Pool aḭ bada dɔ kula’g ləa
1 Ma Pool lé ma m’ra ndòo rɔ sí’g gə goo kaw yururu gə meemaji lə Kristi lé, ma lé loo gə́ m’isi mbuna sí’g ndá m’əḭ kəm sí’g el nɛ loo gə́ m’isi ŋgərəŋ ndá m’tɔg sí pir. 2 Ma m’ra ndòo rɔ sí’g mba kar loo gə́ m’a gə kisi mbuna sí’g lé seḭ a kilaje meeko̰ dɔm’g karm m’tɔg sí ne pir el. Yee ɓa, ma m’wɔji gə mba ra gə dəwje gə́ na̰je gə́ d’ə̰ji ta meḛ dee’g pana: Né gə́ jeḛ n’ra lé to gə goo ka̰ njé gə́ dɔ naŋg nee. 3 Jeḛ j’isi mbuna njé gə́ dɔ naŋg nee ya nɛ rɔ gə́ jeḛ n’rɔ lé to gə goo ka̰ njé gə́ dɔ naŋg nee el. 4 Tɔgərɔ ya, nérɔje lə síjeḛ lé to gə́ ka̰ njé gə́ naŋg nee el nɛ nérɔje lə sí lé Ala nja ar dee to nérɔje gə́ gə siŋga dee mba kunda kəi-kaar-kɔgərɔje lə dee naŋg rə̰dəŋ-rə̰dəŋ. 5 Nérɔje lə sí lé jeḛ j’unda ne tamaḭje gə nébeeléje lə dəwje gə́ ḭ udu rəw ɔg dee gər ta lə Ala j’unda dee ne naŋg rə̰dəŋ-rə̰dəŋ ləm, takə̰ji lə dəwje lai lé jeḛ n’kiri dee j’wa dee j’ar dee d’oso kul no̰ Kristi’g ləm tɔ. 6 Jeḛ j’aar dɔ gɔl sí’g kəgəgə mba kar bo̰ kalta lə sí gə́ rara kara ɔs ta sí’g bɔsɔrɔ loo gə́ dɔ ŋgonkoji lə sí ɔr ne njal lé.
7 Gir né gə́ raga gə́ seḭ ooje puduru ba lé see to né mba̰ wa. Ɓó lé dəw kára ə̰ji ta mée’g pana: Neḛ n’to ka̰ Kristi ndá maji karee oo gao to gə́ jeḛ kara jeḛ n’to ka̰ Kristi tɔ. 8 Ɓó lé m’ti rɔm bəl dɔ ndu gə́ Mbaidɔmbaije un am mba kar rɔ sí ɔs ne ar sí undaje ne siŋga sí dɔ maree’g ɓó mba tuji sí ne el ndá m’a ra né kəmkul el. 9 Ma m’ndigi kar sí ə̰jije to gə́ maktub gə́ m’unda m’ar sí lé ma m’ra mba kar sí ndəbje ne pəd-pəd el. 10 Mbata njé gə́ na̰je pana: Maktubje ləm lé ta gə́ nuŋga so ɓa to keneŋ, nɛ loo gə́ ma m’aar gə darɔm kəm sí’g ndá ma m’aar asəna gə yɔ-dəw ləm, tapam kara kul kwɔji-kwɔji ləm tɔ. 11 Maji kar yeḛ gə́ pa togə́bè lé ə̰ji ta mée’g oo to gə́ tapa sí gə́ jeḛ m’pa mee maktub’g gə́ jeḛ ndaŋg loo gə́ jeḛ n’godo rɔ sí’g lé yee ɓa to gə́ néra sí loo gə́ jeḛ j’isi sə sí na̰’d tɔ.
12 Tɔgərɔ ya, njé gə́ na̰je mbuna deḛ gə́ pidi rɔ dee mbuna sí’g lé jeḛ j’as koo rɔ sí as gə ka̰ dee-deḛ el ləm, j’as kwa néra sí kwɔji ne néra dee el ləm tɔ. Ɓó lé deḛ nja d’wa rɔ dee d’wɔji ne na̰ ndá kəmkàr na meḛ dee tas. 13 Nɛ jeḛ lé jeḛ ndigi ti rɔ sí karee al dɔ loo el. Jeḛ lé loo kula gə́ Ala unda kəmee ar sí j’aw ne saar n’teḛ ne rɔ sí’g lé yee ɓa, jeḛ j’a ti ne rɔ sí dɔ’g ya. 14 Tɔgərɔ ya, jeḛ lé j’a kar ti rɔ lə sí lé al dɔ loo to gə́ lə j’aw njal n’teḛ rɔ sí’g el, mbata jeḛ j’aw njal n’teḛ rɔ sí’g gə Tagə́maji lə Kristi ya. 15 Né gə́ jeḛ n’ti ne rɔ sí dɔ’g lé to né gə́ al dɔ loo el ləm, to ti rɔ dɔ kula’g lə dəw gə́ raŋg el ləm tɔ. Nɛ meḛ sí yel tɔ mba kar ɓó lé meekun lə sí a kḭ ne dɔ maree’g gə́ kédé-kédé ndá j’a kar kula ra sí mbuna sí’g ila ne gadee gə́ kédé gə goo kəm rəw nimee gə́ yeḛ wɔji ar sí lé ləm, 16 kar sí j’aw j’ila mber Tagə́maji lé njal gə́ mee ɓeeje gə́ to gir ɓee’g lə sí lé ləm tɔ, ɓó j’a kunda rɔ sí dɔ kula’g lə mar síje ti ne rɔ sí el. 17 Togə́bè ɓa yeḛ gə́ a gə ti rəa ndá maji karee ti rəa gə ri Mbaidɔmbaije ɓa . 18 Mbata yeḛ gə́ ɔs gaji kula rəa gə dɔrea lé d’a kée gə́ majikoji lé el, nɛ yeḛ gə́ Mbaidɔmbaije ɓa ɔs gaji kula rəa ɓa d’a kée gə́ majikoji ya.
© Ngambai Bible © Alliance Biblique du Tchad 1989, 2015.
