Mbai gə́ to njera né gə́ dana lé
1 Togə́bè mbai a ko̰ɓee gə néra gə́ gə dɔ najee ləm,
Mbaije kara d’a ko̰ɓee gə goo rəbee ləm tɔ.
2 Nana kara a to kasəna gə njo̰loo-kula-dɔ gə́ lel dəs giree’g ləm,
A to kasəna gə loo-kiya-rɔ gə́ taa lel-boo dɔ dəw’g ləm,
A to kasəna gə kəm-rəw-mán gə́ to mee loo gə́ tudu kurum-kurum’g bèe ləma,
A to kasəna gə ndil biri mbal gə́ boo gə́ to dɔ naŋg gə́ tudu kurum-kurum’g bèe ləm tɔ.
3 Deḛ gə́ d’oo loo lé
Kəm dee a tel libi el ŋga ləm,
Deḛ gə́ d’oo ta lé
D’a kur mbi dee gèŋ ləm tɔ.
4 Dəwje gə́ njékḛji ta ɓa pa elje lé
D’a tel to njégosonégərje gə mba gər né ləm,
Njékoma̰ gə ta pije lé
D’a pata kalaŋ-kalaŋ ləma,
D’a pa njai-njai ləm tɔ.
5 Mbə-dəw lé d’a ɓaree gə́ dəw gə́ boo el ləm,
Kəm-kəjim’g lé d’a ɓaree dəw-noji el ləm tɔ.
6 Mbata mbə-dəw lé ta mbə ɓa teḛ təa’g ləm,
Takə̰ji né gə́ majel ɓa wa mée ləm tɔ
Gə mba karee ila ndɔl dɔ loo’g ləm,
Gə mba karee pa ne taŋgɔmje dɔ Njesigənea̰’g ləm,
Mba kar mee dəw gə́ ɓó rəa lé to wəl ləma,
Mba kɔg dəw gə́ kṵdaman tɔlee loo-kai-ma̰ ləm tɔ.
7 Nékadje lə kəm-kəjim’g lé to néje gə́ yèr,
Yeḛ wɔji rəw néraje gə́ majel mée’g
Mba tuji ne njénékəmndooje gə taŋgɔmje ləm,
Lée ta lə njendoo lé to gə dɔ najee ya kara ra bèe ya ləm tɔ.
8 Nɛ dəw gə́ njemeemaji lé wɔji rəw néraje gə́ maji ɓa mée’g ləm,
Yeḛ aar njaŋg dɔ rəw néraje ləa gə́ maji gə́ yeḛ wɔji lé ləm tɔ.
Ta gə́ ndəji denéje gə́ Jerusalem
9 Seḭ denéje gə́ njérɔkwɔije lé
Ḭje tar, ooje ndum!
Seḭ ŋgama̰dje gə́ síje lɔm lal kḛjije ta lé
Tugaje mbi sí ooje ne ta ləm tɔ!
10 Mee ləb kára gə ndɔje gə́ na̰je lé
Seḭ gə́ síje lɔm lal kḛji ta lé a kundaje bala,
Mbata kandə nduú gə́ kəm kinja a godo ləm,
Ko gə́ kəm kinja kara a godo ləm tɔ.
11 Seḭ denéje gə́ njérɔkwɔije lé
Sije dan ɓəl’g!
Seḭ denéje gə́ síje lɔm lal kḛji ta lé
Undaje bala to!
Tɔrje kubu rɔ sí’g síje rɔ sí kari ba
Ndá tɔje kubu-kwa-ndòo ɓər sí’g.
12 Deḛ kunda kaar dee no̰ ne
Loo gə́ meḛ dee olé dɔ loo-ndɔje gə́ kédé gə́ maji yaa̰ ləm,
Gə ndɔ-nduúje gə́ andə njim-njim kédé ləm,
13 Gə dɔ naŋg lə koso-dəwje ləm
Gə́ kunje gə kun-pɔrɔrɔje d’uba keneŋ ləma,
Gə dɔ kəije lai gə́ kédé maji yaa̰
Mee ɓee-boo gə́ to ɓee-rɔlel lé ləm tɔ.
14 Kəi-mbai lé d’uba d’ya̰ ləm,
Ɓee-boo kunda bula lé tel to dɔ nduba ləm tɔ,
Dɔdərloo gə kəi-kaar-kɔgərɔ gə́ duu dɔ loo lé
Tel to duu-loo si gayim-dəwje saar gə no̰,
Loo neelé a tel to gə́ loo-ndam lə mulayḛ̀je-je gə́ wala ləm,
Gə loo-ko̰-mu lə koso-nékulje ləm tɔ.
15 Saar loo gə́ ndil a kḭ tar ree kɔm dɔ sí’g ləm,
Saar kar dɔdilaloo tel to loo-ndɔ gə́ maji kó ləma,
Kar dee d’oo loo-ndɔ gə́ maji kó lé asəna gə mee kag-kɔr ləm tɔ.
16 Bèe ɓa néra gə́ danasur a nai dɔdilaloo’g ləm,
Néra gə́ gə dɔ najee a to loo-ndɔ gə́ maji kó’g lé ləm tɔ.
17 Néra gə́ gə dɔ najee lé a koji meelɔm
Tɔɓəi kandə néra gə́ gə dɔ najee lé a to loo-kwa-rɔ gə loo-si gə́ majee ləm tɔ saar gə no̰.
18 Koso-dəwje ləm d’a si gə́ majee dan meelɔm’g
Mee kəije gə́ ŋgəŋ’d
Dan loo-kwa-rɔ gə́ néjɔg godo keneŋ.
19 Nɛ ndi-kwɔji gə́ ər bai-bai
A təd kagje gə́ mee kag-kɔr’g ləm,
A kar ɓee-boo oso naŋg pal ləm tɔ.
20 Rɔlel a nai sə sí-seḭ gə́ dubuje né mbɔr mán’g
Ya̰je maŋg gə mulayḛ̀je ar deeje d’aw to gə́ meḛ dee ndigi lé.
© Ngambai Bible © Alliance Biblique du Tchad 1989, 2015.
