Tuji gə́ boo gə́ a teḛ lé
1 Seḭ Bḛjamije, undaje loo teḛje
Mee ɓee gə́ Jerusalem.
Imje to̰to̰ mee ɓee gə́ Tekoa ləm,
Waje nékwɔji loo-rɔ tar mee ɓee
Gə́ Bet-Hakerem ləm tɔ,
Mbata némeeko̰ ḭ dɔgel si ree
To nétuji gə́ boo.
2 Ŋgoma̰də gə́ Sio̰ gə́ ma̰də ləm,
Gə maji rəa’g péd-péd ləm tɔ lé
Ma m’tujee!
3 Njékulbadje d’isi ree gə rəa’g
Gə koso-nékulje lə dee,
Deḛ la kəi-kubuje lə dee
Gugu ne dəa sub,
Ar nana kara o̰ mu ləa-ləa.
4 Waje dɔ gɔl rɔ sí mba rɔje səa!
Loo gə́ kàr aar daŋdɔ ya ar sí j’awje!
No̰ sí àr el mbata kàr lə sí godo ləm,
Loo aw ndul ləm tɔ.
5 Ar sí j’ḭje loondul’g j’awje!
J’aw n’tujije kəi-mbaije ləa.
6 Mbata Njesigənea̰ gə́ njeboo-néje ɓa pa togə́bè pana:
Tugaje kagje ləm,
Ubaje dɔndalje ləm tɔ rɔje ne gə Jerusalem.
To ɓee-boo gə́ kəm kar bo̰ nérea
Ɔs təa’g ya,
Mbata kula kəm loo ndòo ɓa
O̰ ɓee keneŋ.
7 To gə́ bwa-mán gə́ mán
Uba tir-tir keneŋ lé
Togə́bè ɓa némeeyèrje ləa kara
D’ɔs dɔ na̰ neg-neg keneŋ tɔ.
Baŋga néra gə́ kərm-kərm ləm,
Gə tuji loo ləm tɔ ɓa ɓar keneŋ,
Né gə́ to gə́ tor doo bèe
Ɓa m’oo gə kəm ta-ta.
8 Dəwje gə́ Jerusalem,
Taaje tandooje ləm
Nà m’a kɔr rɔm rɔ sí’g,
Kar ɓee lə sí tel to dɔdilaloo ləm,
Gə ɓee gə́ dəw si keneŋ el ləm tɔ!
Koso-dəwje gə́ mbad koo ta
9 Njesigənea̰ gə́ njeboo-néje ɓa pa togə́bè pana:
D’a tḭja ges Israɛlje gə́ nai lé
To gə́ tḭja ne kandə nduúje bèe.
Maji kari ula jii mam dee ne
To gə́ njetḭja nduú,
Mam ne barkəm nduúje bèe.
(Tapa Jeremi)
10 See na̰ ɓa m’a kulá ta
Esé see na̰ ɓa m’a karee
To njekɔrgoota ləm kar dee d’oo wa.
Aa ooje, mbi dee udu jig-jig
D’askəm kur mbi dee koo ne ta el.
Aa ooje, ta lə Njesigənea̰
Tel to gə́ nérɔkul mbata lə dee ləm,
Rɔ dee lel dee keneŋ el ləm tɔ.
11 Oŋg-boo lə Njesigənea̰
Rusu məəm njḭ-njḭ.
M’askəm kwa ŋgaŋgee el,
(Tapa Njesigənea̰)
Maji kari ɓugu oŋg neelé dɔ ŋganje’d
Gə́ d’aw mba̰-rəw’g ləm,
Gə dɔ basaje gə́ mbo̰ dɔ na̰ ləm tɔ.
Mbata oŋg neelé a kwa diŋgamje
Gə denéje ləm,
Dɔ ɓugaje gə dɔ dee
Gə́ ləb dee bula ləm tɔ.
12 Kəije lə dee d’a tel to ka̰ njé gə́ raŋg ləm,
Loo-ndɔje lə dee gə denéje lə dee
Kara bèe ləm tɔ,
Loo gə́ m’a kula jim ndiŋ
Gə́ dɔ dəw-mee-ɓeeje’g,
Njesigənea̰ ɓa pa bèe .
13 Mbata un kudee dɔ dəwje
Gə́ gɔ-gɔ’g saar teḛ ne dɔ deḛ gə́ boo-boo’g lé
Deḛ lai lé mal kiŋga né
Gə́ gə goo rəbee el ra dee ŋgwɔd-ŋgwɔd,
Un kudee dɔ njetegginta’g saar teḛ ne dɔ njekinjanéməs’g lé
Deḛ lai to njésukəmlooje.
14 Deḛ tɔ ta doo lə koso-dəwje ləm
Gə goo rəbee el
Ndá pana: Meelɔm! Meelɔm!
Nɛ meelɔm godo ,
15 D’a si gə rɔkul
Mbata deḛ ra né gə́ mina̰,
Rɔkul ra dee el ləm, sɔḭ wa kəm dee el ləm tɔ,
Gelee gə́ nee ɓa d’a koso na̰’d
Gə deḛ gə́ d’oso lé ləm,
M’a tɔs dee tila dee
Loo gə́ m’a kar bo̰ néra dee ɔs ta dee’g ləm tɔ,
Njesigənea̰ ɓa pa bèe.
