ELIHU ILA TA LEA-YEḚ KENEŊ
1 Dəwje gə́ munda neelé d’əw rɔ dee kila Jɔb ta’g. Mbata yeḛ oo rəa gə́ dəw gə́ njera nédanasur. 2 Yen ŋga oŋg ḭ gə Elihu, ŋgolə Barakel, dəw gə́ Buj gə́ to gə́ gel bɔ’g lə Ram pu dɔ Jɔb’g. Oŋg ḭ səa pu dəa’g mbata yeḛ oo rəa gə́ dəw gə́ njera nédanasur no̰ Ala’g lé. 3 Nɛ Jɔb kara oŋg ḭ səa pu dɔ baokuraje’g ləa gə́ munda to mbata deḛ d’iŋga ta gə́ kəm kilá’g el nɛ lé bèe kara deḛ d’ila ta dəa’g. 4 Elihu ŋgina gə mba koo ta ɓa gə mba kula Jɔb ɓəi mbata deḛ gə́ raŋg lé to dəwje gə́ tɔg d’undá. 5 Elihu oo to gə́ ta gə́ raŋg gə́ kəm kilá’g godo ta dəwje gə́ munda neelé ndá oŋg ḭ səa pu.
Elihu ɔr gin né gə́ aree ne pata lé
6 Yen ɓa Elihu, ŋgolə Barakel, dəw gə́ Buj lé un ta pa pana:
Ma m’to basa, seḭ toje dəwje gə́ tɔg,
Gelee gə́ nee ɓa ma m’ɓəl ləm gə maḭ gə rɔm
Gə mba riba dɔ takə̰ji ləm kar sí.
7 Ma m’ə̰ji məəm’g m’pana: Dəw gə́ tɔg ɓa as gər pata ləm,
Ləbje gə́ bula askəm ndoo dəw ta kəmkàr ləm tɔ.
8 Nɛ né gə́ gəd gə́ to mee dəw’g lé to gə́ ndilee,
To kəmə lə Bao-siŋgamoŋ gə́ ula gosonégər mée’g.
9 Ləb gə́ bula ɓa ar dəw kəmkàr el ləm,
Deḛ gə́ to ɓugaje kara d’askəm kɔr ne kəm ta el ləm tɔ.
10 Aa oo, gelee gə́ nee ɓa ma m’pa ne m’pana: Majii kar sí ooje ta ləm.
Ma kara ma riba dɔ takə̰ji ləm tɔ.
11 Ma m’ŋgina mba koo rudu taje lə sí ləm,
M’tən gin takə̰jije lə sí ləma,
Gə taje lə Jɔb gə́ seḭ tenje ləm tɔ.
12 M’ur mbim gèŋ gə́ dɔ sí’g lai ya,
Nɛ aa ooje, dəw kára kara gə́ mbuna sí’g dum dɔ Jɔb el ləm,
Dəw kára kara mbuna sí’g ɔsee dɔ ta’g ləa el ləm tɔ.
13 Lé bèe kara seḭ pajena: Seḭ iŋgaje kəmkàr rəa’g bèe el,
Ala ɓa askəm kɔsee dɔ ta’g ləa ɓó dəw el.
14 Yeḛ pata wɔji ne dɔm-ma njoroŋ el,
Bèe ɓa ta gə́ m’a gə́ kilá keneŋ a kaw na̰’d gə ka̰ sí-seḭ el tɔ.
15 Deḛ lé ɓəl ndá deḛ d’ila ta gə́ raŋg’d el!
D’oo taje gə́ kəm pa el to!
16 Ma m’ŋgina nɛ seḭ paje ta el ləm,
Seḭ əwje rɔ sí ɓó seḭ ooje ta gə́ kəm kilá’g el ləm tɔ.
17 Yen ɓa to ta ləm-ma ŋga, ma m’ndigi kilá’g ləm,
Ma kara m’ndigi riba dɔ takə̰ji ləm ləm tɔ.
18 Mbata taje rusu məəm tub-tub,
Ndil ɔs məəm ɓɔḭ-ɓɔḭ gə mba kam m’pa.
19 Aa ooje, loo gə́ məəm’g lé to asəna gə mán-nduú gə́ mḭ gə́ iŋga loo teḛ el ləm,
To asəna gə ɓɔl-kɔm-mán-nduú gə́ sigi gə́ a kinja bim bèe ləm tɔ.
20 Ma pata ɓa m’a kila ne kəmə pugudu ɓəi ləm
M’a teḛ tam gə mba kilá ta’g ləm tɔ.
21 M’a kɔr kəm dəw kára kara gə mbata lə kəmee el ləm,
Ma bɔr bèl dəw kára kara el ləm tɔ.
22 Mbata ma m’gər loo bɔr bèl dəw el,
Ɓó lé bèe ndá njekṵdam a kɔrm keneŋ kalaŋ ya.
© Ngambai Bible © Alliance Biblique du Tchad 1989, 2015.
