Lapia gə́ ra dee
1 Ma Jak, kura lə Ala ləm, gə ka̰ Mbaidɔmbaije Jeju Kristi ləm tɔ, m’ula gə maktub nee m’ar gin ɓeeje lə Israɛl dɔg-gir-dee-joo gə́ sanéna̰. M’ra sí lapia !
Meekun gə kəmkàr
2 Ŋgakɔmje, néje gə́ kədərə ɓəd-ɓəd gə́ naa sí lé maji koo deeje gə́ nérɔlel ya, 3 mbata seḭ gərje gao, né gə́ naa meekun lə sí lé ar meekila lə sí ḭ ne dɔ maree’g gə́ kédé-kédé. 4 Nɛ lé riri kara maji kar meekila lə sí ɔr njal, mba kar sí toje ne dəwje gə́ maji ɔr njoroŋ, né gə́ kəm ra kara seḭ a lalje raje kára el. 5 Lé nana ɓa mbuna sí’g kəmee inja njai el ɓəi ndá maji karee dəji Ala kəmkàr, yeḛ gə́ nana kara aree né gə́ kar ɓó yeḛ tura gée el, yeḛ a karee kəmkàr ya. 6 Nɛ maji karee dəjee gə meekun ləa ɓa ɓó a maḭ gə rəa el, mbata yeḛ gə́ maḭ gə rəa lé to asəna gə paŋgəm mán baa-boo, lel ula aree aw yo-yo nee-nee. 7 Maji kar dəw gə́ mée joo bèe lé ə̰ji mée’g to gə́ a gə kiŋga né ji Mbaidɔmbaije’g lé el. 8 Mbata yeḛ to dəw gə́ njemeebəŋgərə ya, lé rəw gə́ rara gə́ a kaw keneŋ ndá mée a bəŋgəree kunda ka̰ gə no̰ ya.
Njéndoo gə njenébao
9 Ŋgoko̰ sí gə́ njendoo lé maji karee nda mée kaḭ mbata d’unee d’unda daŋdɔ. 10 Ŋgoko̰ sí gə́ to gə́ bao lé maji karee-yeḛ nja nda mée kaḭ dɔ koso kul’g ləa, mbata yeḛ a dəs pèd asəna gə pudu muje bèe . 11 Kàr uba dor ɔs keḭ-keḭ ar mu ndòlé ləm, ar puduje gəḭ ləma, ar majee gə́ bə̰dərə bə̰ lé sané kad ləm tɔ. Togə́bè ɓa, bao kara a dəs koso kas loo-kula’g ləa bèe tɔ.
Nénaaje gə nékərje
12 Dəw gə́ wa mée mbidi ti dɔ nékər gə́ a gə neán ndá rəa a lelee, mbata loo gə́ yeḛ dum dɔ nékər mba̰ ndá yeḛ a kiŋga dɔgugu gə́ ka̰ kəmə gə́ Mbaidɔmbaije un ndia mba kar deḛ gə́ d’undá dan kəm dee’g lé. 13 Ɓó lé dəw oso dan nékər’g ndá maji karee pa pana: Ala ɓa ər neḛ mbata né gə́ majel kar kara a kər Ala el ləm, Ala kara a kər dəw el ləm tɔ. 14 Mal né gə́ ra darɔ dəw ɓa ilá ŋgərəŋ əree. 15 Tɔɓəi malee lé a keskèm ɓa a koji kaiya ɓəi. Kaiya lé loo gə́ tɔg as lée mba̰ ndá oji yoo tɔ.
16 Ŋgakɔmje gə́ m’unda sí dan kəm’g, maji kar sí ərje kəm rɔ sí el. 17 Nénoji gə́ maji dum gə́ rara ləm, gə nékarnoji gə́ rara gə́ to maji ɔr njoroŋ ləm tɔ lé d’ḭ rɔ Bɔ lookàrje gə́ dara, yeḛ gə́ rəa ya̰ maree el ləm, loo gə́ ndul ɗig godo rəa’g ləm tɔ. 18 Yeḛ nja oji sí to gə́ mée ndigi, kankəmta ɓa yeḛ ɔr sí ne mba kar sí n’toje ne kó dəwje ləa.
Koo ta ləm, ra née ləm tɔ
19 Ŋgakɔmje gə́ m’unda sí dan kəm’g, maji kar sí gərje ta nee gao ya. Tɔɓəi maji kar dəw gə́ rara kara orè mbia ndəŋ dɔ ta gə́ yeḛ oo ɓó ḭ rad mba pata pəd el ləm, əsé ar oŋg ḭ səa jugugu el ləm tɔ, 20 mbata oŋg lə dəw a kar dɔ meekarabasur lə Ala ɔr ne njal el. 21 Gelee gə́ nee ɓa maji kar sí mbadje né gə́ ram gə́ rara kara ləm, gə né gə́ yèr gə́ rara kara ləm tɔ. Ta gə́ deḛ dubu meḛ sí’g lé ndá taaje gə meekul, yee ɓa seḭ a kajije ne ya.
22 Kankəmta gə́ seḭ ooje lé raje née ɓó taaje gə́ sin kari el ləm, ərje kəm rɔ sí gə takə̰ji gə́ gə goo rəbee el ləm tɔ. 23 Mbata ɓó lé dəw oo kankəmta ɓa lal ra née ndá yeḛ to asəna gə dəw gə́ oo kəmee tatara’g, 24 yeḛ tən kəmee keneŋ tɔɓəi yeḛ ɔd aw ndá lée igee el. 25 Nɛ nana ɓa gə́ tən ta godndu gə́ maji ɔr njoroŋ gə́ ɔr ne ɓər dəa’g, ɓó lé yeḛ ai mée sam-sam ɓó un kəmee dɔ’g el ləm, ra née ləm tɔ ndá né gə́ yeḛ ra lé a kɔr dɔ ya.
26 Ɓó lé dəw gə́ rara ɓa, ə̰ji mée’g pana: Neḛ n’to dəw gə́ tədkag Ala, nɛ yeḛ ar təa to kwɔji el ndá yeḛ ər kəm rəa, kag Ala gə́ yeḛ pana: Neḛ təd lé to né gə́ sḭ ɓəi tɔ. 27 Tədkag Ala gə́ to kankəm né gə́ taa kəm Ala Ɓɔsíje lé yee ɓa nee: Aw la gə ŋganalje gə njékəisiŋgaje dan némeeko̰’g lə dee ləm, ar majel gə́ dɔ naŋg nee tibi mbɔri el ləm tɔ.
© Ngambai Bible © Alliance Biblique du Tchad 1989, 2015.
