Deḛ d’ɔm meḛ dee na̰’d mba kar Jeju udu
Mat 26.1-5, Mar 14.1-2, Ja̰ 11.45-531 Ndɔ ra naḭ Pag gə́ muru gə́ nétiee godo keneŋ lé nai dəb. 2 Mbai dɔ njékinjanéməsje-je gə njéndaji-maktubje saŋg goso né gə mba tɔl ne Jeju, mbata deḛ ɓəl kəm dəwje.
Judas un dɔ Jeju
Mat 26.14-16, Mar 14.10-113 Yen ŋga Njekurai andə mee Judas Iskariot gə njekɔm dee gə́ dɔg-gir-dee-joo lé. 4 Judas ɔd aw iŋga mbai dɔ njékinjanéməsje-je, gə mbai dɔ njéŋgəmlooje-je mba kwɔji sə dee rəw kula Jeju ji dee’g. 5 Rɔ dee lel dee yaa̰ ndá deḛ d’wɔji səa lar gə́ d’a gə karee lé tɔ. 6 Loo gə́ Judas ndigi sə dee rəgm ndá yeḛ saŋg loo gə́ kəm kula ne Jeju ji dee, iya ne koso-dəwje lal kar dee d’oo.
Jeju ar dee d’wa dɔ gɔl néra naḭ Pag
Mat 26.17-25, Mar 14.12-21, Ja̰ 13.21-307 Ndɔ gə́ wɔji dɔ muru gə́ nétiee godo keneŋ gə́ to ndɔ gə́ kəm tɔl ne badə ra naḭ Pag lé teḛ mba̰. 8 Jeju ula Piɛrə gə Ja̰ pana: Maji kar sí awje aw waje dɔ gɔl néra naḭ Pag lə sí mba kar sí j’usɔje.
9 Deḛ tel dəjee pana: See loo gə́ ra ɓa i ndigi kar sí j’wa dɔ gɔl néra naḭ Pag lé keneŋ wa.
10 Yeḛ ila dee keneŋ pana: Ɔd awje ndá loo gə́ seḭ a ka̰dje mee ɓee-boo’g ndá seḭ a kiŋgaje diŋgam kára gə́ odo kulum mán. Awje gée’g mee kəi gə́ yeḛ a kandə keneŋ 11 ndá seḭ a kulaje njekəi lé pajena: Mbai ulai pana: See loo gə́ ra ɓa neḛ gə njekwakila neḛje n’a sɔje né Pag lé keneŋ wa. 12 Yeḛ a tɔji sí kəi gə́ boi gə́ dɔ maree’g tar gə́ néje lai to keneŋ jəb-jəb mba̰. Lée neelé ɓa seḭ a kwaje dɔ gɔl néra Pag lé keneŋ ya.
13 Deḛ d’ɔd d’aw ndá d’iŋga néje to gə́ yeḛ ula dee lé ya tɔ ndá d’wa dɔ gɔl néra Pag lé keneŋ.
D’isi ta ka-nésɔ’g lə Mbaidɔmbaije lé
Mat 26.26-30, Mar 14.22-26, 1Kɔr 11.23-2514 Kàree teḛ mba̰ ndá yeḛ si ta ka-nésɔ’g ar njékaḭkulaje d’isi səa keneŋ na̰’d. 15 Yeḛ ula dee pana: Ma m’ndiŋga rɔm gə mba sɔ sə sí né Pag neelé kédé ɓad ɓa gə mba kar némeeko̰ ram ɓəi. 16 Mbata ma m’ula sí təsərə, m’a sɔ né sə sí gogo el ŋga saar d’a tɔl taree mee ɓeeko̰’g lə Ala bém.
17 Tɔɓəi yeḛ un ŋgo-kai-né gə́ mán-nduú to keneŋ ra ne Ala oiyo ɓa ula ar dee pana: Taaje tɔsje ta na̰’g, 18 mbata ma m’ula sí təsərə, m’a kai mán-nduú gə́ togə́bè gogo el nja saar mba kar ɓeeko̰ lə Ala ree ne.
19 Tɔɓəi Jeju un pil muru kára bèe ra oiyo dɔ’g ɓa wa gaji dana ar dee ula dee pana: Yee gə́ neelé to gə́ darɔm gə́ m’ya̰ m’ar sí, raje togə́bè mba kar meḛ sí olé ne dɔm’g.
