Néra njé gə́ Samari gə njé gə́ Jerusalem to asəna gə néra kaiya-dené bèe
1 Njesigənea̰ ulam ta gə rɔtaje nee pana: 2 I ŋgon-dəw lé ŋgako̰ na̰je joo d’isi keneŋ gən, to ŋgama̰dje gə́ ko̰ deeje kára ba. 3 Deḛ ra kaiya mee ɓee gə́ Ejiptə, deḛ ra kaiya gə ma̰də dee ba ya, lé neelé ɓa dəwje mam mbà dee keneŋ ləm, mbudu dɔ kum dee keneŋ ləm tɔ. 4 Yeḛ gə́ tɔg ria lə Ohola, yeḛ gə́ ndɔḭ ria lə Oholiba, deḛ to gə́ kamaje ya ndá deḛ d’oji ŋganje gə́ diŋgam gə njé gə́ dené d’am ya. Ohola wɔji dɔ Samari, Oholiba wɔji dɔ Jerusalem tɔ. 5 Ohola uba goo ndukun ləa ya̰ ar mal njéto səaje gə́ to Asirije gə́ to njéboataɓeeje ləa o̰ mée lèm-lèm. 6 Deḛ lé d’ula kubuje gə́ tila ndul piro-piro rɔ dee’g ləm, deḛ to njéguburuɓeeje gə mbaije ləm, deḛ lai to basaje gə́ kura yaa̰ ləma, gə njégər goso-kal-kundaje ləm tɔ. 7 Yeḛ ra sə dee kaiya, Asirije lai gə́ maji d’unda mar deeje lé, deḛ lai gə́ mée o̰ lèm-lèm dɔ dee’g lé yeḛ ar rəa mina̰ sə dee ləm, yeḛ ar rəa mina̰ gə magəje lə deḛ lai ləm tɔ. 8 Yeḛ ya̰ goo néra kaiya-dené gə́ yeḛ ḭ ne Ejiptə lé el, mbata deḛ to səa gə ma̰dee ba ləm, deḛ mbudu dɔ kumee ləma, deḛ ndɔree dan néra kaiya-déné’g lé ləm tɔ. 9 Gelee gə́ nee ɓa neḛ n’ubá n’yá̰ ne meḛ ji njéto səaje’g, meḛ ji Asirije’g deḛ gə́ yeḛ ar mal dee o̰ mée lèm-lèm lé ya. 10 Deḛ tɔr kubuje rəa’g lai d’yá̰ kudee dum ləm, deḛ taa ŋganeeje gə́ diŋgam gə njé gə́ dené ləma, deḛ tɔlee-yeḛ nja gə kiambas ləm tɔ. Ria ɓar ne mbuna denéje’g gə goo rəwta-gaŋgje gə́ gaŋg dəa’g lé.
