Néje gə́ a ree kédé ɓa Mbaidɔmbaije a ree ɓəi lé
1 Ŋgako̰ síje, ta gə́ wɔji dɔ ndɔ tel lə Mbaidɔmbaije lə sí Jeju Kristi lé ləm, gə loo kiŋga gə́ j’a tel kiŋga səa na̰’d ləm tɔ lé jeḛ n’ra ne ndòo rɔ sí’g 2 mba kar sí arje meḛ sí pélé wəs-wəs dɔ’g el ləm, arje kaar sí ndəb dɔ ta gə́ deḛ tar gə́ tar lé el ləm, əsé dɔ tapa’g, əsé maktub gə́ deḛ pana: Ḭ rɔ síjeḛ’g ɓa j’wɔji ne dɔ ndɔ ree lə Mbaidɔmbaije gə́ kàree teḛ mba̰ lé el ləm tɔ. 3 Maji kar dəw kára kara su kəm sí gə ta gə́ rara kara el, mbata lé riri kara loo rəm gogo a teḛ kédé ləm, diŋgam gə́ njeyèr gə́ to ŋgon lə njetuji lé a kunda loo teḛ kédé ləm tɔ. 4 Diŋgam gə́ njeyèr lé yeḛ nja ɓa gə́ njeba̰ gə́ a kuba loo kḭ naji loo gə Ala ləm, gə né gə́ rara gə́ dəwje d’wa meḛ dee’g ləma, a ra saar kuru ne mee kəi-Ala’g ɓa a tar rəa pana: Neḛ nja gə́ Ala ləm tɔ .
5 Loo gə́ ma m’nai sə sí ɓəi lé ma m’tɔji sí néje neelé ya, see meḛ sí olé dɔ’g el wa. 6 Né gə́ ɔgee loo mba karee teḛ mee ndəa gə́ wɔji dəa lé ɓasinè seḭ gərje gao ya. 7 Né gə́ yèr gə́ to loo-kiya’g lé un kudu yɔm loo mba̰. Nɛ yeḛ gə́ ɔgee rəw lé a sa rəa kédé mba̰ ɓa, né gə́ yèr lé a kila rəa ɓəi. 8 Ndəa neelé, yeḛ gə́ njekɔs Ala rəw lé a nduba rəa gə́ raga, nɛ lel ta Mbaidɔmbaije gə́ a tó dəa’g pu lé a tujee ne ləm, rɔnduba gə́ wɔji dɔ ndɔ ree ləa lé a guree naŋg rug-rug ləm tɔ . 9 Njekɔs Ala rəw lé a kunda loo teḛ gə goo siŋgamoŋ lə Njekurai ndá yeḛ a ra nékɔbje ɓəd-ɓəd ləm, gə nétɔjije ləm, gə nédumkooje gə́ ŋgɔm ləma , 10 gə nésukəmlooje gə́ yèr ləm tɔ mbata lə deḛ gə́ njétujije lé mbata kankəmta gə́ d’a gə kaji ne lé deḛ mbad ɓó deḛ taa gə meḛ dee d’unda dan kəm dee’g el. 11 Togə́bè ɓa Ala sula dee ne sɔgɔ dan néŋgɔmje’g gə́ deḛ d’ɔm meḛ dee dɔ’g ndəm ne lé 12 mba kar deḛ lai gə́ d’ɔm meḛ dee dɔ kankəmta’g el nɛ deḛ ra rɔlel dɔ né gə́ lal najee lé ndá rəwta-gaŋg ləa a kwa dɔ dee ya.
Ala lé ɔr sí mba kar sí ajije ne
13 Ŋgako̰ síje, seḭ gə́ Mbaidɔmbaije unda sí dan kəmee’g lé jeḛ n’ra Ala oiyo ta-ta mbata lə sí mbata yeḛ nja mbər sí kédé gə́ dɔtar gə mba kar sí iŋgaje kaji gə goo kɔr gə́ Ndilee ɔr sí unda sí gə kəmee ləm, gə goo meekun lə sí gə́ seḭ ɔmje ne meḛ sí dɔ kankəmta’g ləm tɔ. 14 Yee ɓa yeḛ ɓar sí ne gə mbəa gə goo Tagə́maji gə́ jeḛ j’ula sí lé mba kar rɔnduba gə́ d’ula dɔ Mbaidɔmbaije Jeju Kristi’g lé d’ula dɔ sí-seḭ’g lé tɔ. 15 Bèe ndá, ŋgako̰ síje, aarje dɔ gɔl sí’g njaŋg ləm, waje meḛ sí kɔgərɔ dɔ ta gə́ jeḛ ndòo sí’g, yeḛ gə́ jeḛ m’pa gə ta sí gə yeḛ gə́ ndaŋg gə maktub ɓa j’ar sí lé ləm tɔ.
16 Maji kar Jeju Kristi Mbaidɔmbaije lə sí nja ləm, gə Ala Bɔ síje gə́ unda sí dan kəmee’g ləm tɔ lé d’wa sə sí noji d’ar sí j’isi ne dan meelɔm’g gə́ to gə no̰ ləm, d’ar meḛ sí to ne yel ləm tɔ lé 17 maji kar dee-deḛ ya gɔl meḛ sí d’ar sí aarje njaŋg dɔ néra gə́ maji gə́ rara kara ləm, gə dɔ tapa gə́ maji gə́ rara kara ləm tɔ.
© Ngambai Bible © Alliance Biblique du Tchad 1989, 2015.
