Ɓee-booje misa̰ gə́ to njo̰looje lé
1 Njesigənea̰ ula Juje pana : 2 Ula Israɛlje ta nee pana: To gə́ m’ula sí ne gə ndu Moyis lé maji kar sí ɔrje kəm ɓee-booje unda deeje gə́ njo̰looje mbata lə sí 3 mba kar dəw gə́ njetɔl maree gə́ yeḛ koma̰ mée’g el ləm, gə wa dɔ gɔl rəa gə mba tɔlee kédé el ləm tɔ ndá a kaskəm kaḭ kaw keneŋ, ɓee-booje neelé d’a to njo̰looje mbata lə sí mba kɔg njedalba̰ məs lé loo kandə keneŋ tɔ. 4 Njetɔl dəw lé a kaḭ kaw par gə́ ɓee’g kára’d gə́ mbuna ɓee-booje’g neelé ləm, a kaar naŋg tarəwkɔg’d lə ɓee-boo neelé ləma, a kɔr goo ta ləa kar ŋgatɔgje gə́ mee ɓee-boo’g neelé d’oo ləm tɔ, bèe ɓa d’a kwá gə́ rɔ dee’g mee ɓee-boo’g neelé ləm, d’a karee loo-siée mba karee si sə dee’g ləm tɔ. 5 Ɓó lé njedalba̰ məs tuba gée ndá d’a kwa njetɔl dəw lé kulá jia’g el mbata yeḛ wa dɔ gɔl rəa kédé ɓa tɔl ne maree el ləm, yeḛ to njeba̰ ləa kédé el ləm tɔ. 6 Yeḛ a si mee ɓee-boo’g neelé saar a teḛ kaar no̰ koso-dəwje’g kar dee gaŋgta dəa’g ləm, a si saar kar ŋgɔ-njekinjanéməs gə́ si ra kula mee ndəaje gən lé wəi ləm tɔ ɓa. Bèe ɓa njetɔl dəw lé a tel kaw mee ɓee-boo’g ləa ləm, gə mee kəi’g ləa gə́ to dan mee ɓee-boo gə́ yeḛ ḭ keneŋ aḭ lé ləm tɔ.
7 Deḛ d’ɔr kəm ɓee gə́ Kedes gə́ wɔji dɔ Galile gə́ to kaar mbal’g lə Neptalije ləm, gə Sikem kaar mbal’g lə Eprayimje ləma, gə Kirjat-Arba gə́ to Ebro̰, kaar mbal’g lə Judaje ləm tɔ. 8 Kel tura-baa’d gə́ Jurdɛ̰ gə́ nu par gə́ bər lə Jeriko lé deḛ d’ɔr kəm Beser gə́ to dɔdilaloo’g mee ndag-loo’g mbuna ginkoji Rubḛje’g ləm, gə Ramot dɔ naŋg gə́ Galaad mbuna ginkoji Gadje’g ləma, gə Golan gə́ wɔji dɔ Basan mbuna ginkoji Manasə’g ləm tɔ. 9 Dejee nee ɓa to ɓee-booje gə́ d’ɔr kəm dee mbata lə Israɛlje lai ləm, mbata lə dəw-dɔ-ɓeeje gə́ d’isi mbuna dee’g ləm tɔ, mba kar dəw gə́ tɔl maree to gə́ mée wɔji el lé askəm kaḭ kaw kiya rəa keneŋ, bèe ɓa njedalba̰ məs lé a tɔlee el saar yeḛ a teḛ kaar no̰ koso-dəwje’g ɓa tɔ.
© Ngambai Bible © Alliance Biblique du Tchad 1989, 2015.