20 Loo gə́ deḛ d’o̰ muru mba̰ ndá yeḛ un ŋgo-kai-né gə́ mán-nduú to keneŋ togə́bè tɔ, ula ar dee pana: Ŋgo-kai-né neelé to gə́ némanrɔ gə́ sigi gə́ ma man ne rɔm gə məsm m’aree ula dɔ naŋg nee mbata lə síTa neelé godo mee maktubje gə́ ləw gə́ na̰je’g.. 21 Nɛ aa ooje, dəw gə́ njekun dɔm lé yeḛ ula jia səm na̰’d mee ka-nésɔ’g nee ya. 22 Ŋgon-dəw a kɔd kuru kaw gə goo taree gə́ deḛ pa kédé lé ya. Nɛ meeko̰ a nai dɔ dəw gə́ njekun dəa’g lé.
23 Yen ŋga deḛ d’un kudu dəji na̰-na̰, see na̰ ɓa mbuna neḛje’g ɓa a ra né togə́bè ya.
See na̰ ɓa ur dɔ dee’g wa
24 Tamaḭ oso bib mbuna njékaḭkulaje’g ar dee pana: See na̰ ɓa a to dəw gə́ njekur dɔ mareeje’g mbuna neḛje’g wa . 25 Jeju ula dee pana: Mbaije gə́ njégelɓeeje lə ginkoji dəwje gə raŋg lé d’o̰ dəwje lə dee ləm, deḛ gə́ to dəw dɔ mar deeje lé ɓar dee njéramajije ləm tɔ . 26 Nɛ seḭ lé maji kar sí raje togə́bè mbuna na̰’g el. Nana ɓa gə́ ur dɔ sí’g ndá maji karee oso kas ləm, yeḛ gə́ to gə́ dəw dɔ sí lé maji karee wa rəa gə́ dəw gə́ njera né kar mareeje ɓa . 27 Mbata see na̰ ɓa ur dɔ mareeje wa. See yeḛ gə́ sí ta nésɔ’g lé el wa. Nɛ ma lé m’isi mbuna sí’g asəna gə njéra kar sí ɓa . 28 Seḭ lé seḭ aije meḛ sí sam-sam səm dan néje gə́ naam’g, 29 gelee gə́ nee ɓa ma m’wa ne ɓeeko̰ lé m’unda m’ar sí, to gə́ Bɔm wa unda am-ma lé bèe tɔ, 30 mba kar sí sije ta nésɔ’g sɔje gə ta nékai’g aije mee ɓeeko̰’g ləm ləm, gə mba kar sí sije dɔ kalimbaije’g gə mba gaŋgje rəwta lə ginka Israɛlje gə́ dɔg-gir-dee-joo lé ləm tɔ .
Jeju pata maḭ gə́ Piɛrə a gə maḭ gə rəa dɔ gəree’g lé
Mat 26.31-35, Mar 14.27-31, Ja̰ 13.36-3831 Mbaidɔmbaije pana: Simo̰, Simo̰, Njekurai dəji loo gə mba ɗigi sí to gə́ ɗigi ne kó bèe. 32 Nɛ ma lé ma m’ra tamaji mbata ləi mba kar kúla meekun ləi gaŋg el. Bèe ndá loo gə́ i a kun kəmi rəw dɔ rəm’g ləi ndá maji kari ula diŋgam meḛ ŋgakɔḭje’g ya.
33 Piɛrə ilá keneŋ pana: Mbaidɔmbaije, m’isi pèrèrè gə mba kaw səi daŋgai’g na̰’d ləm, lé’d kwəi kara m’a kwəi səi na̰’d ya ləm tɔ.
34 Jeju tel ilá keneŋ pana: Piɛrə, ma m’ulai təsərə, ɓogənè lé kona a no̰ el nja ɓəi ndá i a maḭ dɔ rɔi dɔ loo gərm’g ləi el as gɔl munda.
Ɓɔl-lar gə ɓɔl-kawmbá gə kiambas lé
35 Yeḛ ula dee tɔɓəi pana: Loo gə́ ma m’ula sí m’ar sí awje lal ɓɔl-lar gə ɓɔl-kawmbá gə markob gə́ gɔl sí’g lé see seḭ lalje né keneŋ wa.
Deḛ d’ilá keneŋ pana: Jeḛ n’lal né kára kara el .
