Kwəi lə Kristi ɓa gə́ gin meekun ɓəi
1 Jeḛ lé mbɔl dɔ meekun lə sí ɓa Ala ɔr ne ta dɔ sí’g yee ɓa Mbaidɔmbaije lə sí Jeju Kristi lé ar sí j’ɔm na̰’d yəg gə Ala tɔ. 2 Jeju lé ɓa gə́ njekar sí noji neelé gə́ jeḛ nai danee’g njaŋg gə goo meekun lə sí. J’isi keneŋ gə meendakaḭ j’unda meḛ sí yel gə mba koo ne rɔnduba lə Ala lé ya. 3 Tɔɓəi j’isi gə meendakaḭ dan némeeko̰’g mbata jeḛ n’gər gao némeeko̰ lé tel meekila ləm, 4 meekila lé tel meekai ləma, meekai lé gə́ kuma̰ meekundayel ləm tɔ. 5 Meekundayel lé a kɔd sí rɔm el mbata mbɔl dɔ Ndilmeenda gə́ Ala ar sí lé meenoji lə Ala rusu meḛ sí njḭ-njḭ.
6 Tɔgərɔ ya, loo gə́ siŋga sí yɔ ɓəi lé Kristi ɓa wəi gə mbata njékɔs Ala rəwje mee ndəa gə́ Ala ɓa wɔji. 7 Dɔmaji-nà dəw a kwəi gə mbata lə maree gə́ njemeekarabasur əsé dəw gə́ maji ɓa maree a kwa dəa jim nja a kwəi yoo ləa ɓəi. 8 Nɛ Ala nja kila meenoji ləa kɔd gə́ rɔ sí’g mbata loo gə́ jeḛ nai gə́ njékaiyaje ɓəi lé Kristi wəi gə mbata lə sí. 9 Ŋga to gə́ ɓasinè lé məsee ɔr ne ta dɔ sí’g mba̰ ndá yeḛ a kɔr sí dan oŋg’g kar sí j’aji ne ɓəi tɔ. 10 Loo gə́ jeḛ nai gə́ njéba̰je ləa ɓəi lé kwəi lə Ŋgonee ɓa gɔl sí ɔm sí na̰’d yəg gə Ala lé nɛ ɓəd ɓa see kəmə gə́ yeḛ tel si kəmba lé see jeḛ gə́ j’ɔm na̰’d gə Ala lé see j’a kaji ne el wa. 11 To yee gə́ nee ɓa el, nɛ mbɔl dɔ Mbaidɔmbaije Jeju Kristi gə́ njekɔm sí na̰’d yəg lé ɓa jeḛ ndá ne meḛ sí kaḭ dɔ Ala’g tɔ.
Adam gə Kristi
12 Gelee gə́ nee ɓa to gə́ dəw kára ba ɔr rəw ar kaiya oso dɔ njé gə́ naŋg nee, ɓad ɓa ar yoo orè gée oso ne dɔ dəwje gə́ dɔ naŋg nee lai ɓəi mbata dəwje lai ra kaiya ar kal dee kára kara nai el . 13 Mbata kaiya to kédé ɓad ɓa godndu Moyis kinja ɓəi. Nɛ loo gə́ godndu Moyis godo ndá Ala tura kaiya rṵga el. 14 Nɛ yoo ɓa o̰ ɓee dɔ dəwje’g un kudee ndəa’g lə Adam ya teḛ ne ndəa gə́ ka̰ Moyis’g. Deḛ gə́ kaiya ra dee wa bea gə ka̰ Adam el kara yoo o̰ ɓee dɔ dee’g tɔ.
Adam lé to njekɔr rɔ yeḛ gə́ a gə ree lé ɓəi. 15 Nojikwa lé dum dɔ kalta, mbata to kalta lə dəw kára ba dəwje bula d’wəi ne lé nɛ ɓəd ɓa see noji lə Al, gə noji gə́ yeḛ ar Kristi wa gə dəwje lé see a kal dɔ loo sula el wa. 16 Noji neelé yeḛ udu ne bwa kaiya jigi, mbata kalta lə dəw kára ba ɓa ar ta wa ne dɔ dəw ɓəi. Nɛ loo gə́ kalta oso gə loo mbidi-mbidi ndá noji neelé ree ɔr taree dɔ loo’d. 17 Tɔgərɔ ya, to gə́ kalta lə dəw kára ba ar yoo o̰ ne ɓee dɔ dəwje’g lai, nɛ ɓəd ɓa see deḛ gə́ d’isi dan boo-noji’g lə Ala ləm, d’isi ne gə́ njémeekarabasurje gə goo noji gə́ yeḛ wa sə dee ləm tɔ lé see deḛje neelé mbɔl dɔ Jeju Kristi nja kára ba lé d’a ko̰ɓee loo sikəmba’g lé el wa.
18 Bèe ndá to gə́ kalta gə́ loo kára ba ya ta wa ne dɔ dəwje lai unda dee ne naŋg rə̰dəŋ-rə̰dəŋ ndá néra gə́ gə dɔ najee lə dəw kára ba ya, ta ɔr ne dɔ dəwje’g lai ar dee d’isi ne gə kəmə lé tɔ. 19 Mbata to gə́ ndɔjita lə dəw kára ba ɓa ar dəwje bula tel to ne njékaiyaje ɓəi lé togə́bè ɓa ŋgonkoji lə dəw kára ba ya a kar dəwje bula tel to ne njémeekarabasurje ɓəi tɔ.
20 Godndu Moyis lé ree gə mba kila kalta gə́ raga kɔd, nɛ loo gə́ kaiya kila rəa keneŋ ndá noji ɓa turu dəa pubug 21 mba kar loo gə́ kaiya o̰ ɓee dɔ dəwje’g lai ar dee d’wəi ne ndá noji gə́ ar dee d’isi ne gə́ njémeekarabasurje lé a taa ɓee rima-rima tɔ, kar dee d’isi ne gə kəmə gə́ gə no̰ lé gin Jeju Kristi, Mbaidɔmbaije’g lə sí lé tɔ.
© Ngambai Bible © Alliance Biblique du Tchad 1989, 2015.