11 Ŋgokea̰ gə́ Oholiba lé oo bèe ya nɛ lé bèe kara yeḛ ar mal néje gə́ ula pər mée’g to yaa̰ ur dɔ kea̰’g, néra kaiya-dené ləa ur dɔ ka̰ ŋgokea̰’g. 12 Mal Asirije o̰ mée lèm-lèm, deḛ to gə́ njéguburuɓeeje gə mbaije gə́ to njéboataɓeeje ləa gə́ d’ula kubu gə́ bḭ maji rɔ dee’g ləm, deḛ to njégər goso-kal-kundaje ləma, gə basaje lai gə́ kura yaa̰ ləm tɔ. 13 Neḛ n’oo to gə́ yeḛ ar rəa mina̰ ar deḛ joo bɔr d’un rəw néra gə́ kára ba ya. 14 Oholiba ar néra kaiya-dené ləa ḭ dɔ maree’d gə́ kédé-kédé. Yeḛ oo néndaji-diŋgamje gə́ tḭja kaar ndògo-bɔrɔje’g, to néndaji rɔ Kaldeje gə́ tḭja gə né gə́ kas bèe ləm, 15 gə ndarje reŋ dee’g ləm, gə kubu gə́ ndaŋg mèr gə́ ɓiri dɔ dee’g ləm, deḛ lai d’unda rɔkunda lə mbaije ləma, kəm dee to tana gə kəm Babilɔnje gə́ ɓee gə́ Kalde to gə́ ɓee-koji dee lé ləm tɔ. 16 Loo gə́ yeḛ un kəmee ɓèd ila dɔ dee’g ndá mal dee o̰ mée lèm-lèm aree ula njékaḭkulaje mee ɓee gə́ Kalde. 17 Ndá Babilɔnje d’aw rəa’g gə mba korè səa na̰ dɔ tira-ndigi-ŋgawje’g ləa, deḛ d’ar rəa mina̰ gə néra kaiya-dené lə dee ləm, yeḛ ar rəa mina̰ sə dee na̰’d ləm tɔ ndá gée gə́ gogo mee tel ndigi dee el. 18 Néra kaiya-dené ləa lé to raga pai-pai, yeḛ ya̰ kudee dum, bèe ɓa mee neḛ tel ndigee el to gə́ mee neḛ tel ndigi ne ŋgokea̰ gə́ dené el lé bèe tɔ. 19 Yeḛ ar néra kaiya-dené ləa ḭ dɔ maree’d gə́ kédé-kédé, yeḛ ə̰ji ne dɔ ndɔje gə́ yeḛ nai ne gə ma̰dee ɓəi loo gə́ yeḛ ra ne kaiya mee ɓee gə́ Ejiptə lé tɔ. 20 Malee o̰ mée lèm-lèm gə́ dɔ njéto səaje’g, deḛ gə́ barkəmrɔ dee to asəna gə ka̰ mulayḛ̀je-je bèe ləm, d’ɔm ne mán dee to gə́ ka̰ kundaje bèe ləm tɔ.
Bo̰ néra Jerusalem a kɔs təa’g
21 I lé ar məəi olé dɔ kaiya raije’g gə ma̰di ba loo gə́ Ejiptəje mam mbài gə mbata dɔ kumi gə́ mbudu lé. 22 Gelee gə́ nee ɓa Oholiba, Mbaidɔmbaije gə́ Njesigənea̰ pa togə́bè pana: Aa oo, n’a gə kɔs kudu njéto seije kar dee d’ḭ səi, deḛ gə́ i tel ndigi dee el lé ndá n’a kar dee d’ḭ gə looje ɓəd-ɓəd ree rɔ səi, 23 Babilɔnje gə Kaldeje lai, gə Pekod, gə Soa, gə Kowa ləm, gə Asirije lai sə dee na̰’d ləm tɔ, deḛ gə́ to basaje gə́ kura yaa̰ ləm, to njéguburuɓeeje gə mbaije ləm, to mbaije gə́ njériɓarje ləma, gə njégər goso kal kundaje ləm tɔ. 24 Deḛ d’a kɔr rɔ kaw rɔ səi gə nérɔje, gə pusu-rɔje, gə ŋgan pusuje ləm, gə koso-dəwje ləm tɔ, d’a kḭ gə looje ɓəd-ɓəd gə dərje gə́ boi-boi ləm, gə ŋgan dərje ləma, gə dɔgugu-rɔje ləm tɔ gə mba ree rɔ ne səi. N’a kɔm rəwta-gaŋg ji dee’g kar dee gaŋg rəwta dɔi’g gə goo godnduje lə dee. 25 N’a kɔm oŋg lə neḛ dɔi’g ndá d’a ra səi gə goo boo-oŋg ləm, d’a tḭja əmi gə mbiije ləma, ges njé’g ləi gə́ nai ndá d’a kwəi yoo-kiambas ləm tɔ, d’a taa ŋganije gə́ diŋgam gə njé gə́ dené ndá ges njé’g ləi gə́ nai lé d’a roo dee tɔ. 26 D’a tɔr kubuje ləi gə́ rɔi’g ləm, d’a tɔr néma̰dje ləi gə́ i ɗɔi ne rɔi lé ləm tɔ. 27 N’a kari unda ŋgaŋ mɔdkaiya ləi gə kaiya raije gə́ i ra mee ɓee gə́ Ejiptə’g, i a tel kila kəmi dɔ dee’g gogo el ŋga ləm, i a tel kḛji dɔ Ejiptə’g el ŋga ləm tɔ.
