ lé ri dee ɓa nee: Mahat, ŋgolə Amasai, gə Joɛl, ŋgolə Ajaria, deḛ gə́ to Keatje, mbuna Merarije’g lé ndá Kis, ŋgolə Abdi, gə Ajaria, ŋgolə Jealelel, mbuna Gerso̰je’g ndá Joa, ŋgolə Jima, gə Edḛ, ŋgolə Joa, 13 mbuna ŋgalə Elisapan’g ndá Simri gə Jeyel, mbuna ŋgalə Asap’g ndá Jakari gə Matania, 14 mbuna ŋgalə Heman’g ndá Jehiel gə Simei, mbuna ŋgalə Jedutun’g ndá Semaeja gə Ujiel. 15 Deḛ mbo̰ ŋgako̰ deeje dɔ na̰’d ɓa loo gə́ deḛ d’unda rɔ dee gə kəmee ndá deḛ ree mba kɔr néje gə́ mina̰ mee kəi’g lə Njesigənea̰ gə goo ndukun lə mbai lé ləm, gə goo taje lə Njesigənea̰ ləm tɔ. 16 Njékinjanéməsje d’andə d’aw mee kəi’g lə Njesigənea̰ gə mba kɔr néje gə́ mina̰ keneŋ. Deḛ d’ɔr néje lai gə́ mina̰ gə́ to mee kəi’g lə Njesigənea̰ d’ɔm gadloo gə́ wɔji dɔ kəi lə Njesigənea̰ lé, lé gə́ neelé ɓa Ləbije d’odo d’aw ne raga d’aw d’ɔm kəm-rəw-mán gə́ Sedro̰. 17 Deḛ d’un kudu kɔr néje gə́ mina̰ neelé mee ndɔ gə́ dɔtar’g lə naḭ gə́ dɔtar ndá, ndɔ jinaijoo lə naḭ gə́ neelé ɓa deḛ d’andə mee gel-jala’g lə Njesigənea̰ tɔɓəi deḛ ra kula as ndɔje jinaijoo mba kɔr ne néje gə́ mina̰ mee kəi’g lə Njesigənea̰, ndá ndɔ gə́ njekɔm’g dɔg-giree-misa̰ lə naḭ gə́ dɔtar lé deḛ tɔl kula neelé keneŋ bém ya.

18 Gée’g gogo deḛ d’aw mee kəi’g lə mbai Ejekias ndá, d’ulá pana: Jeḛ j’ɔr kəi lə Njesigənea̰ lai j’unda gə kəmee, loo-nékinjaməs gə́ ka̰ roo né gə nékulaje lai gə́ wɔji dəa ləm, gə tabul kunda muru gə́ to gə kəmee dɔ’g gə nékulaje lai gə́ wɔji dəa ləm tɔ. 19 Nékulaje lai gə́ mbai Ahas ila ndɔl dɔ dee’g mee ləb ko̰ɓee’g ləa loo gə́ yeḛ ra néje gə́ kori-kori lé jeḛ n’tel n’gɔlje néje neelé lée’g ndá j’unda deeje gə kəmee, bèe ɓa néje lé to no̰ loo-nékinjaməs’g lə Njesigənea̰ tɔ.

Ejekias tel tum gin kwa dɔ na̰ gə kinja néməs gogo

20 Mbai Ejekias ḭta gə ndɔ rad mbo̰ ŋgan-mbaije gə́ mee ɓee-boo’g neelé aw sə dee mee kəi’g lə Njesigənea̰. 21 Deḛ d’inja bɔ maŋgje siri ləm, gə bàl badje siri ləm, gə ŋgan badje siri ləma, gə bàl bya̰je siri ləm tɔ gə́ nékinjaməs gə́ ka̰ kuga dɔ kaiya mbata lə ɓeeko̰ ləm, gə mbata lə loo gə́ to gə kəmee ləma, gə mbata lə Judaje ləm tɔ. Mbai lé un ndia ar njékinjanéməsje gə́ to ŋgaka Aaro̰ gə mba kar dee-deḛ ya d’inja nékinjanéməsje neelé dɔ loo-nékinjaməs’g lə Njesigənea̰. 22 Njékinjanéməsje tḭja gwɔb bɔ maŋgje ndá deḛ taa məs dee d’aw saga dɔ loo-nékinjaməs’g, deḛ tḭja gwɔb bàl badje ndá deḛ taa məs dee d’aw ne d’aw saga dɔ loo-nékinjaməs’g, deḛ tḭja gwɔb ŋgan badje ndá taa məs dee d’aw saga dɔ loo-nékinjaməs’g tɔ. 23 Gée gə́ gogo deḛ ree gə bàl bya̰je gə́ nékinjaməs gə́ ka̰ kuga dɔ kaiya lé no̰ mbai’g ləm, gə no̰ koso-dəwje gə́ mbo̰ dɔ na̰’g ləm tɔ ndá deḛ d’ɔm ji dee dɔ bàl bya̰je’g neelé. 24 Njékinjanéməsje tḭja gwɔb dee ndá taa məs dee d’aw tər gɔl loo-nékinjaməs’g mba kuga ne dɔ kaiyaje lə Israɛlje lai, mbata mbai lé un ndia ar dee d’inja ne nékinjaməs gə́ ka̰ roo ləm, gə nékinjaməs gə́ ka̰ kuga dɔ kaiya ləm tɔ mbata lə Israɛlje lai ya.

