Ebje lə njé’g lə Koré
1 Njesigənea̰ ula Moyis pana: 2 Ula Eləajar, ŋgolə Aaro̰ gə́ to njekinjanéməs mba karee tɔr əb gə́ to dan pər’g mba kɔm pər gə́ mee dee’g əw, mbata əb lé to néje gə́ to gə kəmee. 3 Ebje lə dəwje neelé gə́ ra kaiya gə́ ɔm dee loo-yoo’g lé maji kar dee d’unda dee gə mo̰ mba ra ne mbɔrje gə́ tad mba ko̰ ne dɔ loo-nékinjaməs. Mbata to né gə́ d’unda no̰ Njesigənea̰’g d’aree to né gə́ to gə kəmee mba̰, bèe ɓa d’a to ne nékolé-mee mbata lə Israɛlje.
4 Eləajar gə́ to njekinjanéməs lé odo əbje gə́ ra gə larkas gə́ to ka̰ dee gə́ pər roo dee ndá yeḛ kunda dee gə mo̰ ra gə́ mbɔrje o̰ ne dɔ loo-nékinjaməs lé tɔ. 5 Yee ɓa to nékolé-mee mbata lə Israɛlje mba kar dəw gə́ rara gə́ to gə́ ginkoji’g lə Aaro̰ el lé a rəm gə́ keneŋ mba tuu né gə́ ə̰də sululu no̰ Njesigənea̰’g el ləm, a to asəna gə Koré gə kudu-dəwje ləa el ləm tɔ gə goo ta gə́ Njesigənea̰ pa gə ndu Moyis.
Boo-dəwje jém ta d’im ne rɔ dee dɔ Moyis gə Aaro̰’g
6 Bèlè lookàree, koso-dəwje gə́ Israɛl lai jém ta d’im ne rɔ dee dɔ Moyis gə Aaro̰’g pana: Seḭ nja tɔlje dəwje lə Njesigənea̰ lé.
7 Togə́bè ɓa loo gə́ koso-dəwje mbo̰ dɔ na̰ mba kḭ gə Moyis gə Aaro̰ ndá deḛ tel kəm dee par gə́ kəi-kubu-kiŋga-na̰’g ndá aa oo, mum lé on dəa ar rɔnduba lə Njesigənea̰ teḛ kəm dee’g. 8 Moyis gə Aaro̰ ree d’aar no̰ kəi-kubu-kiŋga-na̰’g . 9 Njesigənea̰ ula Moyis pana: 10 Ɔrje rɔ sí mbuna koso-dəwje’g neelé ndá m’a gə tuji dee gə́ léegəneeya.
Moyis gə Aaro̰ d’oso naŋg bəbərə-bəbərə dəb kəm dee naŋg, 11 tɔɓəi Moyis ula Aaro̰ pana: Un əb ləi, ɔm pər gə́ to dɔ loo-nékinjaməs’g keneŋ ləm, ɔm né gə́ ə̰də sululu dɔ’g ləm tɔ ndá aw ne kalaŋ rɔ koso-dəwje’g mba kuga ne dɔ kaiya ra dee, mbata oŋg lə Njesigənea̰ ḭ səa jugugu ndá yoo-koso un kudu koso mba̰ ya.
12 Aaro̰ un əb to gə́ Moyis ulá lé ndá yeḛ aiŋgwɔd ree ne mbuna koso-dəwje’g, ndá aa oo, yoo-koso un kudu taa loo mba̰ ŋga. Yeḛ tuu né gə́ ə̰də sululu ləm, yeḛ ra né mba kuga ne dɔ kaiya lə koso-dəwje ləm tɔ. 13 Yeḛ aw aar dan njé gə́ d’wəi’g gə njé gə́ kəmba’g dana bab ndá yoo-koso lé əw rəa kəŋ tɔ. 14 Dəwje gə́ d’wəi yoo-koso neelé d’aḭ tɔl-dɔg-loo dɔg-giree sɔ gə dɔ dee tɔl siri (14.700) ɓa d’orè dɔ deḛ gə́ d’wəi gin kalta’g lə Koré lé tɔ. 15 Aaro̰ tel aw rɔ Moyis’g tarəw kəi-kubu-kiŋga-na̰’g. Togə́bè ɓa yoo-koso lé əw kəŋ ya.
