Gel-bɔje lə Rekab
1 Njesigənea̰ ula Jeremi ta mee ndəa’g lə Jojakim, ŋgolə Jojias gə́ to mbai gə́ Juda gə rɔtaje nee pana : 2 Aw kəi lə gel-bɔje lə Rekab, aw ula dee ta, tɔɓəi ɔr no̰ dee aw sə dee mee kəi’g lə Njesigənea̰ ar dee d’aw d’isi mee ŋgon kəi gə́ kára’g. Yen ɓa a kar dee mán-nduú d’ai.
3 M’aw m’ɓar Jaasania, ŋgolə Jeremi gə́ to ŋgolə Habajinia gə ŋgakea̰je, gə ŋganeeje lai, gə gel-bɔje lə Rekab lai, 4 ndá m’ɔr no̰ dee m’aw sə dee kəi lə Njesigənea̰, mee ŋgon kəi gə́ to ka̰ ŋgalə Hanan, ŋgolə Jigdalia gə́ to dəw lə Ala, ŋgon kəi neelé to mbɔr ka̰ mbaije’g dɔ ŋgon kəi gə́ tar gə́ to ka̰ Maaséja, ŋgolə Salum, njeŋgəm tarəwkɔg lé. 5 M’a m’unda baije gə́ mán-nduú gə́ mḭ rusu tub-tub ləm, gə kaje ləm tɔ no̰ dəwje gə́ to gel-bɔje lə Rekab. Ndá m’ula dee m’pana: Maji kar sí aije mán-nduú gə́ mḭ lé!
6 Nɛ deḛ d’ilam keneŋ pana: Jeḛ j’aije mán-nduú gə́ mḭ lé el, Mbata Jonadab ŋgolə Rekab bɔ síje lé un ndia ar sí pana:
Seḭ gə ŋgan síje a kaije mán-nduú gə́ mḭ el nja saar gə no̰ ləm,
7 J’a raje kəi el ləm,
J’a dubuje né kára kara el ləm,
J’a ma̰aje nduú el ləma,
J’a taaje ndɔ-nduú el ləm tɔ.
Nɛ ləb si kəmba lə sí lai lé
J’a sije mee kəi-kubuje’g ya,
Gə mba kar kuru sí əw ne mee ɓee’d
Gə́ jeḛ toje mbáje keneŋ lé.
8 Jeḛ j’ilaje koji dɔ taje lai gə́ bɔ síje Jonadab, ŋgolə Rekab un ndia dɔ’g ar sí lé ya. Jeḛje ləm, gə denéje lə sí ləm, gə ŋgan síje gə́ diŋgam gə njé gə́ dené ləm tɔ lé j’aije mán-nduú gə́ mḭ el mee ləb si kəmba’g lə sí ya. 9 Jeḛ n’raje kəije gə mba si keneŋ el ləm, jeḛ n’taaje nduúje əsé ndɔje əsé looje gə́ dubu né keneŋ el ləm tɔ. 10 Jeḛ j’isije kəi-kubuje’g ləm, j’ilaje koji n’raje ne néje lai gə́ bɔ síje Jonadab un ndia dɔ’g ar sí lé ləm tɔ. 11 Loo gə́ Nebukadnesar, mbai gə́ Babilɔn aw gə mba rɔ gə ɓee neelé ndá jeḛ j’ulaje na̰ m’pana: Ar sí j’awje Jerusalem əw gə njérɔje lə Kaldeje gə njérɔje lə Aramje. Togə́bè ɓa jeḛ j’isije ne Jerusalem gə mbəa.
12 Yen ŋga Njesigənea̰ nja ula Jeremi ta gə rɔtaje nee pana: 13 Njesigənea̰, Ala lə Israɛlje pa togə́bè pana: Aw dəji dəwje gə́ Juda gə njé gə́ Jerusalem pana: See seḭ a taaje tandoo gə mba kila ne ŋgonkoji dɔ ta’g ləm wa. Njesigənea̰ ɓa dəji sí ta bèe. 14 Deḛ d’aa dɔ taje lə Jonadab, ŋgolə Rekab gə́ un ndia ar ŋganeeje mba kar dee d’ai mán-nduú gə́ mḭ el lé kər-kər ndá deḛ d’ai el ya saar teḛ ɓogənè to mbata deḛ d’ila koji dɔ ndukun’g lə bɔ deeje. Nɛ ma lé m’ula sí ta, un kudee teḛ gə ndɔ rad ya m’ula sí ta nɛ seḭ unje mbi sí rəw dɔ ta’g ləm. 15 Ma m’ula kuraje ləm lai gə́ to njéteggintaje rɔ sí’g, un kudee gə ndɔ rad ya m’ula dee m’ar dee d’aw d’ula sí pana: Ɔsje badm telje dɔ panjaa sí gə́ majel’g ləm, tel gɔlje néra síje ləma, awje goo magəje gə mba pole dee el ləm tɔ ndá seḭ a síje mee ɓee gə́ m’ar sí ləm, gə m’ar bɔ síje-je ləm tɔ. Nɛ seḭ tugaje mbi sí ooje ne ta ləm el ləm, seḭ unje mbi sí rəw dɔ’g ləm tɔ. 16 Tɔgərɔ, ŋgalə Jonadab gə́ to ŋgolə Rekab lé d’aa dɔ ndukun gə́ bɔ deeje un ar dee lé kər-kər nɛ koso-dəwje neelé d’un mbi dee rəw dɔ ta’g ləm.
17 Gelee gə́ nee ɓa Njesigənea̰, Ala gə́ njeboo-néje gə́ to Ala lə Israɛlje pa ne togə́bè pana: Aa ooje, m’a kar némeekonje lai gə́ m’ila mberee m’wɔji ne dɔ Judaje gə dɔ njé gə́ Jerusalem lé teḛ dɔ dee’g mbata ma m’ula dee ta nɛ deḛ d’un mbi dee dɔ’g ləm, m’ɓar dee kara deḛ ndigi tam’g el ləm tɔ.
18 Bèe ɓa Jeremi ula gel-bɔje lə Rekab pana: Njesigənea̰ gə́ njeboo-néje gə́ to Ala lə Israɛlje pa togə́bè pana: To gə́ seḭ ilaje koji dɔ ndukun’g lə bɔ síje Jonadab ləm, to gə́ seḭ aaje dɔ torndiaje gə́ yeḛ un ar sí kər-kər ləm tɔ lé 19 gelee gə́ nee ɓa Njesigənea̰ gə́ njeboo-néje gə́ to Ala lə Israɛlje pa ne togə́bè pana: Jonadab, ŋgolə Rekab a lal ŋgakeaje no̰m’g nda̰ el.
© Ngambai Bible © Alliance Biblique du Tchad 1989, 2015.
