Tamaji lə dəw gə́ to ta yoo’g
1 Pakɔs lə Dabid
Njesigənea̰, i nja ɓa m’ila boo ndum naŋg m’ɓari ne wəl.
I gə́ to biri mbal ləm lé,
Maji kari ɔs mbii jigi udu dɔ ndum’g el
Nà banelə ɓó lé i sa rɔi rɔm’g rəw lal kilam ta’g ndá
M’a tel to kasəna gə deḛ gə́ d’uru bwa-dɔɓar’g bèe.
2 Maji kari oo ndu ra ndòo ləm
Loo gə́ m’no̰ m’ɓari ləm,
Loo gə́ m’odo jim par gə́ kəi ləi gə́ to gə kəmee ləm tɔ.
3 Maji kari orəm na̰’d gə njémeeyèrje gə njéra né kori-korije el,
Deḛ lé pata meelɔm gə mar deeje
Nɛ gosɔyèr ɓa to meḛ dee’g.
4 Maji kari ra sə dee gə goo kula ra dee ləm,
Gə goo gosɔyèr lə dee ləm tɔ,
Maji kari ra sə dee né gə goo kula gə́ ji dee ra:
Maji kari ar dee nékoga-dɔ-ji dee gə́ wɔji dɔ dee dɔ dee .
5 Mbata deḛ tɔs kəm dee dɔ kula raje’g lə Njesigənea̰
Gə́ to néje gə́ jia ɓa ra dee lé el.
Maji kari ɓugu dee naŋg ɓó ar dee d’ḭta el ŋga.
6 Maji kar dɔ ri Njesigənea̰ ai səgərə ya!
Mbata yeḛ oo ndu ndòo raje ləm.
7 Njesigənea̰ to siŋgam ləm,
Yeḛ to dər-rɔ ləm ləm tɔ.
Ma m’ɔm məəm dəa’g ndá
M’iŋga ne njela səm ya,
M’aw gə boo-rɔlel dɔɓəŋgərəm’g ləm,
M’ɔs pa m’pidee ne ləm tɔ.
8 Njesigənea̰ to siŋga koso-dəwje ləa ləm,
Yeḛ to biri mbal gə́ njetaa dɔ yeḛ gə́ yeḛ wa dəa gə ubu lé ləm tɔ.
9 Maji kari aji koso-dəwje ləi ləm,
Gə tɔr ndui dɔ nédɔji’g ləi ləm tɔ!
Maji kari to gə́ njekul dee ləm,
Gə njegəd dee ləm tɔ saar gə no̰ ya!
© Ngambai Bible © Alliance Biblique du Tchad 1989, 2015.
