Rəwje gə́ wɔji dɔ kag pərndɔ gə́ to mee kəi-kubu-kiŋga-na̰’g
1 Njesigənea̰ ula Moyis pana:
2 Maji kari un ndui ar Israɛlje mba kar dee ree gə ubu koiyo gə́ kas gə́ àr yərərə mbata lə kag pərndɔ lé gə mba kar pərndɔje neelé ndogó ne ta-ta. 3 Aaro̰ a kunda kag pərndɔje lé gir kubu gaŋg mee kəi gə́ to no̰ sa̰duk-kɔrgoota mee kəi-kubu-kiŋga-na̰’g lé, ndá yeḛ a kɔm ubee keneŋ mba kar pəree ndogó ne ta-ta, un kudee loondul’g saar kar loo àr ne no̰ Njesigənea̰’g. Yee ɓa to godndu gə́ to gə no̰ mbata lə ŋgaka síje ya. 4 Yeḛ a kunda pərndɔje dɔ kag pərndɔ’d gə́ ra gə larlɔr gə́ àr ŋgad-ŋgad mba kar dee ndogó ne ta-ta no̰ Njesigənea̰’g.
Muru gə́ d’unda gə kəmee d’ar Ala
5 I a kun nduji gə́ ndá léréré ndá a kila gə́ mbə dɔg-giree-joo, nduji nékwɔji kwɔi-lə-né misa̰ as mbə kára kára tɔ . 6 I a ndur dee dɔ na̰’d misa̰-misa̰ loo joo dɔ tabul gə́ ra gə larlɔr gə́ àr ŋgad-ŋgad no̰ Njesigənea̰’g. 7 I a kɔm bodé kag gə́ ə̰də sululu dɔ loo ndureje’g ndá gée gə́ gogo d’a roo bodé kag neelé tor mbəje’g ləm tɔ.
8 Ndɔ-kwa-rɔje lai lé, d’a ndur mbəje neelé dɔ na̰’d no̰ Njesigənea̰’g ta-ta: yee ɓa to né manrɔ gə́ to gə no̰ gə́ Israɛlje d’a kaa dəa ya. 9 Mbəje neelé a to ka̰ Aaro̰ gə ka̰ ŋganeeje ndá d’a sɔ mee loo gə́ to gə kəmee’g, mbata a to né gə́ to gə kəmee doi mbata lə dee, a to ges nékar gə́ ka̰ roo no̰ Njesigənea̰’g. Yee ɓa to godndu gə́ to gə no̰ ya .
Bo̰ néra njéndɔl-Alaje lé a kɔs ta dee’g
10 Dəw kára gə́ kea̰je to dəw gə́ Israɛl nɛ bɔbeeje to dəw gə́ Ejiptə lé ree mbuna Israɛlje’g ndá yeḛ kɔl gə dəw gə́ to Israɛl loo-si dee’g. 11 Dəw gə́ kea̰je to dəw gə́ Israɛl lé pata ndɔl ne ri Ala ula ne sul dəa’g tɔ. Deḛ d’aw səa rɔ Moyis’g. Kea̰je ria lə Selomit, ŋgolə Dibri gə́ to ginkoji’g lə Dan. 12 Deḛ d’ilá ji njéŋgəmeeje’g saar ŋgina ne ta gə́ Njesigənea̰ a pa kwɔji ne dəa.
13 Njesigənea̰ ula Moyis pana: 14 Ar njḛdɔl-Ala neelé teḛ loo-si sí’g gə́ raga, deḛ lai gə́ d’oo tapea neelé d’a kɔm ji dee dəa’g ndá koso-dəwje lai d’a tilá gə kɔri-ər tɔlee. 15 I a kula Israɛlje ta nee pana: Nana ɓa gə́ pata ndɔl ne Ala ləa ndá ta kaiya ləa a kwa dəa ya. 16 Yeḛ gə́ pata ndɔl ne ri Njesigənea̰ ndá, koso-dəwje lai d’a tilá gə kɔri-ər tɔlee. Lé to gə́ dəw-dɔ-ɓee əsé gə́ kojiɓee kara yeḛ a kwəi mbata yeḛ pata ndɔl ne ri Ala ya.
17 Yeḛ gə́ unda dəw tɔlee ndá kəm tɔlee tɔ . 18 Yeḛ gə́ unda da kul tɔlee ndá a kar njea maree toree’g gə yee gə́ kəmba.
19 Ɓó lé dəw kára ar maree doo ndá d’a ra səa to gə́ yeḛ kara ra ya to: 20 Siŋga rɔ dəw gə́ təd tor siŋga rɔ dəw gə́ təd’g ləm, kəm tor kəm’g ləm, ŋgaŋ tor ŋgaŋ’d ləm tɔ, d’a karee doo to gə́ yeḛ ar ne maree bèe ya tɔ .
21 Yeḛ gə́ a tɔl da-kul ndá a kar njea maree toree’g ya nɛ yeḛ gə́ a tɔl dəw ndá d’a tɔlee gə́ tɔl ya. 22 Godndu gə́ kára ba ya wɔji dɔ dəw-dɔ-ɓee ləm, gə dɔ kojiɓee ləm tɔ, mbata ma m’to Njesigənea̰, Ala lə sí .
23 Moyis ula Israɛlje ta nee ndá deḛ d’ar njḛdɔl-Ala neelé unda loo mee loo-si dee’g teḛ tɔɓəi deḛ tilá gə kɔri-ər tɔ. Israɛlje ra to gə́ Njesigənea̰ un ne ndia ar Moyis lé ya.
© Ngambai Bible © Alliance Biblique du Tchad 1989, 2015.
