Pa no̰ ndòo mbaije gə́ njékaa dɔ dəb ɓeeko̰je gə́ Israɛl
1 Ma lé maji kam m’ɔr ndum gə́ tar m’ɔs pa no̰ ndòo mbaije gə́ njékaa dɔ dəb ɓeeko̰je gə́ Israɛl 2 ndá m’a pana:
See kɔḭ to gə́ ɗi wa.
Yeḛ to ko̰ toboḭ
Gə́ to mbuna toboḭje’g,
Mbuna ŋgan toboḭje’g lé ɓa
Yeḛ ul ŋganeeje keneŋ.
3 Yeḛ ndoo yeḛ gə́ kára mbuna ŋganeeje’g
Aree tel to kura toboḭ
Ndá yeḛ aree gər gaŋg nékwa ləa,
Yeḛ sɔ dəwje tɔ.
4 Ginkoji dəwje gə raŋg d’oo ta ləa
Ndá d’wá mee bwa’g lə dee,
Deḛ d’ula niŋga əmee’g
D’aw ne səa ɓee gə́ Ejiptə.
5 Loo gə́ kea̰je oo to gə́ yeḛ ŋginá pi ləm,
Oo to gə́ meekundayel ləa tel to né gə́ kari ba ləm tɔ ndá
Yeḛ un ŋgonee gə́ raŋg kára mbuna ŋganeeje’g
Ndée aree tel to kura toboḭ.
6 Yeḛ lé njaa mbuna toboḭje’g ləm,
Yeḛ tel to kura toboḭ ləm tɔ ndá
Yeḛ gər gaŋg nékwa ləa,
Yeḛ sɔ dəwje tɔ.
7 Yeḛ tuji kəi-mbaije lə dee gə siŋgamoŋ ləm,
Yeḛ tuji ɓee-booje lə dee ləma,
Ɓee gə néje lai gə́ to keneŋ lé
Yeḛ tuji dee pugudu-pugudu
Gə ndu ndaŋg rɔje ləa ləm tɔ.
8 Ginkoji dəwje gə raŋg gə dəb ɓeeko̰je gə́ gugu dəa sub lé
D’ɔm na̰’d téréré gə mba rɔ səa,
Deḛ d’ila ba̰dəje lə dee gugu ne dəa
Ndá d’wá ne mee bwa’g lə dee.
9 Deḛ d’ula niŋga əmee’g d’ilá mee sa̰duk’g
D’aw səa rɔ mbai gə́ Babilɔn’g,
Tɔɓəi deḛ d’aw səa gadloo-kaar-kɔgərɔ’g
Mba kar dəw oo ndia dɔ mbalje’g lə Israɛl gogo el ŋga.
Pa no̰ ndòo kag-nduú
10 Kɔḭje to to gə́ i bèe,
Yeḛ to tana gə nduú
Gə́ mea̰ mbɔr mán’g,
Yeḛ andə wul barkəmeeje’g bo̰-bo̰
Mbata lə mán gə́ to yaa̰.
11 Barkəmeeje gə́ maji dum lé
Tel to kag-mbai lə mbaije,
Gə goo ŋgal ləa lé yee turu ne dɔ barkəmeeje
Gə́ udu na̰ jigi-jigi lé,
Kəm dəwje mbo̰ na̰ dəa’g sɔmɔmo̰
Mbata duu-dɔ-loo ləa ləm,
Gə barkəmeeje gə́ tɔ yéŋgé-yéŋgé ləm tɔ.
12 Nɛ nduú neelé deḛ tɔree gə boo-oŋg d’ɔm naŋg,
Lel gə́ ḭ bər ula keneŋ ar ka̰dee tudu kurum-kurum,
Barkəmeeje gə́ siŋ na̰’d siŋ-siŋ təd ləm,
Tudu kurum-kurum ləma,
Pər roo dee dula-dula ləm tɔ.
13 Bèe ɓa ɓasinè deḛ meaa̰ dɔdilaloo’g
Dɔ naŋg gə́ tudu kurum-kurum’g
Gə́ mán godo keneŋ.
14 Pər ḭ barkəmeeje’g
Roo ka̰dee dula-dula,
Barkəmeeje gə́ siŋ na̰’d siŋ-siŋ
Gə mba tel to kag-mbai lə mbaije lé godo.
Yee nee ɓa to pa no̰ ndòo ndá
Yee ɓa d’a no̰ ne ndòo ya.
© Ngambai Bible © Alliance Biblique du Tchad 1989, 2015.