16 Njesigənea̰ pa togə́bè pana:
Undaje rɔ sí rəwje’g aaje loo ooje.
Dəjije kila-rəwje gə́ ləw ooje,
See rəw gə́ ra ɓa maji wa.
Bèe ndá njaaje keneŋ
Ndá seḭ a kiŋgaje loo-kwa-rɔ sí keneŋ!
Nɛ deḛ d’ilá keneŋ pana:
Jeḛ j’a njaaje keneŋ el .
17 M’unda njéŋgəmlooje mbɔr sí’g dəb,
Urje mbi sí gèŋ gə mba kooje ne ndu to̰to̰!
Nɛ deḛ d’ilá keneŋ pana:
Jeḛ j’a kurje mbi sí el.
18 Gelee gə́ nee ɓa
Seḭ ginkoji dəwje gə raŋg, ooje ta!
Seḭ gə́ mbo̰je dɔ na̰ lé
Maji kar sí gərje né gə́ a gə teḛ dɔ dee’g lé!
19 I dɔ naŋg neelé maji kari oo ta,
Aa oo, m’a gə kar némeeko̰ ree
Dɔ koso-dəwje’g neelé
Gə goo kandə takə̰jije lə dee,
Mbata deḛ d’ur mbi dee
Dɔ taje’g ləm el ləm,
Deḛ d’ə̰ji godndum bəḭ-bəḭ ləm tɔ.
20 Ubu gə́ ə̰də sululu gə́ d’ḭ ne Seba ləm,
Gə kamnaḭje gə́ d’ə̰də lel
Gə́ d’ḭ ne dɔ ɓee gə́ əw ləm tɔ lé
See m’aw ndòo dee wa.
Nékinjaməsje lə sí gə́ ka̰ roo lé
Lelm el ləm,
Nékinjaməsje lə sí gə́ raŋg kara
Taa kəm el ləm tɔ.
21 Gelee gə́ nee ɓa Njesigənea̰ pa ne pana:
Aa ooje, m’a kar kɔr mbalje
To no̰ koso-dəwje’g neelé
Gə́ nétuga gɔl dee ya,
Ndá bɔ ŋganje gə ŋgan deeje gə́ diŋgam ləm,
Njéboataɓeeje gə baokuraje lə dee ləm
D’a tuga gɔl dee keneŋ
Ndá d’a kudu ne guduru.
Njéba̰je d’ḭ par gə́ dɔgel d’isi ree
22 Njesigənea̰ pa togə́bè pana:
Aa ooje, koso-dəwje
D’ḭ par gə́ ɓee gə́ dɔgel bèe ree ləm,
Boo-ginkoji dəwje d’ḭ rudu naŋg’d nee lai ləm tɔ.
23 Deḛ d’odo ɓandaŋgje
Gə ko̰ niŋgaje ləm,
Deḛ to njémeemajelje
Ɓó d’oo kəmtondoo el ləma,
Ndu dee ɓar asəna gə baa-boo-kad bèe ləm tɔ.
Deḛ d’uba kundaje
D’isi pèrèrè gə mba rɔ
To gə́ dəw gə́ kára ba bèe,
Mba rɔ sə sí-seḭ gə́ síje Sio̰!
(Tapa koso-dəwje)
24 Loo gə́ jeḛ j’oo ta ree lə dee ndá
Ji sí unda ndolè
Néɓəŋgərəti ra sí
To gə́ ndóo gə́ ɔs dené bèe.
25 Awje mee ndɔje’g el ləm,
Awje rəwje’g el ləm tɔ
Mbata lé neelé kiambas lə njeba̰ lə sí
To keneŋ ləm,
Ɓəl-boo aḭ dɔ sí sub ləm tɔ.
(Tapa Njesigənea̰)
26 Seḭ koso-dəwje ləm,
Ulaje kubu-kwa-ndòo rɔ sí’g
Rogoje ne babur’g,
Waje ne ndòo to gə́ dəw
Gə́ wa ne ndòo ŋgon kára bèe ləm,
No̰je gə mán kəm sí’g
Siije ne mbigi-mbigi ləm tɔ,
Mbata njetujiloo a gə kuba sí naŋg bus.
27 Ma m’undai-i Jeremi
Gə́ njenaa meḛ koso-dəwje ləm ləm,
Gə mba kari gər rəw-kaw dee ləm,
Gə tən panjaa dee ləm tɔ.
28 Deḛ lai to gə́ njékɔsta-rəwje
Gə njétədta kunda ta mar deeje’gje
Gə́ kədərə asəna gə larkas gə larndul bèe,
Deḛ lai tel to né gə́ ndum.
29 Lel ndubu ar pər taa
Ndá rɔm léḛ pe’d,
Ndiri gə́ ndiri mba kar siḭyee teḛ lé
Deḛ d’oo ne ndòo pi
Siḭ lar teḛ mée’g el.
30 Deḛ ɓar dee lar gə́ kəm kɔm kɔrɔ
Mbata Njesigənea̰ mbad dee
Ɔm dee kɔrɔ.
© Ngambai Bible © Alliance Biblique du Tchad 1989, 2015.