28 Mbata Mbaidɔmbaije gə́ Njesigənea̰ pa togə́bè pana: Aa ooje, neḛ n’undai n’ilai meḛ ji deḛ gə́ i ə̰ji dee bəḭ-bəḭ’g ləm, meḛ ji dee gə́ i tel ndigi dee’g el ləm tɔ. 29 Deḛ d’a ra səi né gə goo kḛji gə́ d’ḛjii bəḭ-bəḭ ləm, d’a taa nébaoje ləi mbad-mbad ləma, d’a tɔr kubuje ləi kya̰’i kudi dum dum-dum ləm tɔ, rɔkul néra kaiyaje ləi ləm, gə kaiyaje ləi ləma, gə mɔdkaiyaje ləi ləm tɔ d’a to raga pai-pai. 30 Néje nee a teḛ dɔi’g togə́bè mbata i ra kaiya gə ginkoji dəwje gə raŋg ləm, mbata i ar rɔi mina̰ gə magə-poleje lə dee ləm tɔ. 31 I un dɔ gɔl néra ŋgokɔḭ gə́ dené, bèe ɓa n’a kari ai né mee bai-oŋg’d lə neḛ to gə́ yeḛ bèe. 32 Mbaidɔmbaije gə́ Njesigənea̰ pa togə́bè pana:
I a kai né gə́ to mee bai’g lé
To gə́ ŋgokɔḭ gə́ dené bèe ya,
To bai gə́ mée tad ləm, ur ləm tɔ,
I a tel to nékogo gə nédəjindu,
Bai lé néje gə́ keneŋ to yaa̰.
33 I a kai karee tɔli to gə́ kido bèe ləm,
Kar kəmi to ne ndòo ləm tɔ,
To bai gə́ ka̰ ɓəl ləm, gə ka̰ tuji loo ləm tɔ,
To bai gə́ wɔji dɔ Samari gə́ to ŋgokɔḭ gə́ dené lé.
34 I a kai ndá a kai kila ndad
Ndá i a tɔ njigi-njigi ləm,
I a tugu mbài ridi-ridi ləm tɔ
Mbata neḛ Mbaidɔmbaije gə́ Njesigənea̰ ɓa m’pa togə́bè.
35 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: To gə́ i ar məəi wəi dɔ neḛ’g ləm, to gə́ i uba neḛ ya̰ neḛ gooi’g ləm tɔ lé ndá i kara maji kari uba pər kaiyaje ləi gə néra kaiyaje ləi lé togə́bè tɔ.
