Ta kila’g lə Jɔb gə́ pana: Rɔlel lə njémeeyèrje to keneŋ ya
1 Jɔb un ta pa pana:
2 Maji kar sí ooje ta, ooje taje ləm,
Yee ɓa gə́ né kára ba gə́ a gɔl məəm gə́ m’dəji sí.
3 M’ra ndòo rɔ sí’g, maji kar sí ya̰je loo amje m’pata,
Bèe ɓa loo gə́ m’a pata mba̰ ndá kara seḭ a kooje gə́ ta kogo ɓəi.
4 Dəw ɓa m’pata m’ila dəa’g el,
Gelee gə́ nee ɓa m’ila ne məəm po̰-po̰ el gə mbəa.
5 Maji kar sí telje kəm sí gə́ dɔm’g oomje, arje kaar sí wa sí paḭ ləm,
Ilaje ji sí ta sí’g sud ləm tɔ.
6 Loo gə́ m’ə̰ji dɔ’g ndá ɓəl undam badə gaŋgm ləm,
Darɔm unda bala tigi-tigi ləm tɔ.
7 See gelee ban ɓa njémeeyèrje d’isi ne kəmba wa.
See gelee ban ɓa deḛ ɓuga ya nɛ siŋga dee ḭ ne dɔ maree’d gə́ kédé-kédé ləm tɔ wa.
8 Ŋgaka deeje tɔg sə dee na̰’d ləm,
Ŋgaka ŋgan deeje teḛkɔr kəm dee’g ləm tɔ.
9 Mee kəi lə dee lé meelɔm ɓa to keneŋ ɓó ɓəl godo keneŋ,
Kag-tɔs lə Ala ɔrɔ rɔ dee el,
10 Bɔ maŋgje lə dee siŋga dee to kɔgərɔ-kɔgərɔ ar dee tàl na̰ gə́ kédé-kédé ləm,
Ko̰ maŋgje lə dee d’əskèm kara tɔr el ləm tɔ.
11 Deḛ d’ar ŋgan deeje d’aiŋgwɔd to gə́ ma̰də badje bèe ləm,
Ŋgan deeje tal jagəra-jagəra ləm tɔ.
12 Deḛ d’ɔs pa gə ndu dalè bajiŋ gə kṵdu-kag ləm,
Deḛ d’al rɔ dee gə ndu buula ləm tɔ.
13 Ndɔje lə dee dəs dan maji’g,
Deḛ d’andə mee ɓee’g lə njé gə́ d’wəi gə́ léegəneeya.
14 Lé bèe kara deḛ d’ula Ala pana: Maji karee ɔr rəa rɔ neḛje’g,
Neḛ ndigi gərje kila rəwje ləa el.
15 Bao-siŋgamoŋ ɓa gə́ na̰ ɓa n’a raje né kaareeje wa.
See ɗi ɓa n’a kiŋgaje loo gə́ neḛ n’raje tamaji təa’g wa.
16 Sèm, see némajije lə dee to meḛ ji dee’g mba̰ el wa.
Ma m’ndigi taa takwɔji-kəmkàr lə njémeeyèrje el.
17 Nɛ see gɔl ka̰da ɓa pərndɔ lə njémeeyèrje wəi ləm,
Ar nékəmndoo ɔm dɔ dee’g ləm,
Ar Ala kai dee né gə́ wɔji dɔ dee dan oŋg’d ləa ləm,
18 Ar dee to d’asəna gə mu gə́ lel odo bèe ləma,
Ar dee to d’asəna gə tisa gə́ lel mal ɔr aw ne ləm tɔ bèe wa.
19 See seḭ pajena: Bo̰ néra njemeeyèr gə́ a kɔs təa’g lé Ala unda kul mbata lə ŋganeeje wa.
Nɛ to kəm kar Ala ar bo̰ nérea ɔs təa-yeḛ’g ya ɓa mba karee gər.
20 To kəm karee yeḛ nja oo tuji ləa gə kəmee ləm,
To ta ləa-yeḛ nja gə mba karee ai oŋg lə Bao-siŋgamoŋ ləm tɔ.
21 Tɔgərɔ ya, see ta ɗi ɓa yeḛ ə̰ji dɔ njémeekəije’g ləa gə́ gée’g
Loo gə́ naḭje ləa d’as mba̰ lé wa.
22 See Ala gə́ to njegaŋ-rəwta dɔ kuraje’g ləa gə́ dara lé
Dəw askəm ndée gosonégər wa.
23 Dəw kára wəi loo gə́ yeḛ si gə́ majee ləm,
Gə meekulɔm ləma, gə rɔlel ləm tɔ,
24 Ŋgelee toso mbɛg-mbɛg ləm,
Siŋgareaje lé ubee gə bodé rəa taa loo pəl-pəl ləm tɔ.
25 Dəw gə́ raŋg ndá meekad mbag-mbag ɓa yeḛ wəi ne
Ɓó iŋga némaji kára kara el.
26 Deḛ joo bɔr to babur’g ləm,
Deḛ joo bɔr tel to nésɔ lə kɔrèje ləm tɔ.
27 Ma m’gər takə̰jije lə sí gao ləm,
Gə tagaŋ gə́ gə goo rəbee el gə́ seḭ gaŋgje dɔm’g ləm tɔ.
28 Seḭ pajena: See kəi lə dəw gə́ njesiŋgamoŋ lé to ra ɓəi wa.
See kəi si njémeeyèrje lé to ra ɓəi wa.
29 Nɛ gə mba ɗi ɓa seḭ dəjije njékaw mbáje el ləm,
Seḭ ndigi taaje ta gə́ d’ɔr gée d’ar sí lé el ləm tɔ wa.
30 Ndɔ némeeko̰ lé né ra njemeeyèr el,
Ndɔ oŋg lé yeḛ teḛ keneŋ njoroŋ.
31 See na̰ ɓa ila ta dəa’g kəmee’g wɔji ne dɔ panjaa ləa wa.
See na̰ ɓa tel gə né gə́ yeḛ ra lé aree wa.
32 Deḛ d’unee d’aw səa dɔɓar’g ləm,
Deḛ d’isi ŋgəm dɔɓar ya ɓəi ləm tɔ.
33 Kɔr naŋgje gə́ wəl-loo’g wɔilɔ pélé-pélé dəa’g,
Dəwje bula dan gée ləm
To gə́ bula-dəwje d’aw nea̰’g kédé ləm tɔ.
34 See gelee ban ɓa seḭ ulamje ta gɔl məəm gə́ gə mḭdé ba wa.
Ges ta gə́ seḭ ilamje keneŋ lé to ta sukəmloo ya.
© Ngambai Bible © Alliance Biblique du Tchad 1989, 2015.
