Kunda kəi gə́ to gə kəmee lé
1Mb 6.1-381 Salomo̰ un kudu kunda kəi lə Njesigənea̰ mee ɓee gə́ Jerusalem, dɔ mbal’d gə́ Morija, loo gə́ Njesigənea̰ teḛ dɔ bɔbeeje Dabid’g ar Dabid wa dɔ gɔlee loo-kunda-kó’g lə Ornan gə́ to dəw gə́ Yebus lé . 2 Yeḛ un kudu kunda kəi lé mee ndɔ gə́ njekɔm’g joo mee naḭ gə́ njekɔm’g joo mee ləb ko̰ɓee’g ləa gə́ njekɔm’g sɔ lé ya.
3 Aa ooje, loo tum gə́ Salomo̰ tum gel kəi-Ala ɓa nee: Ŋgalee gə goo kwɔji loo nétura gə́ ləw lé as kəmkil dəw rɔ-misa̰ ləm, tadee as kəmkil dəw rɔ-joo ləm tɔ. 4 Kəi-jala gə́ to no̰ kəi’g lé ŋgalee as tad kəi béréré ndá as kəmkil dəw rɔ-joo ləm, dəree gə́ ḭ gə́ tar as kəmkil dəw tɔl-dəa-rɔ-joo (120) ləm tɔ, Salomo̰ ar dee d’ɔr mee kəi lé gə larlɔr gə́ àr ŋgad-ŋgad ya lai. 5 Mee kəi gə́ boi lé deḛ tɔs kag-siprɛs keneŋ dém-dém ləm, d’ɔr mée gə larlɔr gə́ àr ŋgad-ŋgad ləma, gə ndaji kam kiaŋgar gə kúla larje to gə́ ba̰də keneŋ ləm tɔ. 6 Deḛ ra kaar kəi lé gə jərje gə́ gad dee to yaa̰ mba kar dee ndaŋg ne mèr ya, larlɔr lé to larlɔr gə́ d’ḭ ne Parbayim tɔ. 7 Deḛ d’ɔr gaji kag kəije’g ləm, gə tarəwkəije’g ləm, gə kaar kəi’g ləm, gə tabidi-rəwkəije’g ləm tɔ gə larlɔr, tɔɓəi yeḛ ar dee ndaji Nékundaje gə́ dara kaar kəi’g lé tɔ.
8 Deḛ ra kəi gə́ to gə kəmee doi, ŋgalə gə́ as tad kəi béréré lé as kəmkil dəw rɔ-joo ləm, tadee kara as kəmkil dəw rɔ-joo ləm tɔ. Deḛ d’ɔr gə larlɔr gə́ àr ŋgad-ŋgad gə́ kwɔi ləa as nékwɔji kwɔi-lə-né tɔl-dɔg-loo-rɔ-joo (20.000) , 9 ŋgawlarje gə́ ka̰ ɓər né gə́ ra dee gə larlɔr lé kwɔi lə dee as ges nékwɔji kwɔi-lə-né. Deḛ d’ɔr ŋgan kəije gə́ dɔ maree’g tar lé gə larlɔr tɔ.
10 Mee kəi gə́ to gə kəmee doi lé deḛ tɔl né ndaji ne Nékundaje gə́ dara joo keneŋ ndá d’ɔr gir dee gə larlɔr . 11 Bag néndaji Nékundaje gə́ dara lé ŋgal dee as kəmkil dəw rɔ-joo. Bag yeḛ gə́ doŋgɔr lé ŋgal as kəmkil dəw mi ndá ɔrɔ rɔ kaar kəi ləm, yeḛ gə́ kára ŋgal as kəmkil dəw mi tɔ, ar ta tel bagee aw iŋga bag néndaji Nékunda gə́ dara gə́ njekɔm’g joo lé rib tɔ. 12 Bag néndaji Nékunda gə́ dara gə́ njekɔm’g joo lé ŋgal as kəmkil dəw mi, aw saar ɔrɔ rɔ kaar kəi, ndá bagee gə́ kára ŋgal as kəmkil dəw mi tɔ, ar ta tel bagee aw iŋga bag Nékunda gə́ dara gə́ doŋgɔr lé rib. 13 Néndaji Nékundaje gə́ dara neelé naji bag dee ndá ŋgal as kəmkil dəw rɔ-joo. Deḛ d’aar tar gə gɔl dee, tel kəm dee gə́ dɔ kəi’g lé tɔ.
14 Deḛ ra kubu gaŋg ne mee kəi gə́ to bədələ ləm, gə ndul piro-piro ləma, gə kas njir-njir ləm tɔ, kubu neelé d’ṵji gə kúla palégal ndá deḛ ndaji Nékundaje gə́ dara lé keneŋ tɔ .
Gaji kagje gə́ ra gə larkas gə́ loo nékinjaməs
1Mb 7.15-2215 Deḛ ra gaji kagje joo gə́ ŋgal dee as kəmkil dəw rɔ-munda-giree-mi no̰ kəi’d gə́ to gə kəmee ləm, gə mburṵ gə́ tula dɔ dee’d gə́ dər dee as kəmkil dəw mi-mi ləm tɔ. 16 Deḛ ra kúla-yeŋgəre asəna gə ba̰də to gə́ dee gə́ to mee kəi’d gə́ to gə kəmee ndá deḛ tula dee sém gaji kagje’g lé tɔɓəi deḛ ra né ndaji ne kandə dḭ bèe as tɔl (100) ndá na dee keneŋ tɔ. 17 Deḛ d’ur gaji kagje lé no̰ kəi gə́ to gə kəmee’g ar yeḛ gə́ kára to par dɔkɔl ləm ar yeḛ gə́ raŋg to par gə́ dɔgel ləm tɔ, Yeḛ gə́ dɔkɔl lé yeḛ unda ria lə Jakḭ, tɔɓəi yeḛ gə́ to gə́ dɔgel ndá yeḛ unda ria lə Boaj tɔ.
© Ngambai Bible © Alliance Biblique du Tchad 1989, 2015.
