Ndərta gə́ gaŋg dɔ mbai gə́ Tir’g
1 Njesigənea̰ ulam ta gə rɔtaje nee pana: 2 I ŋgon-dəw lé, ula mbai gə́ njeko̰ dəb ɓeeko̰ gə́ Tir pana: Mbaidɔmbaije gə́ Njesigənea̰ pana: I beelé məəi’g pana: I to Ala. I si dɔ kalimbai’g lə Ala ŋgaw dan baa-boo-kadje’g! Nɛ i lé to dəw ɓó to Ala el. I un né gə́ məəi ndigi aree taa tor né gə́ mee Ala ndigi. 3 Aa oo, i lé oo to gə́ kəmi àr yaa̰ unda Daniel ar né gə́ to loo-kiya’g kára kara iya rəa kəmi’g el. 4 Gə goo kəmkàr gə gosonégər ləi lé ɓa i iŋga ne nébaoje ləm, i mbo̰ ne larlɔr gə larnda mee kəi-nébaoje’g ləi ləm tɔ, 5 Gə goo boo-kəmkàr ləi gə tel kəm lar ləi ɓa i ar nébaoje ləi d’ḭ ne dɔ maree’d gə́ kédé-kédé tɔɓəi nébaoje ləi lé d’ari beelé məəi’g.
6 Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: To gə́ i un né gə́ məəi ndigi aree taa tor né gə́ mee Ala ndigi ndá, 7 aa oo, n’a kɔm dəw-dɔ-ɓeeje gə́ to ɓəl kədm-kədm unda dəwje gə́ raŋg dɔi’g, deḛ d’a tɔr kiambas lə dee tuji ne maji kəmkàr ləi ləm, d’a tibi yiro dɔ maji péd-péd’g ləi ləm tɔ. 8 D’a kɔsi kalaŋ kilai mee bwa’g ndá i a kwəi to gə́ deḛ gə́ tɔs dee pib-pib tɔl dee d’ɔm dee dan baa-boo-kadje’g bèe. 9 No̰ njetɔli’g lé see i a pana: I to Ala nja tɔɓəi wa. I a to dəw ɓó a to Ala meḛ ji yeḛ gə́ a tɔli’g lé el. 10 I a kwəi yoo-kwəi lə njépole-magəje ji dəw-dɔ-ɓeeje’g mbata neḛ ɓa m’pata, Mbaidɔmbaije gə́ Njesigənea̰ ɓa pa bèe.
11 Njesigənea̰ ulam ta gə rɔtaje nee pana: 12 I ŋgon-dəw lé, un pa no̰ ndòo mbai gə́ Tir! A kulá pana: Mbaidɔmbaije gə́ Njesigənea̰ pa togə́bè pana: I ya gə́ nékwɔji maji kɔr njoroŋ lə né ləm, kəmkàr taa rɔi pəl-pəl ləma, i maji péd-péd ləm tɔ. 13 Kédé i to asəna gə loo-ndɔ lə Ala mee loo gə́ Edḛ, jərje gə́ gad dee ur kugu gə́ ri dee lə sarduanə, gə topajə, gə diama̰, gə krijolitə, gə onikis, gə jaspə, gə sapir, gə eskarbuklə, gə emerodə, gə larlɔr taa rɔi pəl-pəl, dalèje gə buulaje to gə́ néra kulaje ləi gə́ deḛ gɔl dee d’unda dee pèrèrè d’wɔji ne ndɔ tum gini’g. 14 Kédé i to Nékunda gə́ dara gə́ njekaḭ bada gə́ naji bagi, neḛ n’undai ndá n’ari to dɔ mbal’g lə Ala gə́ to gə kəmee, i njaa mbuna kɔr mbalje gə́ taa pər gəgəgə’g. 15 I to njera né gə́ danasur rəw-kabije’g un kudee mee ndəa’d gə́ d’undai saar teḛ ne ndɔ gə́ d’iŋga ne néra gə́ kori-kori rɔi’g lé. 16 Gə goo boo tel kəm lar