Maji kula rɔnduba dɔ Ala’g ya kára ba kiao
1 Ǝi Njesigənea̰, kəm kar síjeḛ ɓa j’iŋga riɓar el,
Kəm kar síjeḛ ɓa jḭga riɓar el,
Nɛ kəm kar dee d’ula rɔnduba dɔ rii-i’g ɓa
Mbata meemaji ləi gə meenda londoŋ ləi lé.
2 See gelee ban ɓa ginkoji dəwje gə raŋg lé
D’a dəji pana:
See Ala lə dee lé əd ra wa lé
D’a dəji bèe mbata ɗi wa.
3 Ala lə sí lé si dara ya,
Yeḛ nja ra néje lai to gə́ mée ndigi.
4 Magəje lə dee-deḛ lé to gə́ larnda gə larlɔr,
To néje gə́ ji dəwje ɓa ra dee ya.
5 Ta dee to keneŋ ya
Nɛ deḛ pa ne ta el ləm,
Kəm dee to keneŋ ya
Nɛ deḛ d’oo ne loo el ya ləm,
6 Mbi dee to keneŋ ya
Nɛ d’oo ne ta el ləma,
Em dee to keneŋ ya
Nɛ taa ne baḭ né kára kara bèe el ləm tɔ.
7 Ji dee to keneŋ ya
Nɛ d’ɔrɔ ne rɔ né el ləm,
Gɔl dee to keneŋ ya
Nɛ deḛ njaa ne el ləma,
Ndu dee gə́ kèŋ bèe ya kara
Ɓar ar dəw oo el ləm tɔ.
8 Deḛ gə́ njéra deeje lé
Gə deḛ lai gə d’ɔm meḛ dee dɔ magəje’g neelé
To tana sə dee pai-pai ya.
9 Seḭ ginkoji Israɛlje,
Maji kar sí ɔmje meḛ sí dɔ Njesigənea̰’g.
Yeḛ lé to gə́ njela sə dee ləm, gə dər-rɔ lə dee ləm tɔ.
10 Seḭ gel-bɔje lə Aaro̰ lé,
Maji kar sí ɔmje meḛ sí dɔ Njesigənea̰’g.
Yeḛ lé to gə́ njela sə dee ləm, gə dər-rɔ lə dee ləm tɔ.
11 Seḭ gə́ ɓəlje Njesigənea̰ lé
Maji kar sí ɔmje meḛ sí dɔ Njesigənea̰’g.
Yeḛ lé to gə́ njela sə dee ləm gə dər-rɔ lə dee ləm tɔ.
12 Njesigənea̰ ar mée olé teḛ dɔ sí’g ya,
Yeḛ a tɔr ndia dɔ sí’g ləm,
Yeḛ a tɔr ndia dɔ ginkoji Israɛlje’g ləma,
Yeḛ a tɔr ndia dɔ gel-bɔje’g lə Aaro̰ ləm tɔ.
13 Yeḛ a tɔr ndia dɔ deḛ gə́ ɓəl Njesigənea̰’g ya,
Dəwje gə́ gɔ-gɔ gə́ njé gə́ boo-boo kara ləm tɔ.
14 Njesigənea̰ a kar némajije ləa ḭ dɔ maree’d gə́ kédé-kédé kar sí-seḭ ləm,
Kar ŋgan síje ləm tɔ.
15 Maji kar Njesigənea̰ tɔr ndia dɔ sí’g ya,
Yeḛ nja ra dara gə naŋg nee tɔ.
16 Dara lé to dara gə́ ka̰ Njesigənea̰ ya,
Nɛ yeḛ wa naŋg nee ar dəwje lé.
17 To dəwje gə́ d’wəi ɓa pidi Njesigənea̰ el ləm,
To deḛ gə́ rəm d’ur loo gə́ dəwje d’isi keneŋ dɔ mundu ɓa pidee el ləm tɔ.
18 Nɛ jeḛ lé j’a kunda no̰ dɔkaisəgərə lə Njesigənea̰
Un kudee ɓasinè saar-saar gə no̰ ya.
Pidije Njesigənea̰ ya.
© Ngambai Bible © Alliance Biblique du Tchad 1989, 2015.