Ala ila ta dɔ Samari’g gə Jerusalem’g
36 Njesigənea̰ dəjim pana: I ŋgon-dəw lé see i a gaŋgta dɔ Ohola gə Oholiba’g wa. Maji kari ula dee ta néra deeje gə́ mina̰ təsərə! 37 Deḛ d’ya̰ rɔ dee yag dan mɔdkaiya’g ləm, məs wa ji dee mbəgə-mbəgə ləm tɔ, deḛ ra kaiya gə magəje lə dee gə́ mina̰, ŋgan deeje gə́ d’oji d’ar neḛ lé kara deḛ roo dee mba kar dee to nésɔ lə pər lé. 38 Aa ooje, né gə́ deḛ ra sə neḛ tɔɓəi: Mee ndəa’g nee ya d’ar loo lə neḛ gə́ to gə kəmee lé mina̰ ləm, deḛ d’ila ndɔl dɔ ndɔ-kwa-rɔje’g lə neḛ ləm tɔ. 39 Deḛ roo ŋgan deeje d’ar magəje lə dee, tɔɓəi mee ndəa’g neelé ya deḛ d’aw mee loo’g lə neḛ gə́ to gə kəmee mba kila ndɔl dɔ’g. Yee gə́ nee ɓa gə́ né gə́ deḛ ra mee kəi’g lə neḛ. 40 Tɔɓəi deḛ d’ula kula ɓar diŋgamje gə́ dɔ ɓee gə́ əw’g, d’ula njékaḭkulaje rɔ dee’g ndá aa ooje, deḛ d’ḭ d’ḭ kalaŋ ree tɔ. Gə mbata lə dee-deḛ ndá i ndogo mán ləm, i tɔs pɔrɔ kəmi’g ləma, i ɗɔi rɔi gə néma̰dje ləi ləm tɔ. 41 I si dɔ tira gə́ maji péd-péd’g no̰ loo gə́ tabul to keneŋ ndá dɔ tabul’g neelé i unda né lə neḛ gə́ ə̰də sululu gə ubu lə neḛ keneŋ. 42 Ndu koso-dəwje gə́ bula digi-digi ɓar gə rɔlel, mbuna koso-dəwje’g neelé deḛ d’ar Sabaje d’ḭ dɔdilaloo’g ree, to deḛ gə́ d’ula niŋgaje ji ŋgako̰ na̰je gə́ dené gə́ joo lé ləm, gə dɔgugu gə́ maji dum dɔ dee’g ləm tɔ. 43 Yen ŋga neḛ n’dəji rɔ neḛ ta n’wɔji ne dɔ yeḛ gə́ kára gə́ ɓuga dan mɔdkaiya’g lé m’pana: See ɓasinè yeḛ a kaw gə kaiya reaje gə́ kédé-kédé kar dee ree rəa’g tɔɓəi wa. 44 Deḛ d’aw rəa’g to gə́ d’aw ne rɔ kaiya-dené’g bèe. Togə́bè ɓa d’aw ne rɔ Ohola gə Oholiba’g, denéje neelé gə́ to ram-denéje lé. 45 Nɛ diŋgamje gə́ njéra né gə́ gə dɔ najee lé d’a gaŋgta dɔ dee’g to gə́ gaŋg ne ta dɔ denéje gə́ njémɔdkaiyaje’g ləm, to gə́ deḛ gaŋgta dɔ deḛ gə́ njékilaməsje’g ləm tɔ, mbata deḛ to denéje gə́ njémɔdkaiyaje ləm, məs wa ji dee mbəgə-mbəgə ləm tɔ.
46 Mbaidɔmbaije gə́ Njesigənea̰ pa togə́bè pana: N’a mbo̰ koso-dəwje gə́ bula digi-digi dɔ dee’g ləm, n’a kɔm ɓəl-boo dɔ dee’g kar dee tɔr néje gə́ rɔ dee’g mbad-mbad ləm tɔ. 47 Koso-dəwje neelé d’a tila dee gə kɔri-ər ləm, d’a ti dee mbidi-mbidi gə kiambas ləm tɔ, d’a tɔl ŋgan deeje gə́ diŋgam gə njé gə́ dené ləm, d’a roo kəije lə dee ləm tɔ. 48 Togə́bè ɓa n’a kar néra kaiyaje gə́ togə́bè godo mee ɓee’g, d’a ndoo denéje lai kar dee ndaji néra kaiya to gə́ ka̰ sí gə́ seḭ raje lé el ŋga. 49 D’a kar ta néra kaiya lə sí tel wa dɔ sí ləm, néra kaiya lə magə-poleje lə sí lé seḭ a kubaje pəree ləm tɔ. Bèe ɓa seḭ a gərje ne to gə́ neḛ n’to Mbaidɔmbaije gə́ Njesigənea̰ lé.
© Ngambai Bible © Alliance Biblique du Tchad 1989, 2015.