ləi lé néra gə́ kərm-kərm taa ne məəi pəl-pəl ari ra ne kaiya, i Nékunda gə́ dara gə́ njekaḭ bada lé neḛ n’ɔsi dɔ mbal’g lə Ala piriŋ n’ilai n’ari sané pá mbuna kɔr mbalje gə́ taa pər gəgəgə’g lé. 17 I beelé məəi’g mbata maji péd-péd ləi ləm, ndubarɔ ləi lé ari tuji ne kəmkàr ləi ləm tɔ, neḛ n’ɔsi n’ilai naŋg n’ari tel to né mbo̰ kəm dɔ’g lə mbaije ya. 18 Gə goo néra kori-korije ləi gə́ bula digi-digi ləm, gə tel kəm lar ləi gə́ gə goo rəbee el ləm tɔ lé i ila ne ndɔl dɔ looje ləi gə́ to gə kəmee’g, bèe ɓa neḛ n’ar pər ḭ ne məəi’g rooi ne dula-dula ləm, neḛ n’ari tel ne bu dɔ naŋg’d ləm tɔ kəm dəwje lai gə́ mbo̰ na̰ dɔi’g sɔmɔmo̰ lé. 19 Dəwje lai gə́ gəri mbuna koso-dəwje’g lé d’wa dɔ dee jiim mbata ləi ləm, i tel to néɓəl ləma, gə né gə́ tuji gə no̰ ləm tɔ.
Ndərta gə́ gaŋg dɔ ɓee gə́ Sido̰’g
20 Njesigənea̰ ulam ta gə rɔtaje nee pana : 21 I ŋgon-dəw lé, tel kəmi par gə́ ɓee gə́ Sido̰ tegginta wɔji ne dəa! 22 A pana: Mbaidɔmbaije gə́ Njesigənea̰ pa togə́bè pana: I ɓee gə́ Sido̰ lé aa oo, neḛ n’aw səi gə ta! D’a kula rɔnduba dɔ neḛ’g mee ɓee’g ləi ndá d’a gər to gə́ neḛ n’to Njesigənea̰ loo gə́ n’a gaŋg rəw-taje lə neḛ dɔi’g ləm, loo gə́ n’a riba dɔ meenda lə neḛ mee ɓee’g neelé ləm tɔ. 23 N’a kula gə yoo-koso mee ɓee’g ləm, n’a kar məs ula naŋg mba̰-rəwje’g ləa ləm tɔ, d’a kḭ gə looje ɓəd-ɓəd ree gə kiambas tɔl dee ne kɔm dee naŋg rib-rib mee ɓee’g, bèe ɓa d’a gər to gə́ neḛ n’to Njesigənea̰ ya.
Israɛlje d’a si dan meekulɔm’g
24 Bèe ɓa yeḛ a to kun gə́ njekɔs gɔl loo el ləm, a to ŋgar mba tuga ne gel-bɔje lə Israɛl gogo el ŋga ləm tɔ mbuna deḛ lai gə́ gugu dəa sub gə́ d’ə̰jee bəḭ-bəḭ lé. Ndá d’a gər to gə́ neḛ n’to Mbaidɔmbaije gə́ Njesigənea̰ ya.
25 Mbaidɔmbaije gə́ Njesigənea̰ pa togə́bè pana: Loo gə́ n’a kḭ gə gel-bɔje lə Israɛl mbuna koso-dəwje gə́ neḛ n’sané dee keneŋ lé mbo̰ dee dɔ na̰’d ndá n’a riba dɔ meenda lə neḛ kar ginkoji dəwje gə raŋg d’oo, tɔɓəi d’a si mee ɓee’g lə dee gə́ neḛ n’ar kura lə neḛ Jakob lé. 26 D’a si keneŋ gə meekulɔm ləm, d’a ra kəije ləma, d’a ndɔ nduúje ləm tɔ, d’a si keneŋ gə meelɔm loo gə́ n’a gaŋg rəw-taje lə neḛ dɔ dəwje lai gə́ gugu dɔ deḛ gə́ d’ə̰ji dee bəḭ-bəḭ lé. Ndá d’a gər to gə́ neḛ n’to Njesigənea̰, Ala lə dee ya.
© Ngambai Bible © Alliance Biblique du Tchad 1989, 2015.