36 Yeḛ tel ula dee pana: Nɛ ɓasinè lé yeḛ gə́ ɓɔl-lar ləa to keneŋ gən ndá maji karee un jia’g ləm, yeḛ gə́ ɓɔl-kawmbá ləa to keneŋ gən ndá maji karee un jia’g ləma, yeḛ gə́ kiambas ləa godo lé ndá maji karee un kubu ləa gə́ boi yul ndogo ya̰ laree ndogo ne kiambas ləm tɔ. 37 Mbata ma m’ula sí təsərə, lé riri kara ta gə́ deḛ ndaŋg mee maktub’g pana: Yeḛ neelé deḛ turá na̰’d gə njéramajelje lé d’a tɔl taree dɔm’g bém ya. Tɔgərɔ ya né gə́ wɔji dɔm lé nai tebdé bèe ba gə mba karee teḛ ŋga .
38 Deḛ d’ulá pana: Mbaidɔmbaije, aa oo kiambasje joo to nee.
Yeḛ tel ula dee pana: Yee ɓa as ya.
Jeju ra tamaji loo gə́ Gesemane
Mat 26.36-46, Mar 14.32-4239 Loo gə́ yeḛ teḛ raga mba̰ ndá yeḛ ɔd aw dɔ mbal gə́ ria lə Koiyoje gə goo néra gə́ yeḛ ra ləw-ləw lé ndá njékwakiláje d’un rəw d’aw gée’g tɔ. 40 Loo gə́ yeḛ teḛ lée’g neelé ndá yeḛ ula dee pana: Maji kar sí raje tamaji mba kar sí osoje ne dan nékər’g el.
41 Tɔɓəi yeḛ sa rəa rɔ dee’g ɔd aw gə kuree rəgəsə asəna gə kɔri-ər gə́ kun kila piriri bèe ndá yeḛ rəm ɔs no̰ kəjee naŋg ra tamaji pana: 42 Bɔm, ɓó lé to gə́ məəi ndigi ndá ɔs ŋgo-kai-né lé rɔm’g rəw gə́ raŋg! Nɛ ra né gə́ məəi-i nja ɓa wɔji ɓó to gə́ məəm-ma ɓa wɔji el.Jeju ra tamaji loo-ndɔ’d gə́ Jetsemanee (22.41-42)
43 Yen ŋga kura gə́ dara teḛ dəa’g təsərə gə mba gədee ne. 44 Loo gə́ yeḛ to ndur rəa ndá yeḛ to ta Ala’g pəgə-pəgə, ar mán təd gə́ rəa’g teḛ kas asəna gə məs gə́ ndəi ɗəŋ-ɗeŋ bèe.
45 Loo gə́ yeḛ ra tamaji lé mba̰ ndá yeḛ uba naŋg ḭta tel aw rɔ njékwakiláje’g ndá iŋga dee dɔ ɓi’g mbata kəmndoo tɔl dee gə ɓi pərəg. 46 Yeḛ dəji dee pana: See ban ɓa seḭ tojeɓi wa. Ubaje naŋg ḭje tar raje tamaji mba kar sí osoje ne dan nékər’g el.
Kwa gə́ d’wa Jeju lé
Mat 26.47-56, Mar 14.43-50, Ja̰ 18.3-1147 Loo gə́ yeḛ si ula dee ta bèe-bèe ɓəi ndá boo-dəwje teḛ tɔ pɔs-pɔs, ndá yeḛ gə́ ria lə Judas gə́ njekɔm dee gə́ dɔg-gir-dee-joo lé njaa no̰ dee’g. Yeḛ ree pər gə́ rɔ Jeju’g gə mba kil ɓɔlee. 48 Jeju ulá pana: Judas, see ɓɔl-kil lé ɓa i a kula ne Ŋgon-dəw ji dee’g ŋga wa.
49 Deḛ gə́ d’aar gə Jeju lé d’oo né gə́ si ree togə́bè lé ndá d’ulá pana: Mbaidɔmbaije, see j’a gaŋg dee gə kiambas wa.
50 Dəw kára mbuna dee’g tuga mbi gə́ dɔkɔl lə kura lə ŋgɔ-njekinjanéməs lé lɔd ɔr. 51 Nɛ Jeju un ta ula dee pana: Ǝwje rɔ sí aarje naŋg!
Ndá yeḛ ɔrɔ mbi dəw neelé aree tel to kari. 52 Tɔɓəi Jeju un ta ula mbai dɔ njékinjanéməsje-je gə mbai dɔ njéŋgəm kəi-Alaje gə ŋgatɔgje gə́ ree gə mba kwá lé pana: Seḭ teḛje gə kiambasje gə ɗuguru-kagje ji sí’g kel-kel gə mba kwamje ne asəna gə gayim-ɓogo bèe. 53 Gə ndɔm-ndɔm m’isi sə sí mee kəi-Ala’g nɛ seḭ wamje gə ji sí keneŋ peb el. Nɛ ɓasinè lé to kàree ka̰ sí gə siŋgamoŋ lə loondul ɓa .
