Ndərta gə́ wɔji dɔ Jerusalem
1 Meeko̰ a koso dɔ Ariel’g, dɔ Ariel’g,
Ɓee-boo gə́ Dabid ra loo-siée keneŋ!
Maji kar ləbee ɔs dɔ maree’g maree’g ləm,
Maji kar ndɔ naḭje ləa d’aw lée’g béréré-béréré ləm tɔ.
2 M’a kaḭ dɔ Ariel sub gə rɔ
Ndá no̰ ndòo gə tuma̰ ŋgururu-ŋgururu d’a taa loo keneŋ,
Bèe ɓa ɓee-boo lé a to kasəna gə́ Ariel mbam-ma ya.
3 M’a kaḭ dɔi sub gə looje lai ləm,
M’a kar kudu njérɔje d’aḭ dɔi sub gə rɔ ləma,
M’a kuba dɔndalje rɔ ne səi ləm tɔ.
4 D’a tel səi gə́ naŋg ndá
Ndui a ɓar gel naŋg’d bər,
Babur a kɔg loo koo ndui,
Ndui a kḭ naŋg ɓar
Asəna gə ndu ndil bèe
Dan babur’g lé ɓa i a jém ta ləi keneŋ.
5 Njéba̰je ləi gə́ bula digi-digi lé
D’a to kasəna gə nduji naŋg ləm,
Njérɔje nee gə́ bula digi-digi lé kara
D’a to tana gə tisa kó gə́ lel ula ne bèe ləm tɔ.
Ndá léegəneeya! asəna gə né gə́ teḛ wai bèe,
6 Ndá Njesigənea̰ gə́ njeboo-néje a ree rɔi’g
Gə ndije gə́ ndaŋg ləm,
Gə́ naŋg gə́ yə ɓugu-ɓugu ləm,
Gə kaa né gə́ ɓar gə́ to ɓəl kədm-kədm ləm,
Gə ko̰ ndi gə lel-boo ləma,
Gə ndo̰ pər gə́ roo loo dula-dula ləm tɔ.
7 Ginkoji dəwje gə raŋg gə́ bula digi-digi lé
D’a teḛ kaw rɔ gə Ariel ləm,
Deḛ lai d’a rɔ səa-yeḛ gə kəi-kaar-kɔgərɔ ləa ləma,
D’a kaḭ dəa sub kwá kègègè ləm tɔ
Asəna gə néni gə némḭdi gə́ teḛ loondul’g bèe.
8 Asəna gə dəw gə́ ɓó tɔlee ndá ni pana:
Neḛ n’usɔ né,
Tɔɓəi loo gə́ ḭ dɔ ɓi’g ndá
Mée to wəl ləm,
Asəna gə dəw gə́ kṵdaman tɔlee ndá ni pana:
N’ai mán
Nɛ loo gə́ ndel dɔ ɓi’g ndá
Kṵdaman tɔlee gə́ kédé-kédé ar siŋgá godo ləm tɔ,
A to togə́bè ya to gə ginkoji dəwje gə raŋg gə́ bula digi-digi
Gə́ d’a ree gə mba rɔ
Gə́ njé gə́ d’isi dɔ mbal gə́ sio̰ lé.
Kəm dee tɔ
9 Sije jim arje kaar sí wa sí paḭ ləm,
Nibije kəm sí to gə́ seḭ toje njékəmtɔje
Gə́ d’oo loo el ləm tɔ!
Deḛ lé kido tɔl dee
Nɛ to mán-nduú ɓa ra dee el ləm,
Deḛ ləŋg
Nɛ to kido gə́ mḭ ɓa oso kəm dee’g el ləm tɔ.
10 Mbata Njesigənea̰ ɔm ndil gə́ tɔl sí gə ɓi pərəg dɔ sí’g
Yeḛ libi kəm sí.
(Rɔta kəm sí neelé wɔji dɔ njéteggintaje.)
Yeḛ kə́ dɔ sí gə né .
(Rɔta dɔ sí neelé wɔji dɔ njénékooje.)
11 Kəm sí-seḭ lé, ta némḭdije lai neelé to asəna gə ta gə́ to mee maktub gə́ d’ɔs nétorji dɔ’g bèe ɓa d’ar dəw gə́ gər tura maktub pana: Tura maktub neelé! Ndá yeḛ pana: Neḛ n’as el mbata d’ɔs nétorji dɔ’g. 12 Esé to asəna gə maktub gə́ d’ar dəw kára gə́ gər tura el pana: Tura maktub neelé! Ndá yeḛ tel ila dee keneŋ pana: Neḛ n’gər tura el.