Kag-tɔs lə Aaro̰
16 Njesigənea̰ ula Moyis pana: 17 Ula Israɛlje ta ndá taa kag-tɔs ji dee’g kára-kára gə goo ginkojije lə dee, bèe ɓa a to kag-tɔsje dɔg-gir-dee-joo wɔji ne dɔ mbaije lə deḛ lai gə goo ginkojije lə dee lə dee ya. 18 I a ndaŋg ri nana kara dɔ kag-tɔs’g ləa-ləa, tɔɓəi i a ndaŋg ri Aaro̰ dɔ kag-tɔs’g lə Ləbi, mbata kag-tɔs a to keneŋ kára-kára mbata lə mbai dɔ ginkojije lə dee kára-kára tɔ. 19 I a kɔm dee mee kəi-kubu-kiŋga-na̰’g no̰ sa̰duk nékɔrgoota’g to keneŋ loo gə́ m’iŋga sí keneŋ lé. 20 Togə́bè dəw gə́ m’a gə mbəree lé ɓa a to yeḛ gə́ kag-tɔs ləa a kidi, bèe ɓa m’a kar rɔkim lə Israɛlje gə́ jém ta d’im ne rɔ dee dɔ sí’g lé a godo nɔm’g tɔ.
21 Moyis ula Israɛlje ta ndá mbaije lə deḛ lai d’aree kag-tɔsje, mbaije kára-kára d’aree kag-tɔs kára-kára, gə goo ginkojije lə dee lə dee ar kag-tɔsje lé d’as dɔg-giree-joo, ndá kag-tɔs lə Aaro̰ to dan ka̰ dee-deḛ’g lé tɔ. 22 Moyis ɔm kag-tɔsje neelé no̰ Njesigənea̰’g mee kəi-kubu-kiŋga-na̰ gə́ ka̰ nékɔrgoota lé. 23 Bèlè lookàree, loo gə́ Moyis andə mee kəi-kubu-kiŋga-na̰ gə́ ka̰ nékɔrgoota ndá aa oo, kag-tɔs lə Aaro̰ gə́ wɔji dɔ ginkoji lə Ləbi lé idi ləm, wa-rɔm ləm, pudu ləma, ka̰deeje gə́ ɓar dee ama̰dəje lé kas keneŋ ləm tɔ . 24 Moyis odo kag-tɔsje lai gə́ to no̰ Njesigənea̰’g ndá aw ne rɔ Israɛlje’g lai mba kar dee d’oo ləm, gə mba kar nana kara un kag-tɔs ləa-ləa ləm tɔ. 25 Njesigənea̰ ula Moyis pana: Tel gə kag-tɔs lə Aaro̰ no̰ nékɔrgoota’g mba kar dee ŋgəm asəna gə nétɔji mbata lə ŋgan njékaltaje, mba kar rɔkimje lə dee gə́ deḛ jém ne ta d’im ne rɔ dee lé a godo ləm, mba kar dee d’wəi ne el ləm tɔ.
26 Moyis ra togə́bè ya, to gə́ Njesigənea̰ un ne ndia aree lé yeḛ ra bèe ya tɔ.
Kula ra njékinjanéməsje gə Ləbije
27 Israɛlje d’ula Moyis pana: Aa oo, jeḛ j’isi j’wəije, jeḛ lai gin sí a gə kun ɗiao ya! 28 Nana ɓa gə́ ree mbɔr kəi-kubu-si-Ala gə́ to Njesigənea̰ lé dəb ndá wəi-wəi. See j’a gə kwəije bèe ya lai wa.
© Ngambai Bible © Alliance Biblique du Tchad 1989, 2015.
