Tamaji mba kar Ala la ne sə sí
1 Pa lə Dabid gə́ ar bao-pa mba karee ɔs sə dee lé. D’ɔs gə kṵdu-kag gə́ kulaje jinaijoo.
2 Ǝi Njesigənea̰, gə́ ree la sə sí!
Njémeemajije d’isi sané pá ləm,
Majikojije d’udu mbuna dəwje’g ləm tɔ.
3 Taŋgɔmje ɓa d’ula na̰ mbuna na̰’g wɔr-wɔr ləm,
Ta gə́ ta dee’g ɓa deḛ lèbè ne kəm na̰ ləma,
Deḛ pata gə meḛ dee gə́ joo ləm tɔ.
4 Deḛ gə́ ta dee teḛ pata gə́ rii lé
Maji kar Njesigənea̰ ar dɔ ta dee udu ləm,
Deḛ gə́ ndo̰ dee teḛ gə ta beeléje lé kara
Maji karee ar ta dee udu rub ləm tɔ.
5 To deḛ gə́ pana:
Tapa neḛje ar neḛ n’toje njésiŋgamoŋje ləm,
Ta neḛje to ka̰ neḛje ya ləm tɔ,
Ŋga see na̰ ɓa a to dəw dɔ neḛje ɓəi wa.
6 Njesigənea̰ pana:
Njénékəmndooje lé d’ula kəm dee ndòo ləm,
Njéndooje kara tuma̰ gə no̰ ŋgururu-ŋgururu ya ləm tɔ.
Bèe ndá ɓasinè n’a kḭ ra né ya.
N’a la gə deḛ gə́ d’oma̰ sə dee
D’ar dee d’aw ne jələ-jələ lé.
7 Taje lə Njesigənea̰ lé to kankəmta ya,
To asəna gə larnda gə́ deḛ ndiri pe’d gɔl siri loo-kula-bṵda’g
Gə mba kar siḭyee teḛ karee àr ne ŋgad-ŋgad lé ya.
8 Ǝi Njesigənea̰, i a kaḭ bada dɔ sí’g ləm,
I ŋgəm sí saar gə no̰ mbuna ginkoji dəwje’g neelé.
9 Njémeeyèrje lé d’un loo lad-lad
Loo gə́ néra gə́ ram o̰ ɓee mbuna dəwje’g.
© Ngambai Bible © Alliance Biblique du Tchad 1989, 2015.
