Dəwje gə́ ree d’isi Jerusalem lé
1 Mbai dɔ koso-dəwje-je ree d’isi Jerusalem. Ges koso-dəwje ra né asəna gə téḛ bèe mba kiŋga ne dəw kára mbuna deḛ gə́ dɔg’d karee ree si Jerusalem gə́ to ɓee gə́ to gə kəmee gə mba kar deḛ gə́ jinaikara lé d’a nai mee ɓee-booje’g tɔ. 2 Koso-dəwje tɔr ndu dee dɔ dee-deḛ lai gə́ d’ḭ gə meḛ dee mba ree si Jerusalem lé.
3 Aa oo, mbaije gə́ wɔji dɔ dəb ɓeeko̰je gə́ ree d’isi Jerusalem lé ɓa nee: Mee ɓee-booje’g lə Juda lé, Israɛlje ləm, gə njékinjanéməsje ləm, gə Ləbije ləm, gə njéra kula kəi-Ala’d gə́ raje ləma, gə ŋgaka kuraje lə Salomo̰ ləm tɔ lé, nana kara si loo gə́ to kea̰-kea̰ mee ɓee-boo’g ləa .
4 Mee ɓee gə́ Jerusalem lé ginkoji Judaje gə ginkoji Bḛjamije d’isi keneŋ.
Deḛ gə́ to Judaje lé ɓa nee: Ataja gə́ to ŋgolə Ojee gə́ to ŋgolə Jakari gə́ to ŋgolə Amaria gə́ to ŋgolə Sepatia gə́ to ŋgolə Mahalaleel gə́ to ŋgolə Peres ləm, 5 gə Maaséja, ŋgolə Baruk gə́ to ŋgolə Kol-Hojé gə́ to ŋgolə Hajaja gə́ to ŋgolə Adaja gə́ to ŋgolə Jojarib gə́ to ŋgolə Jakari gə́ to ŋgolə Siloni ləm tɔ. 6 Bula lə gel-bɔje lə Peresje gə́ d’isi Jerusalem lé ɓa nee: Diŋgamje gə́ to bao-rɔje ya d’as tɔl sɔ gə dɔ dee rɔ misa̰ giree-jinaijoo (468).
7 Deḛ gə́ to ginkoji Bḛjamije ɓa nee: Salu, ŋgolə Mesulam gə́ to ŋgolə Joɛd gə́ to ŋgolə Pedaja gə́ to ŋgolə Kolaja gə́ to ŋgolə Maaséja gə́ to ŋgolə Itiel gə́ to ŋgolə Esai ləm, 8 gə Gabai gə Salai ləm tɔ ndá d’as tɔl jinaikara dɔ dee rɔ joo giree-jinaijoo (928). 9 Joɛl, ŋgolə Jikri ɓa to mbai dɔ dee ndá Juda, ŋgolə Senua ɓa to mbai gə́ njekɔm’g joo gə́ mee ɓee-boo’g lé tɔ.
10 Njékinjanéməsje ɓa nee: Jedaeja, ŋgolə Jojarib gə Jakḭ 11 gə Seraja, ŋgolə Hilkija gə́ to ŋgolə Mesulam gə́ to ŋgolə Sadɔk gə́ to ŋgolə Merajot gə́ to ŋgolə Ahitub gə́ to njekaa dɔ kəi-Ala ləm, 12 gə deḛ gə́ to gel-bɔje ləa gə́ to njéra kula mee kəi-Ala’gje d’as tɔl jinaijoo gə dɔ dee rɔ joo giree-joo (822) ləm, gə Adaja, ŋgolə Jeroham gə́ to ŋgolə Pelalia gə́ to ŋgolə Amsi gə́ to ŋgolə Jakari gə́ to ŋgolə Pasur gə́ to ŋgolə Malkija 13 gə deḛ gə́ to mbai dɔ njémeekəije lə gel-bɔje lə dee d’as tɔl joo dɔ dee rɔ-sɔ giree-joo (242) ləm, gə Amasai, ŋgolə Ajareel gə́ to ŋgolə Ahjai gə́ to ŋgolə Mesilemot gə́ to ŋgolə Imer 14 gə deḛ gə́ to gel-bɔje ləa gə́ to bao-rɔje d’as tɔl dɔ dee rɔ joo giree-jinaijoo (128) ləm tɔ. Jabdiel, ŋgolə Gedolim ɓa to mbai dɔ dee.
