Maji gər loo kwa noji
1 Ila muru ləi dan mán’g as ndɔje bula ndá i a tel kiŋga ɓəi. 2 Kai nébaoje ləi ar dəwje loo sirije əsé loo jinaijooje’n bèe mbata i gər némeeko̰ gə́ a ree dɔ naŋg neelé el. 3 Loo gə́ ndi il yaa̰ ndá ər dɔ naŋg nee. Ɓó lé kag oso par gə́ dɔkɔl əsé dɔgel ndá yee to lé’d gə́ yeḛ oso keneŋ lé ya tɔ. 4 Yeḛ gə́ aa lel gə́ kaa lé a dubu né el ləm, yeḛ gə́ aa kil-lə-ndi gə́ kaa kara a kinja dɔ kó el ləm tɔ. 5 To gə́ i gər rəw gə́ lel ḭ keneŋ ula el ləm, i gər loo siŋga ŋgon gə́ tɔs ta na̰’d mee dené’d gə́ aw gə kèm lé el ləm tɔ lé, togə́bè ɓa i gər kula gə́ Ala ra dɔ néje’g lai lé el tɔ. 6 Gə ndɔ rad lé dubu nédubu ləi ləm, ar jii wa rəa kàrkemetag el ləm tɔ. Mbata i gər né gə́ a gə teḛkɔr lé el, yee gə́ yo əsé yee gə́ nee, əsé ɓó lé deḛ joo bɔr maji d’asəna kara i gər el tɔ.
7 Lookàr to né gə́ maji ya ləm, kar kəm dəw oo kàr lé to né gə́ maji ya ləm tɔ. 8 Bèe ndá ɓó lé dəw kára si kəmba ləbje bula ndá maji karee al rəa mee ləbje gə́ bula’g lai neelé. Nɛ maji karee ə̰ji dɔ ndɔje gə́ loondul a dəb dɔ dee’d gə́ d’a gə bula lé tɔ, néje lai gə́ d’a gə ree lé to néje gə́ gə mḭdé ba ya.
Ar sí n’raje rɔlel nà kàree a gə dəs
9 I basa lé maji kari al rɔi loo nai basa’g ləi ləm, ya̰ məəi ar rɔlel mee ndɔje lai gə́ i to ne gə́ basa lé ləm, njaa gə goo rəwje gə́ məəi wɔji ləma, gə goo loo gə́ kəmi oo lé ləm tɔ. Nɛ maji kari gər gao to gə́ néje lai neelé Ala a gə kar dee ree dɔi’g loo-gaŋg-rəwta’g ya ɓəi. 10 Ɔs némeeko̰ gə́ to məəi’g rəw ləm, unda rɔi ɓad dɔ né gə́ majel’g ləm tɔ, mbata ləb nai basa gə dɔ gə́ lal pudu ɓəi lé ləm kara to néje gə́ gə mḭdé ba ya tɔ.
© Ngambai Bible © Alliance Biblique du Tchad 1989, 2015.
