Njesigənea̰, maji kari aa dɔ taje gə́ teḛ tam’g lé
1 Pakɔs lə Dabid
Njesigənea̰, ma m’ɓari ya,
Maji kari ɔs rɔi ɓad gə́ rɔm’g nee.
Ur mbii gèŋ mba koo ne ndum loo gə́ m’ɓari lé tɔ.
2 Maji kar tamaji ləm tɔ nɔḭ’g
Asəna gə né gə́ ə̰də sululu bèe ləm,
Maji kar jim gə́ m’odo gə́ tar rəw lé
To asəna gə nékar gə́ d’ari dɔ kàr’g bèe ya ləm tɔ.
3 Njesigənea̰, maji kari unda njeŋgəm ta tam’g ləm,
Ra kəmi rakaa dɔ tam’g ya ləm tɔ.
4 Maji kari ar məəm aḭ teḛ par gə́ dɔ néraje gə́ majel’g el ləm,
Gə m’ɔm na̰’d gə njéra majelje
Mba ra sə dee né gə́ ka̰ kila ta dɔ loo’g el ləma,
Gə mba kam m’ɔm sə dee na̰’d loo-muru-gad’g lə dee kára kara el ləm tɔ.
5 Ɓó lé dəw gə́ njera nédana undam ndá
Ma m’oo gə́ né gə́ maji gə́ yeḛ ra səm ya,
Ɓó lé yeḛ aar wɔjim kəmkàr kara
To ubu ɓa yeḛ wa ne dɔm ləm tɔ,
Ndá m’a kwa dɔm kɔr keneŋ el,
Nɛ m’a kḭ gə tamaji ləm gɔl kára ɓəi
Mba koma̰ ne gə némeeyèrje lə dee.
6 Maji kar dee tila njégaŋ-rəwtaje lə dee kaar biri mbalje’g
Bèe ɓa d’a koo ne taje ləm lé
Mbata to taje gə́ taa kəm loo rəgm ya.
7 To gə́ loo gə́ dəw ndɔ ndɔ ndá
Ta̰ naŋg ɓədədə-ɓədədə bèe lé
Togə́bè ɓa sḭgarɔ síjeḛ kara sané ne kad-kad
Ɓee lə njé gə́ d’wəi’g bèe ya tɔ.
8 Njesigənea̰, Mbaidɔmbaije,
I nja ɓa m’tel kəm par gə́ rɔi’g ya ləm,
Ma m’saŋg njo̰loo-kula-dɔm rɔi’g ya ləm tɔ,
Maji kari ubam ya̰’m el.
9 Ar gum lə deḛ gə́ d’iya gə mbata ləm lé
Wam el ləm,
Ar kum gə́ njéra némajelje d’umum lé
D’wam ne el ləm tɔ.
10 Maji kar njémeeyèrje lé
D’oso wul ba̰də’g lə dee-deḛ ya
Gə mba karm m’aḭ m’igi ne pá gə́ léegəneeya.
© Ngambai Bible © Alliance Biblique du Tchad 1989, 2015.
