1 Ta gə́ Njesigənea̰ ula Jeremi, njetegginta wɔji ne dɔ ginkoji dəwje gə raŋg.
Ndərta gə́ wɔji dɔ ɓee gə́ Ejiptə lé
2 Ta gə́ wɔji dɔ Ejiptə. Ta gə́ wɔji dɔ njérɔje lə Parao̰ Neko, mbai gə́ Ejiptə gə́ si mbɔr baa-boo gə́ Epratə, mee ɓee gə́ Karkəmis ləm, gə́ Nebukadnesar, mbai gə́ Babilɔn dum dee mee ləb ko̰ɓee lə Jojakim, ŋgolə Jojias, mbai gə́ Juda gə́ njekɔm’g sɔ ləm tɔ .
3 Gɔlje dərje gə́ lam gə njé gə́ boi
Ndá awje ne mba rɔje ne!
4 Tɔje kundaje
Seḭ njérɔ gə kundaje, uba deeje!
Teḛje gə dɔguguje lə sí dɔ sí’g ləm,
Olje ndo̰ niŋga-ndəije lə sí ləma,
Ulaje kubu-rɔ gə́ ŋgira kiŋ-kiŋ rɔ sí’g ləm tɔ!
5 See ɗi ɓa m’oo nee wa!
Deḛ ɓəl, deḛ rəm gogo,
Njéba̰je lə dee dum dɔ dəwje lə dee
Gə́ njésiŋgamoŋje lé,
Deḛ d’aḭ lal kɔm rəd ...
Ɓəl-boo taa looje pəl-pəl.
Njesigənea̰ ɓa pa bèe.
6 Maji kar njerɔkwɔilɔ unda mareeje lé
Aḭ taa ne rəa el ləm,
Maji kar bao-rɔ unda mareeje teḛ ta’g el ləm tɔ!
Loo gə́ dɔgel, dɔ koŋgo baa-boo gə́ Epratə lé
Deḛ d’unda ndolè keneŋ ləm,
Deḛ tɔr toso ləm tɔ.
7 See na̰ ɓa ḭ aw gə́ nee to gə́ baa Nil
Gə́ manee ula pujuju-pujuju
To gə́ kəm-rəw-mán bèe wa.
8 To Ejiptəje ya,
Deḛ d’ḭ d’aw gə́ nee
To gə́ baa Nil bèe ləm,
Man dee ula pujuju-pujuju
To gə́ kəm-rəw-mán bèe ləm tɔ.
Deḛ pana:
N’a kḭ taaje dɔ naŋg nee yal-yal ləm,
N’a tujije ɓee-booje
Gə dəwje gə́ d’isi keneŋ ləm tɔ.
9 Seḭ kundaje, ar sí j’awje!
Seḭ pusu-rɔje, ar sí j’ɔsje rɔ sí ɓad!
Seḭ njésiŋgamoŋje,
Maji kar sí teḛje gə́ raga
Deḛ gə́ Etiopi gə Put
Gə́ gər loo kwa dər maji lé ləm,
Gə deḛ gə́ Lud
Gə́ gər goso rɔ gə ɓandaŋg maji ləm tɔ!
10 Ndɔ gə́ ɓogənè to ndɔ lə Mbaidɔmbaije,
Njesigənea̰ gə́ njeboo-néje,
Ndɔ neelé to ndɔ dalba̰,
Areeje dal ne ba̰ gə njéba̰je ləa.
Kiambas sɔ né aree asee nag-nag ləm,
Yee ai məs dee ndan tub-tub ləm tɔ.
Mbata deḛ to nékinjanéməsje
Le Mbaidɔmbaije gə́ Njesigənea̰ gə́ njeboo-néje
Mee ɓee gə́ dɔgel ləm,
Gə dɔ koŋgo baa-boo gə́ Epratə ləm tɔ.
11 Aw mee ɓee gə́ Galaad
Taa no̰-kag gə́ ra gə kuma̰,
I Ejiptə gə́ to asəna gə ŋgoma̰də bèe.
I taa kuma̰je bula gə́ kédé-kédé kari ba
Ɓó a kaji ne rɔi el.
12 Ginkoji dəwje gə raŋg d’oo
Ta nérɔkul gə́ teḛ dɔi’g ləm,
Gə́ kiije ləi gə́ ɓar
Taa naŋg nee pəl-pəl ləm tɔ,
Mbata njérɔje d’unda ndolè dɔ na̰’g ləm,
Deḛ lai tɔr toso na̰’d ləm tɔ.
13 Ta gə́ Njesigənea̰ ula Jeremi, njetegginta wɔji ne dɔ Nebukadnesar, mbai gə́ Babilɔn gə́ ndigi ree rɔ ɓee gə́ Ejiptə lé .
14 Ilaje mberee mee ɓee gə́ Ejiptə ləm,
Ar deeje d’oo taree loo gə́ Migdɔl ləma,
Ar deeje d’oo taree mee ɓee-boo
Gə́ Nop gə Tapanɛs ləm tɔ
Pajena: Ḭta wa dɔ gɔl rɔi,
Mbata kiambas sɔ né gugu dɔi sub!
