Pər o̰ mee ŋgon kag’d
1 Moyis aw ul nékulje lə məmeeje gə́ ria lə Jetro gə́ to njekinjanéməs gə́ Madian, yeḛ aw gə nékulje neelé dɔdilaloo’g teḛ sə dee dɔ mbal’g lə Ala gə́ ria lə Oreb. 2 Ndá kura lə Mbaidɔmbaije gə́ dara teḛ kəmee’g dan ndo̰ pər gə́ ḭ mee ŋgon kag’d o̰ lé. Moyis aa loo oo ndá aa oo, pər taa rɔ ŋgon kag neelé pəl-pəl nɛ roo ŋgon kag lé el . 3 Moyis pana: M’a tel kaw pər gə́ keneŋ mba koo némḭdi gə́ boo neelé see gelee ban ɓa ŋgon kag lé pər rée el wa. 4 Njesigənea̰ oo to gə́ yeḛ tel aw gə́ keneŋ mba koo ndá Ala nja ɓaree mee ŋgon kag’d neelé pana: Moyis, Moyis.
Yeḛ ndigi təa’g pana: Yḛ̀ m’aar nee!
5 Ala pana: Tibi mbɔr loo gə́ nee lé el, tɔr négɔl ləi gɔli’g, mbata loo gə́ i aar keneŋ neelé to loo gə́ to gə kəmee. 6 Yeḛ pa tɔɓəi pana: Ma m’to Ala lə bɔbije, Ala lə Abrakam ləm, gə Isaak ləma, gə Jakob ləm tɔ.
Moyis dəb kəmee naŋg mbata yeḛ ɓəl kaa loo gə́ rɔ Ala’g lé ya. 7 Njesigənea̰ pana: Ma m’oo kəmtondoo lə koso-dəwje ləm gə́ d’isi Ejiptə, m’oo ndu no̰je lə dee gə́ njékula kəm dee ndooje d’ar dee no̰ ne ləm tɔ, mbata ma m’gər némeekonje lə dee gao ya. 8 Bèe ɓa ma m’ree mba kɔr dee ji Ejiptəje’g ləm, gə mba kɔr no̰ dee teḛ sə dee mee ɓee gə́ maji gə́ tad yaa̰ ləm tɔ, to ɓee gə́ mbà to keneŋ yaa̰ ləm, ubu tə̰ji kara to keneŋ yaa̰ ləm tɔ, to loo-si Kana̰je ləm, gə Hetje ləm, gə Amɔrje ləm, gə Peresje ləm, gə Hebje ləma, gə Yebusje ləm tɔ. 9 Aa oo, ndu no̰ lə Israɛlje lé oso mbim’g pad ya, kəm dee gə́ njé gə́ Ejiptə d’ula ndòo lé kara ma m’oo gao ya tɔ. 10 Ɓasinè, aw, m’a gə kulai rɔ Parao̰’g gə mba kari ar koso-dəwje ləm gə́ to Israɛlje lé d’unda loo mee ɓee gə́ Ejiptə teḛ ya.
11 Moyis dəji Ala pana: See ma jén m’as ɗi to ɓa m’a kaw rɔ Parao̰’g mba kar Israɛlje d’unda loo mee ɓee gə́ Ejiptə teḛ wa. 12 Ala pana: Ma nja m’a korè səi rəw na̰’d més, tɔɓəi né gə́ a kari gər gao to gə́ to ma nja m’ulai ɓa to nee: Loo gə́ i ar koso-dəwje d’unda loo mee ɓee gə́ Ejiptə teḛ mba̰ ndá seḭ a kwaje kila Ala dɔ mbal’g neelé ya.
13 Moyis ulá pana: M’a kaw rɔ Israɛlje’g ŋga, m’a kula dee pana: Ala lə bɔ síje-je ɓa ulam rɔ sí’g. Nɛ ɓó lé deḛ dəjim pana: See ria lə na̰ wa ndá ŋga, see ta ɗi ɓa m’a kila dee keneŋ wa .
