Ala to njekungaŋga
1 Pakɔs lə Asap gə́ ar bao-pa mba karee ɔs sə dee lé. D’ɔs gə nékimje gə́ gə kuláje.
2 Ala ar dee gəree mee ɓee gə́ Juda gao ləm,
Ria kara ɓar mḭ mee ɓee gə́ Israɛl’g ya ləm tɔ.
3 Kəi-kubu ləa lé to Salem’g ləm,
Loo-siée kara to Sio̰’g ya ləm tɔ.
4 Lée neelé nja ɓa yeḛ guru ɓandaŋgje
Gə dərje gə kiambasje gə nérɔje lé keneŋ ya tɔ.
5 I lé boo-ronduba ləi gə siŋgamoŋ ləi
Ur dɔ mbalje gə́ to ɓəl lé.
6 Bao-rɔje gə́ njékwa diŋgam meḛ dee’gje lé
D’unda dee banrɔ ya,
D’oso gə rudu ɓi lə dee,
Deḛ bao-rɔje lai neelé d’oo loo kaḭ bada dɔ rɔ dee’g el.
7 Loo gə́ i Ala lə Jakob lé tɔji dee jii ndá
Njérɔ gə kundaje gə kundaje lə dee na̰’d deḛ toɓi ndələŋ.
8 Ǝi, i lé to ɓəl kədm-kədm!
See na̰ ɓa askəm kaar dɔ gɔlee’g njaŋg
Loo gə́ oŋg ḭ səi wa.
9 I si mee dara’g ila mber rəwta-gaŋg lé,
Ndá njé gə́ dɔ naŋg nee ɓəl unda dee badə gaŋg dee ar dee d’isi jim
10 Loo gə́ Ala ḭ mba gaŋgta
Gə mba kaji ne njénékəmndooje lai gə́ dɔ naŋg nee.
11 Dəw lé lé si dan oŋg’d ləa kara a kɔs gajii ya
Loo gə́ boo-oŋg ləi lai taa rɔi pəl-pəl.
12 Maji kar sí unje ndu sí arje Ala lə sí gə́ Njesigənea̰ lé
Ndá tɔlje ne təa bém ya.
Deḛ lai gə́ gugu dəa sub lé
Maji kar dee ree gə nénojije d’ar Ala gə́ to ɓəl kədm-kədm lé.
13 Beelé lə mbai-ɓeeje lé yeḛ undá naŋg rab-rab ləm,
Yeḛ to ɓəl kədm-kədm kəm mbaije gə́ dɔ naŋg nee ləm tɔ.
© Ngambai Bible © Alliance Biblique du Tchad 1989, 2015.