Tamaḭ lə Piɛrə lé
Mat 26.57-58Mat 69-75, Mar 14.53-54Mar 66-72, Ja̰ 18.25-2754 Loo gə́ deḛ d’wa Jeju mba̰ ndá deḛ ndɔree d’aw səa kəi lə ŋgɔ-njekinjanéməs. Piɛrə ŋgəḭ goo dee’g gə goo ŋgalee. 55 Deḛ yel pər dan loo’g lə mbai ndá d’isi keneŋ d’isi ndibi. Piɛrə si sə dee keneŋ na̰’d tɔ. 56 Kura gə́ dené aa loo ée ta pər’d lé ndá orè kəmee dəa’g sḭ pana: Dəw neelé to gə́ njekaw səa na̰’d ya tɔ.
57 Nɛ yeḛ maḭtaree pana: Dené, ma m’gəree el.
58 Waga ndá dəw lə dee gə́ raŋg kára bèe aa loo ée pana: I lé i to ka̰ dəwje neelé ya tɔ.
Nɛ Piɛrə tel ilá keneŋ pana: Diŋgam, ma m’to gə́ ka̰ dee el.
59 D’aar gə kur dee waga ndá yeḛ gə́ raŋg kára bèe pata wa ne kɔgərɔ-kɔgərɔ togə́bè pana: Tɔgərɔ ya, dəw neelé to njeboalookaw ləa ya mbata yeḛ to gə́ dəw gə́ Galile.
60 Piɛrə tel ilá keneŋ pana: Diŋgam, tapai lé ma m’gər kila el nja saar.
61 Léegəneeya loo gə́ ta nai gə́ təa’g ɓəi ndá kona no̰ wəl. Mbaidɔmbaije tel kəmee wagəsa ila dɔ Piɛrə’g. Yen ŋga mee Piɛrə aḭ haar teḛ dɔ ta gə́ Mbaidɔmbaije pa ne səa kédé pana: Ɓogənè lé kona a no̰ el nja ɓəi i a maḭ dɔ rɔi dɔm’g gɔl munda. 62 Togə́bè yeḛ unda loo teḛ raga no̰ ɓugudu-ɓugudu.
Deḛ kunda Jeju loo-gaŋg-rəwta’g d’ula ne sul dəa’g
Mat 26.67-68, Mar 14.6563 Deḛ gə́ ŋgəm Jeju lé kogee d’ula sul dəa’g ləm, deḛ kundá ləm tɔ. 64 Deḛ tɔ kəmee gə kubu ɓa dəjee pana: Gər dəw gə́ njekundai lé ar sí j’oo səi.
65 Deḛ pa səa taje gə́ hərm ɓəd-ɓəd bula tɔ. 66 Loo gə́ loo inja mba̰ ndá ŋgatɔgje lə dəwje ləm, gə mbai dɔ njékinjanéməsje-je ləma, gə njéndaji-maktubje ləm tɔ lé deḛ mbo̰ dɔ na̰ loo kára tɔɓəi d’ar dee ree gə Jeju no̰ njégaŋ-rəwtaje’g lə Jibje. 67 Deḛ pana: Ɓó lé i to gə́ Kristi nja ndá ula sí təsərə.
Jeju tel ila dee keneŋ pana: Ɓó lé m’ula sí kara seḭ a taaje ta ləm el, 68 tɔɓəi ɓó lé ma m’dəji sí ta dɔ’g kara seḭ a kilamje keneŋ el ləm tɔ. 69 Un gelee ɓogənè lé Ŋgon-dəw a si dɔ jikɔl siŋgamoŋ’g lə Ala ya!
70 Deḛ lai dəjee pana: See i to Ŋgon-Ala ya wa.
Yeḛ tel ila dee keneŋ pana: Yeḛ nja pa ta sí gən mba̰, ma m’to yeḛ lé nja.
71 Yen ŋga dee pana: See ɗi tɔɓəi ɓa j’a dəji ne njékɔrgootaje gə́ raŋg-raŋg gə mbəa ɓəi wa. Jeḛ nja j’oo ta lé təa’g gə mbi sí mba̰.
© Ngambai Bible © Alliance Biblique du Tchad 1989, 2015.