15 Deḛ gə́ to Ləbije ɓa nee: Semaeja, ŋgolə Hasub gə́ to ŋgolə Asrikam gə́ to ŋgolə Hasabia gə́ to ŋgolə Buni 16 gə Sabetai gə Jojabad gə́ to njékaa dɔ kulaje gə́ gir kəi-Ala’g ləm, deḛ to barkəm mbaije lə Ləbije ləm tɔ, 17 gə Matania, ŋgolə Mise gə́ to ŋgolə Jabdi gə́ to ŋgolə Asap to njekun dɔ pa pidije loo-ra-tamaji’g ləm, gə Bakbukia yeḛ gə́ njekɔm’g joo mbuna ŋgakea̰je’g ləm, gə Abda, ŋgolə Samua gə́ to ŋgolə Galal gə́ to ŋgolə Jedutun ləm tɔ. 18 Bula lə Ləbije gə́ mee ɓee-boo gə́ to gə kəmee’g lé ɓa nee: d’as tɔl joo dɔ dee rɔ jinaijoo giree-sɔ (284).
19 Njéŋgəm takəije ɓa nee: Akub gə Talmo̰ gə deḛ gə́ to gel-bɔje lə dee d’as tɔl gə dɔ dee rɔ siri giree-joo (172).
20 Ges Israɛlje gə njékinjanéməsje gə Ləbije lé deḛ lai d’isi mee ɓee-booje gə́ Juda ar nana kara si loo gə́ to kea̰-kea̰’g. 21 Deḛ gə́ to njéra kula kəi-Ala’d gə́ raje lé d’isi dɔdərlooje’g lé ndá Siha gə Gispa ɓa to mbaije lə dee.
22 Mbai dɔ Ləbije gə́ d’isi Jerusalem lé to Uji, ŋgolə Bani gə́ to ŋgolə Hasabia gə́ to ŋgolə Matania gə́ to ŋgolə Mise mbuna gel-bɔje’g lə Asap. Deḛ lé to gə́ njékɔspaje ləm, gə́ njékaa dɔ paje mee kəi-Ala’g ləm tɔ. 23 Mbata mbai un ndia wɔji ne dɔ né gə́ d’a kar njékɔspaje ndá d’wɔji njaŋg mba kar dee gə ndɔ dee ndɔ dee ya.
24 Petaja, ŋgolə Mesejabeel gə́ to gel bɔ lə Jera gə́ to ŋgolə Juda lé to njenai rɔ mbai’g mbata lə ta néje lai gə́ wɔji dɔ koso-dəwje lé.
Jibje d’isi ɓee-kogoje gə́ gugu dɔ Jerusalem
25 Mee ɓee-kogoje’g gə dɔ naŋgje’g lə dee lé deḛ gə́ to ginkoji Judaje d’isi Kirjat-Arba gə ŋgan-ɓeeje ləa ləm, gə Dibo̰ gə ŋgan-ɓeeje ləa ləm, gə Jekabseel gə ɓee-kogoje ləa ləm, 26 gə Juje gə Molada gə Bet-Palet 27 gə Asar-Sual gə Beer-Seba gə ŋgan-ɓeeje ləa ləm, 28 gə Siklag gə Mekona gə ŋgan-ɓeeje ləa ləm, 29 gə En-Rimo̰ gə Sorea gə Jarmut 30 gə Janoa gə Adulam gə ŋgan-ɓeeje ləa ləm, gə Lakis gə dɔ naŋg’d ləa ləma, gə Ajeka gə ɓee-kogoje ləa ləm tɔ. Deḛ d’isi un kudee ɓee gə́ Beer-Seba saar teḛ wəl-loo gə́ Hinɔm.
31 Deḛ gə́ to ginkoji Bḛjamije lé d’isi un kudee Geba gə Mikmas gə Aja gə Betel gə ŋgan-ɓeeje ləa ləm, 32 gə Anatot gə Nob gə Hanania 33 gə Asɔr gə Rama gə Gitayim 34 gə Hadid gə Seboyim gə Nebalat 35 gə Lod gə Ono gə́ to wəl-loo lə njékulaje ləm tɔ.
36 Ləbije gə́ na̰je d’ḭ mbuna njé’g Juda d’aw d’isi na̰’d gə njé gə́ lə Bḛjami.
© Ngambai Bible © Alliance Biblique du Tchad 1989, 2015.