25 Yeḛ ar dee d’unda Ləbije mee kəi’g lə Njesigənea̰ gə ma̰dje gə́ sa səgə-səgə ləm, gə kṵdu-ko̰déje ləma, gə kṵdu-kagje ləm tɔ ji dee’g gə goo rəw gə́ Dabid ləm, gə Gad gə́ njekoota ta Ala’g lé mbata lə mbai ləma, gə Natan gə́ to njetegginta d’wɔji ləm tɔ, mbata to ndukun gə́ Njesigənea̰ ɓa un ar njéteggintaje pa taree ya. 26 Ləbije d’aar loo-kaar dee’g gə nékimje gə́ Dabid ar dee ra lé ji dee’g ləm, njékinjanéməsje d’aar loo-kaar dee’g gə to̰to̰je ji dee’g ləm tɔ. 27 Ejekias un ndia mba kar dee d’inja nékinjaməs gə́ ka̰ roo dɔ loo-nékinjaməs’g, loo gə́ d’un kudu roo né ndá léegəneeya d’un kudu kɔs pa lə Njesigənea̰ to gə ndu to̰to̰je ləm, gə ndu nékimje gə́ Dabid gə́ to mbai lə Israɛlje kédé lé ar dee ra ləm tɔ. 28 Koso-dəwje lai d’unda barmba d’ar njékɔspaje d’ɔs pa kula rɔnduba dɔ Njesigənea̰’g ləm, d’im to̰to̰je ləm tɔ saar d’ar kula nékinjaməs gə́ ka̰ roo lé godo ne. 29 Tɔɓəi loo gə́ d’unda ŋgaŋ kula nékinjaməs gə́ ka̰ roo lé mba̰ ndá mbai ləm gə deḛ lai gə́ d’aar səa lé d’ɔs kəji dee naŋg d’unda barmba tɔ. 30 Yen ŋga mbai Ejekias gə ŋgan-mbaije d’un ndu dee d’ar Ləbije mba kar dee pidi Njesigənea̰ gə paje lə Dabid, gə ka̰ Asap, njetegginta lé, ndá deḛ pidee gə boo-rɔkal ləm, d’ɔs kəji dee naŋg d’unda barmba ləm tɔ.

31 Ejekias un ta pa togə́bè pana: Ɓasinè gə́ seḭ undaje rɔ sí gə kəmee arje Njesigənea̰ mba̰ nee lé maji kar sí rəmje pər gə́ rəa’g gə nékulje inja deeje gə́ nékinjanéməsje gə́ ka̰ kɔm na̰’d mee kəi’g lə Njesigənea̰. Ndá koso-dəwje ree gə nékinjanéməsje tɔɓəi d’inja nékinjanéməsje gə́ ka̰ kɔm na̰’d ləm, deḛ lai gə́ d’ḭ gə meenoji gə́ meḛ dee’g lé d’inja nékinjanéməsje gə́ ka̰ roo ləm tɔ. 32 Bula lə nékinjanéməsje gə́ ka̰ roo gə́ koso-dəwje d’inja d’ar lé as bɔ maŋgje rɔ-siri ləm, gə bàl badje tɔl (100) ləma, gə ŋgan badje tɔl-joo (200) ləm tɔ, nékulje nee lai lé deḛ tɔl dee gə́ nékinjaməs gə́ ka̰ roo kar Njesigənea̰ ya. 33 Tɔɓəi bɔ maŋgje tɔl-misa̰ (600) ləm, gə bàl badje tɔl-dɔg-loo-munda (3.000) ləm tɔ lé d’unda dee gə kəmee. 34 Nɛ bula lə njékinjanéməsje ɓa lam ba ndá d’askəm tó ndar da-nékinjanéməsje lé lai el, ŋgako̰ deeje gə́ to Ləbije la sə dee saar d’ar kula neelé godo tɔɓəi saar loo gə́ njékinjanéməsje gə́ raŋg d’unda rɔ dee gə kəmee mbata Ləbije lé kunda rɔ dee gə kəmee wa meḛ dee-deḛ unda njékinjanéməsje tɔ. 35 Nékinjaməsje gə́ raŋg gə́ ka̰ roo lé to yaa̰ gə ubu nékinjanéməsje gə́ ka̰ kɔm na̰’d ləm, gə néje gə́ ka̰ tər naŋg gə́ wɔji dɔ nékinjanéməsje gə́ ka̰ roo ləm tɔ.

Bèe ɓa deḛ tel gɔl ne kulaje mee kəi’g lə Njesigənea̰ lé gogo. 36 Ejekias gə koso-dəwje lai d’al rɔ dee gə mba né gə́ Ala ra gɔl ne meḛ koso-dəwje mbata né neelé deḛ ra tɔl kalaŋ ya.