1 Ŋgakɔmje, kar Israɛlje d’aji lé yee ɓa to né gə́ wa məəm gə́ m’ra ndòo rɔ Ala’g mbata lə dee. 2 Mal kwa Ala meḛ dee’g ra dee ŋgwɔd-ŋgwɔd, yee ɓa ma m’oo ginee gao, nɛ deḛ ra gə kəmkàree el. 3 Deḛ gər meekarabasur lə Ala el ndá deḛ saŋg meekarabasur gə́ ka̰ dee-deḛ ya gə dɔrɔ dee ɓó deḛ ndəd ka̰ Ala lé el. 4 Kristi ɓa gə́ rudu godndu mba kɔr ne ta dɔ deḛ gə́ d’ɔm meḛ dee dəa’g ya.
Kaji lé to mbata lə dəwje lai-lai ya
5 Tɔgərɔ ya Moyis ɔr gin meekarabasur gə́ godndu wɔji lé pana: Dəw gə́ ra née ndá a si ne kəmba ya . 6 Nɛ meekarabasur gə́ meekun wɔji lé aa ooje ta gə́ deḛ pa d’wɔji ne dəa lé pana: Maji kari pa məəi’g pana: See na̰ ɓa a kḭ kaw dara wa, pa bèe el. Mbata pea gə́ bèe ɓa wɔji dɔ kḭ kaw kun Kristi kuree naŋg ya . 7 Esé see na̰ ɓa a kaw mee bwa-wəl gə́ suna godo’g lé wa, pa bèe el mbata pea gə́ togə́bè ɓa wɔji dɔ kar Kristi teḛ dan njé gə́ d’wəi’g. 8 Ta gə́ wɔji dɔ meekun lé see pa ban wa. Kankəmta lé to rɔi’g dəb ya. To tai’g ləm, to məəi’g ləm tɔ. Yee ɓa to ta meekun gə́ jeḛ j’ila ne mber lé. 9 Ɓó lé tai teḛ ari unda ne no̰ Mbaidɔmbaije ləm, gə teḛ gə́ Ala teḛ səa dan njé gə́ d’wəi’g lé i taa gə məəi ndá i a kaji ne ya. 10 Mbata meekun gə́ gəd ɓa dəw a to ne njemeekarabasur ləm, ta meekun neelé gə́ teḛ təa’g lé yeḛ a kiŋga ne kaji ləm tɔ gə goo ta gə́ to maktub gə́ to gə kəmee lé pana: 11 Nana ɓa gə́ ɔm mée dəa’g ndá a ra kəmkul el . 12 Jib gə Grek to gə́ ɓəd-ɓəd el mbata Mbaidɔmbaije lə dee to gə́ kára ba kiao. Yeḛ lé to bao-noji mbata lə deḛ lai gə́ to njeɓar riaje lé. 13 Mbata nana ɓa gə́ a ɓar ri Mbaidɔmbaije ndá a kaji ne ya .
14 Ɓó lé deḛ d’ɔm meḛ dee dəa’g el ndá see d’a ɓar ria to gə́ banwa. Ɓó lé deḛ d’oo ta ləa el ndá see d’a kɔm meḛ dee dəa’g loo gə́ ra wa. Ɓó lé njekɔrgoota neelé kar dee godo ndá see d’a koo ta ləa loo gə́ ra wa. 15 Ɓó lé d’a kɔr dəw gə mba karee ula dee taree el ndá see dəw a kula dee wa. To gə goo ta gə́ deḛ ndaŋg mee maktub gə́ to gə kəmee lé pana: Deḛ gə́ njékaw kula mar deeje ta gə́ maji lé gɔl dee to njam-njam . 16 Nɛ deḛ lai d’ila ŋgonkoji dɔ ta gə́ maji’g lé el. Bèe ɓa Esai pa ne togə́bè pana: Mbaidɔmbaije, ta gə́ j’ɔr j’ula dee lé see na̰ ɓa ɔm mée dɔ’g wa . 17 Togə́bè ɓa korè mbi dɔ ta’g ɓa gə́ kuma̰ kar dəw un ne mée ləm, kɔr goo ta lə Kristi ɓa gə́ kuma̰ kar dəw orè ne mbia dɔ’g lé ləm tɔ.
18 Nɛ ma m’pana: See Israɛlje d’oo ta neelé el wa. Deḛ d’oo ya.
Ndu dee ɓar ɔr rudu naŋg nee rɔd ya ləm,
Ta lə dee ɔr gwɔi naŋg nee njal ləm tɔ .
19 Ma m’pa tɔɓəi pana: See Israɛl gər ginta neelé el wa. Moyis pa kédé par-par pana:
M’a kɔs gin sí kar kəmkəḭ lə sí ḭ
Dɔ koso-dəwje’g gə́ gin dee to gə́ na̰’d el lé,
M’a kula sí na̰’d kar oŋg ḭ sə sí
Dɔ ginkoji dəwje gə́ gər né el tɔ .
20 Esai kara dəa to̰ keneŋ kəw el aree pana:
Deḛ gə́ saŋg neḛ el nɛ deḛ d’iŋga neḛ ləm,
Deḛ gə́ dəji neḛ el lé neḛ n’ɔr gin rɔ neḛ n’ar dee ləm tɔ .
21 Nɛ yeḛ pata wɔji ne dɔ Israɛlje pana:
Neḛ n’duu ji neḛ par gə́ rɔ koso-dəwje
Gə́ to njékaltaje gə gɔŋgé-maḭtaje
Dɔbee’g saar kàr ur naŋg jigi .
© Ngambai Bible © Alliance Biblique du Tchad 1989, 2015.
