Ala, mbai-le-njeaje to Njerɔkunda
1 Njesigənea̰ lé o̰ ɓee,
Dəwje ndəb ne pəd-pəd,
Yeḛ si dɔ kalimbai gə́ to dɔ Nékundaje gə́ dara’g lé tar ndoi
Ar naŋg yə ne ɓugu-ɓugu .
2 Njesigənea̰ lé to gə́ boo mee ɓee gə́ Sio̰’g lé
Yeḛ lé ur dɔ koso-dəwje’g lai-lai ya.
3 Maji kar dee d’ila riɓar dɔ rii gə́ boo’g
Gə́ to ɓəl kədm-kədm’g,
Yeḛ lé to Njerɔkunda.
4 Maji kar dee d’ila riɓar dɔ siŋgamoŋ’g
Le mbai gə́ njekunda meekarabasur dan kəmee’g lé ya,
Néra gə́ danasur lé
I nja aree to njaŋg ləm,
Meekarabasur gə néra gə́ gə dɔ najee lé kara
I nja ra mbuna njé’g lə Jakob lé ləm tɔ.
5 Ulaje rɔnduba dɔ Njesigənea̰, Ala’g lə sí lé
Undaje barmba dəbje kəm sí naŋg no̰ nétura-gɔl-kɔm’g ləa lé.
Yeḛ lé to Njerɔkunda.
6 Moyis gə Aaro̰ mbuna njékinjanéməsje’g ləa ləm,
Samel kara mbuna deḛ gə́ no̰ ɓar ria’g lé ləm tɔ
Deḛ neelé no̰ ɓar ri Njesigənea̰ ndá
Yeḛ ar dee né gə́ deḛ dəjee lé ya.
7 Yeḛ pata dan mum gə́ mbo̰ dɔ na̰ sururu’g ar dee ləm,
Deḛ d’orè kəm dee ndəŋ dɔ godndiaje’g
Gə dɔ torndia gə́ yeḛ ar dee lé ləm tɔ .
8 Njesigənea̰, Ala lə sí, i ar dee né gə́ deḛ dəjii,
I to Ala lə deḛ gə́ njekar məəi oso lemsé dɔ dee’g tɔ,
Nɛ i ar bo̰ néra majel lə dee lé ɔs ta dee’g bɔsɔrɔ tɔ.
9 Ulaje rɔnduba dɔ Njesigənea̰’d
Gə́ to Ala lə sí lé
Undaje barmba dəbje kəm sí naŋg dɔ mbal’g ləa
Gə́ to gə kəmee doi,
Mbata Njesigənea̰, Ala lə sí lé to Njerɔkunda.
© Ngambai Bible © Alliance Biblique du Tchad 1989, 2015.