13 Mbaidɔmbaije pana:
Loo gə́ koso-dəwje nee ŋgəs pər gə́ rɔm’g ndá
Taje gə́ ta dee’g ɓa d’ila ne riɓar dɔm’g
Nɛ meḛ dee nai səm əw ləm,
Ɓəl gə́ deḛ ɓəlm lé
To gə goo torndu gə́ wɔji dɔ néjiɓee lə dəwje ba ləm tɔ .
14 Gelee gə́ nee ɓa m’a tel ra nédumkooje
Gə némɔrije kəm koso-dəwje’g neelé,
Ndá kəmkàr lə njékəmkàrje a tuji ləm,
Négər lə njégoso négərje lə dee kara a sané pá ləm tɔ .
15 Meeko̰ a koso dɔ deḛ
Gə́ d’iya néje gə́ d’wɔji-kwɔji ra lé
Mba kar Njesigənea̰ oo el,
Néra deeje lé deḛ ra loondul’g
Ndá deḛ pana:
See na̰ ɓa oo neḛje wa.
See na̰ ɓa gər neḛje wa.
16 See dɔkədərə lə sí to gə́ ban ɓa bèe wa!
See d’a koo njekubajo asəna gə a̰ji wa
Mba kar né gə́ yeḛ ra lé pana:
Yeḛ ɓa ra neḛ el wa.
Esé mba kar jo ula njekubá pana:
I lé gosonégər ləi godo see a pa bèe ya wa .
Ndɔ kuga dɔ Israɛlje
17 Lam gə́ kédé ɓəi ndá
Ɓee gə́ Liba̰ a tel to dɔ naŋg gə́ maji kó,
Tɔɓəi d’a koo dɔ naŋg gə́ maji kó lé
Asəna gə mee kag-kɔr bèe.
18 Mee ndəa’g neelé njémbikuduje d’a koo ta
Gə́ to mee maktub’g gə mbi dee ləm,
Njékəmtɔje gə́ d’oo loo el lé
D’a kunda ne loo mee loo gə́ ndul njudu-njudu’g teḛ ləm tɔ.
19 Njénékəmndooje d’a kal rɔ dee gə́ kédé-kédé gə mbata lə Njesigənea̰ ləm,
Njéndooje d’a kar Njerɔkunda lə Israɛlje to gin boo-rɔkal lə dee ləm tɔ.
20 Mbata njéra né kərm-kərmje gə njékula sul dɔ loo’gje lé
D’a godo ləm,
Deḛ gə́ d’isi kəmba dɔ néra gə́ majel’g lé kara
D’a kar dee d’udu guduru ləm tɔ.
21 To deḛ gə́ d’ila ta dɔ njé gə́ raŋg’d loo-gaŋg-rəwta’g ləm,
D’iya gum no̰ yeḛ gə́ njetaa dəa tarəwkɔg’d ləma,
Dəw gə́ ta wa dəa el lé deḛ gaŋgta gə́ ŋgɔm dəa’g ləm tɔ.
22 Gelee gə́ nee ɓa Njesigənea̰, yeḛ gə́ njekaji Abrakam lé
Pa ta ar gel-bɔje lə Jakob pana:
Ɓasinè lé rɔkul a kwa kəm Jakobje el ŋga ləm,
Ɓasinè sɔḭ a kwa kəm dee el ŋga ləm tɔ.
23 Mbata loo gə́ ŋganeeje d’a koo kulaje
Gə́ jim ɓa ra mbuna dee’g lé ndá
D’a kunda rim gə kəmee,
D’a kunda Njerɔkunda lə Jakob gə kəmee ləm,
D’a ɓəl ne Ala lə Israɛlje ləm tɔ.
24 Deḛ gə́ takə̰ji lə dee gə́ àr godo lé
D’a tel to njégosonégərje ləm,
Deḛ gə́ njejémta gə ŋgan gwɔs deeje lé kara
D’a kya̰ rɔ dee kar dee ndoo dee né ləm tɔ.
© Ngambai Bible © Alliance Biblique du Tchad 1989, 2015.