15 See gelee ban ɓa d’aw
Gə njésiŋgamoŋje ləi lé wa.
Deḛ d’aar kɔgərɔ el
Mbata Njesigənea̰ ar dee toso.
16 Deḛ gə́ yeḛ ar dee d’unda ndolè lé
Bula yaa̰,
Deḛ tɔr toso dɔ na̰’d gə́ yo gə́ nee
Ndá deḛ pana:
Ar sí n’telje gə́ rɔ koso-dəwje’g lə sí
Gə́ mee ɓee-koji sí’g
Gə́ to əw gə kiambas gə́ njetujiloo lé.
17 Lée neelé deḛ ra né wəl keneŋ pana:
Parao̰, mbai gə́ Ejiptə,
To kaa né gə́ ɓar gə́ ɓar ba ya,
Yeḛ ar kàree dəs mba̰.
18 Ma m’to njesikəmba!
Mbai gə́ ria lə Njesigənea̰ lé pa bèe.
To gə́ Tabɔr gə́ mbuna mbalje’g bèe ləm,
To gə́ Karmel gə́ to ta baa-boo-kad’g ləm tɔ lé
Yeḛ a gə ree ya.
19 Waje dɔgɔl rɔ sí
Mba kaw ɓee-ɓər’g,
Seḭ gə́ síje Ejiptə
Gə́ toje asjena gə ŋgama̰dje bèe lé.
Mbata Nop a tel dɔdilaloo ləm,
A tuji pugudu-pugudu ləma,
Dəw kára kara a kisi keneŋ el ŋga ləm tɔ.
20 Ejiptə to asəna gə ma̰də maŋg
Gə́ maji yaa̰ ...
Njetujiloo ḭ par gə́ dɔgel,
Yee aw ree ...
21 Njérɔje taa ne larje ləa
D’isi ne mbuna dee’g
Asəna gə ŋgan maŋgje
Gə́ d’ər ndɔl-ndɔl,
Deḛ nja kara tel gir dee
D’ila d’aḭ ɓó d’ar kɔgərɔ el,
Mbata ndɔ némeeko̰ lə dee
Teḛ dɔ dee’g,
To kàr kar bo̰ néra dee ɔs ta dee’g.
22 D’aw rug-rug to gə́ lije bèe,
Mbata njéba̰je d’aw ree gə njérɔje na̰’d
Deḛ d’aw ree gə́ dəa’g gə tinaje
To gə́ njétuga-kagje bèe.
23 Lée kag-kɔr ləa siŋ siŋ-siŋ kara
Deḛ tuga mbad-mbad gaŋg.
Njesigənea̰ ɓa pa bèe.
Mbata deḛ bula d’unda beedéje
Ɓó dəw askəm tura dee el.
24 Ejiptə gə́ to asəna gə ŋgoma̰də bèe lé
Deḛ d’ilá ji koso-dəwje gə́ d’ḭ dɔgel.
25 Njesigənea̰ gə́ njeboo-néje gə́ to Ala lə Israɛlje lé pana: Aa ooje, m’a ra né gə́ kədərə gə Amo̰, magə gə́ No ləm, gə Parao̰, gə Ejiptə, gə magəje ləa, gə mbaije ləa ləma, gə Parao̰ gə deḛ lai gə́ d’ɔm meḛ dee dəa’g lé ləm tɔ. 26 M’a kuba dee kya̰ dee meḛ ji deḛ gə́ ndigi kar dee d’udu ləm, meḛ ji Nebukadnesar, mbai gə́ Babilɔn ləma, gə meḛ ji kuraje’g ləa ləm tɔ. Ndá gée’g gogo, dəwje d’a tel si mee ɓee gə́ Ejiptə to gə́ mee ndəaje gə́ kédé lé. Njesigənea̰ ɓa pa bèe.
Israɛlje d’ɔr dɔ dee kúla’g
27 Nɛ i kura ləm Jakob, maji kari ɓəl el,
I Israɛl, maji kari unda bala el!
Mbata m’a kɔri dɔ naŋg gə́ əw’g ləm,
M’a kɔr ŋgakaije ɓee-ɓər’g ləm tɔ,
Jakob a tel ree, yeḛ a kal rəa dan kwa rɔ’g ləm,
Gə dan sí lɔm’g ləm tɔ,
Dəw kára kara gə́ njejɔgee a godo .
28 I kura ləm Jakob, maji kari ɓəl el.
Njesigənea̰ ɓa pa bèe,
Mbata m’a nai səi.
M’a tuji ginkoji dəwje gə raŋg lai
Gə́ m’sani mbuna dee’g lé pugudu,
Nɛ i ndá m’a tujii pugudu el,
M’a kar bo̰ nérai ɔs tai’g
Nɛ gə goo rəbee ya
Ɓó m’as kya̰’i lal kwɔjii kəmkàr el.
© Ngambai Bible © Alliance Biblique du Tchad 1989, 2015.