14 Ala ula Moyis pana: MA M’TO YEḚ GƎ SI GƎN. Tɔɓəi yeḛ pa pana: Yee ɓa i a kula Israɛlje pana: Yeḛ gə́ ria lə MA M’TO YEḚ GƎ SI GƎN lé ɓa ulam rɔ sí’g ya . 15 Ala ula Moyis ya tɔɓəi pana: I a kula Israɛlje togə́bè pana: Njesigənea̰ Ala lə bɔ síje-je, Ala lə Abrakam, gə Isaak, gə Jakob ɓa ulam rɔ sí’g. Aa ooje, yee ɓa to rim gə́ gə no̰ ləm, yee ɓa to rim gə́ ginkoji dəwje gə raŋg d’a kḛji ne dɔm’g saar gə́ kédé-kédé ya ləm tɔ. 16 Maji kari aw mbo̰ ŋgatɔgje lə Israɛlje na̰’d ula dee pana: Njesigənea̰, Ala lə bɔ síje-je teḛ dɔm’g, Ala lə Abrakam, gə Isaak, gə Jakob tɔ. Yeḛ pana: Neḛ n’ila kəm neḛ dɔ sí’g, neḛ n’oo né gə́ deḛ ra sə sí mee ɓee gə́ Ejiptə’g tɔ, 17 tɔɓəi neḛ pana: N’a kɔr sí dan nékəmndoo’d gə́ mee ɓee gə́ Ejiptə mba teḛ sə sí kaw sə sí ɓee lə Kana̰je ləm, gə Hetje ləm, gə Amɔrje ləm, gə Peresje ləm, gə Hebje ləma, gə Yebusje ləm tɔ, to ɓee gə́ mbà to keneŋ yaa̰ ləm, ubu tə̰ji kara to keneŋ yaa̰ ləm tɔ. 18 D’a tuga mbi dee koo ne ndui ya, tɔɓəi i a kaw, i seḭ gə ŋgatɔgje lə Israɛlje tɔ, a kawje rɔ mbai gə́ njeko̰ɓee gə́ Ejiptə, a kuláje pajena: Njesigənea̰ Ala lə Ǝbrəje teḛ dɔ sí’g. Bèe ndá un ndui ar sí mba kar sí j’aw njaa dɔdilaloo’g as ndɔ sí munda mba kinja nékinjanéməsje kar Ala lə sí gə́ Njesigənea̰. 19 Ma m’gər gao to gə́ mbai gə́ njeko̰ɓee gə́ Ejiptə lé a kya̰ sí kar sí awje el, nɛ gə goo ji siŋgamoŋ gə́ ɓar mèr-mèr lé ɓa. 20 M’a kila tuji dɔ ɓee gə́ Ejiptə ndá m’a kar nédumkooje gə́ gə ria-ria teḛ dan dee’g. Gée gə́ gogo ndá yeḛ a kya̰ loo kar sí awje ya. 21 M’a ra né kar koso-dəwje neelé taa ne kəm njé gə́ Ejiptə rəgm, bèe ɓa loo gə́ seḭ a gə teḛ kawje ndá seḭ a kawje gə ji sí kari ba el . 22 Dené gə́ rara kara a kwɔi njeboatakəi ləa gə́ dené əsé yeḛ gə́ si mee kəi’g ləa tɔ, a kwɔi dee néje gə́ ra gə larnda gə larlɔr ləm, a kwɔi dee kubuje ləm tɔ, ndá kubuje neelé seḭ a kulaje rɔ ŋgan síje gə́ diŋgam gə njé gə́ dené’g. Bèe ɓa seḭ a kubaje njé gə́ Ejiptə néje lə dee taaje ya.
© Ngambai Bible © Alliance Biblique du Tchad 1989, 2015.
